Den sani di Malikisi sikiifi 13:1-37
13 Di a be e komoto aini a tempel, wan fu den bakaman fi en taigi en taki: ‘Leliman, luku fa den siton bigi, luku fa a tempel moin.’
2 Ma Yesesi taigi en taki: ‘Ye si a gaan bigi tempel ya? Nawan fu den siton di ye si ya o fika a taawan tapu. Ala den fiya o booko kai.’
3 Di Yesesi be sidon na a Oleifi Mongo na abaase fu a tempel, Peitilisi, Yakowbesi, Yohanisi anga Andreyas go akisi en taki:
4 ‘Taigi wi on ten den sani ya o pasa. San wo si di o soi taki den sani ya o kon a wan kaba?’
5 Neen Yesesi taigi den taki: ‘Luku bun fu sama á fende u koli.
6 A omen sama o kon da den o taki: “A mi na a Kelestesi.” Den o fende omen sama koli.
7 Te we yee taki feti e feti, efuso te we yee nyunsu fu feti a taa kondee, wa mu dyombo. Den sani ya mu pasa, ma a kaba á doo ete.
8 Bika foluku o go e feti anga denseefi, kondee* o go e feti anga taa kondee. Seke-doti o de a omen peesi, nyanyan o pina tu. Den sani ya de enke a pen di wan bee-uman e fii te a de fu meke.
9 Ma u mu de na ain, bika sama o tyai u gwa kuutu, den o fon wi aini den snoga. Den o tyai u gwa tiiman anga kownu fesi fu di wi a mi bakaman. Te den sani ya o pasa da wo fende a okasi fu peleiki gi den.
10 Ma a bun nyunsu fu a Kownukondee mu paati na ala se fosi. Bakadati a kaba o kon.
11 Te den tyai u gwa kuutu, u naafu booko wi ede anga san wo taki. Di a yuu o doo a santa yeye o meke u sabi saw mu taki, bika a naw seefi o taki, ma na a santa yeye o taki gi u.
12 Baala o meke den kii baala, dda o meke den kii pikin, pikin o libi ogii anga den mma anga den dda te da den meke sama kii den.
13 Sama o buuse u fu mi nen ede. Ma a sama di holidoo te na a kaba o fende libi.
14 Te u si a tyobo sani di e poli sani taampu aini a santa peesi a pe aa mu de, (meke a sama di e leisi a polofeititoli ya meke moiti fu fusutan en bun) da den sama di e tan a Yudeya mu lowe gwa den mongo.
15 A sama di de neen daki tapu, á mu saka kon a ondoo, aa mu go teke sani aini en osu tu.
16 A sama di de aini en goon á mu daai gwa osu baka fu go teke en dyakiti.
17 Heelu fu den uman di de anga bee anga den uman di abi pikin a bobi na a ten de.
18 U mu e begi naamo taki den sani ya á pasa aini a koo ten fu a yali.
19 Bika a ten de o de wan ten fu banowtu. Noiti ete sowan banowtu be de senten di Gadu meke sani te anga now. A banowtu ya naw kon noiti moo tu.
20 Efu Yehofa á be satu a ten de, nawan sama be o tan a libi. Ma Gadu o satu a ten de gi den sama di a kai.
21 Efu wan sama taigi u na a ten de taki: “Luku a Kelestesi ya.” Efuso: “Luku en anda.” Wa mu biibi en.
22 Bika falisi Kelestesi anga falisi polofeiti o kon. Den o du omen gaan wonduu fu puubei fu koli den sama di Gadu kai.
23 Neen meke u mu luku bun. Mi taigi wi ala den sani ya a fesi.
24 Baka a gaan banowtu fu a ten de, a san o dunguu, a mun naw kiin peesi moo.
25 Den sitali o kai komoto a tapu, ala sani di de a hemel o seke.
26 Den o si a Manpikin fu libisama e kon aini den woluku. Aw kon anga gaan makiti anga gendee.
27 Aw sende den engel fi en go anga gaan tutu di o go e piki taanga. Den engel o gwa den fo uku fu goontapu fu teke ala den sama di Gadu kai, den o gwa den moo faawe peesi fu goontapu te doo den moo faawe peesi fu hemel.
28 U luku a figabon, te den taka fu a bon ya kengi teke nyun uwii, daw sabi taki a waan ten fu a yali koosube.
29 A letiso useefi mu sabi taki te u si den sani ya, da a Manpikin fu libisama de leti a doomofu.
30 Biibi mi, den sama fu a ten ya naw dede fosi ala den sani ya pasa.
31 Hemel anga goontapu naw de moo, ma den sani di mi taki o tan fu teego.
32 Nawan sama sabi a dei anga a yuu. Den engel di de a hemel anga a Manpikin seefi á sabi. Na a Dda wawan sabi a dei anga a yuu.
33 U mu de na ain ala yuu, wa mu siibi, bika wa sabi on ten den sani ya o pasa.
34 A de enke wan man di komoto neen osu fu gwa taa kondee. A fika den saafu fi en fu luku a osu fi en. A gi ibiiwan fu den wan wooko fu du, neen a taigi a wakitiman taki a mu de na ain.
35 Neen meke u mu de na ain ala yuu, bika wa sabi on yuu a sama di abi a osu o kon. Wa sabi efu aw kon a neti, mindiineti, musude, efuso fuuku mmanten.
36 Efu wa de na ain, di aw kon wanboowanboo aw si we siibi.
37 A sani di mi e taigi u ya, e teli gi ala sama: U mu de na ain ala yuu.’
A maiki
^ Aini Giikitongo den be taki: ‘kownukondee.’