Den sani di Malikisi sikiifi 14:1-72
-
Den pilisite e suku wan fasi fu kii Yesesi (1, 2)
-
Wan uman kandi sumee switi oli a Yesesi ede (3-9)
-
Yudas konkuu Yesesi (10, 11)
-
A lasiti Paskafesa (12-21)
-
A fosi leisi di a Membeefesa holi (22-26)
-
Yesesi taigi Peitilisi taki aw sitee taki aa sabi en (27-31)
-
Yesesi e begi aini Getsemanei (32-42)
-
Den kisi Yesesi fu tyai en go sooto (43-52)
-
Den sama fu a Sanhedrin kuutu Yesesi (53-65)
-
Peitilisi taki aa sabi Yesesi (66-72)
14 Tu dei fosi a Paskafesa anga a fesa fu beele sondee sowda, den fesiman fu den pilisite anga den leliman fu a Weiti be e taki anga denseefi fu luku fa den be sa lei gi Yesesi fu den be sa fende en kii.
2 Ma den be taki: ‘Wa mu kisi en na a fesa, efuso kande a foluku o ligei anga u.’
3 Wan dei Yesesi be de a Betaniya aini a osu fu Simon. A man ya be abi gwasi fosi. Neen wan uman kon ape anga wan bataa* sumee switi oli. A oli ya be dii, bika a be tuutuu nardus* oli. A opo a bataa neen a bigin kandi a oli a Yesesi ede.
4 Son wan fu den bakaman fi en ati boon di den si san a uman du, neen meke den taki: ‘Saide a poli a sumee switi oli?
5 U be sa seli a oli ya moo enke 300 pisi solufu moni, daw gi den pootiman a moni de.’ Den ati boon na a uman*.
6 Ma Yesesi taigi den taki: ‘U fika en. Saide we fuufeli en? A wan bun sani a du gi mi.
7 Den pootiman o de ya anga wi ala yuu, neen meke iniiwan yuu u sa du bun gi den. Ma mi naw de ya anga wi ala yuu.
8 A san a poi a du. A sumee switi oli di a kandi a mi sikin, a fu seeka mi gi a beli fu mi.
9 Biibi mi, na ala se fu goontapu pe a bun nyunsu o paati, sama o taki fu a sani di a uman ya du. Noiti den o feegete en.’
10 Yudas Iskariot, wan fu den twalufu apostel gwa den fesiman fu den pilisite, neen a taigi den taki a sa konkuu Yesesi gi den.
11 Den fesiman fu den pilisite poolo di den yee san a taki. Den paamisi Yudas taki den o gi en moni*, neen meke a bigin suku wan fasi fu konkuu Yesesi.
12 Na a fosi dei fu a fesa fu beele sondee sowda, den gwenti tyai wan meti enke Paska-ofaandi. Den bakaman fi en akisi en taki: ‘Pei wani u seeka sani gi a Paska nyanyan?’
13 Neen a taigi tu fu den bakaman fi en taki: ‘U go aini a foto. Wan man di e tyai wan goo anga wataa o kon miti u, daw waka neen baka.
14 U go aini a osu di aw go, daw taigi a sama di abi a osu taki: “A Leliman taki: ‘Aini sowtu kambaa mi anga den bakaman fu mi sa nyan a Paska nyanyan?’”
15 Aw soi u wan gaan kambaa a wan sodoo, di abi ala sani aini. Na ape u mu seeka sani fu u nyan a Paska-ofaandi.’
16 Di den bakaman fi en go aini a foto, ala sani pasa leti enke fa Yesesi taigi den. Neen den seeka sani fu holi a Paska.
17 Di neti tapu, en anga den twalufu apostel fi en go ape.
18 Di den sidon a tafaa e nyan, Yesesi taki: ‘Biibi mi, wan fu u di sidon e nyan anga mi ya o konkuu mi.’
19 Di Yesesi taki a sani ya, tyali kisi den. Ala den bigin taigi en taki: ‘Mi sabi taki a ná mi ye.’
20 A taigi den taki: ‘A wan fu u ya di e dipi en beele anga mi aini aseefi komiki.
21 A tuu taki a Manpikin fu libisama o dede enke fa Gadu buku taki. Ma heelu fu a sama di konkuu a Manpikin fu libisama! A be o moo bun efu a sama de á be meke kon a goontapu.’
22 Di den nyan te wan pisi, Yesesi teke wan beele, a gi Gadu daa, neen a booko en. A gi den bakaman fi en neen a taigi den taki: ‘A beele ya wani taki mi sikin, u teke, daw nyan.’
23 Bakadati a teke wan kan win, neen a gi Gadu daa. A gi den bakaman fi en, neen ala den diingi.
24 Neen a taki: ‘A win ya wani taki a “buulu” fu mi “fu a kuudei” di o kai a doti, fu fii omen sama.
25 Biibi mi, mi naw diingi win moo te enke a dei di mio diingi a nyun win aini a Kownukondee fu Gadu.’
26 Den singi gafa Gadu, neen den go na a Oleifi Mongo.
27 Neen Yesesi taigi den taki: ‘Tide neti ala wo gwe fika mi, bika Gadu buku taki: “Mio naki a sikapuman, da ala den sikapu o lon fanyafanya.”
28 Ma di mio weki baka, mio gwa Galileya, da mio wakiti wi ape.’
29 Ma Peitilisi taigi en taki: ‘Winsi ala den taawan gwe fika i, mi dati naw gwe fika i.’
30 Di a taki so neen Yesesi taigi en taki: ‘Biibi mi, tide neti seefi fosi wan kakafoo bali tu toon, yo taki dii boo taki ya sabi mi.’
31 Ma Peitilisi be e taki namo taki: ‘Winsi mi mu dede anga i seefi, toku noiti mio taki mia sabi i.’ Ala den taawan taki aseefi sani tu.
32 Bakadati den doo wan peesi den e kai Getsemanei, neen a taigi den bakaman fi en taki: ‘U sidon ya wakiti mi! Mio go begi.’
33 Ma a meke Peitilisi, Yakowbesi anga Yohanisi go anga en. A be de anga gaan buduufu na ati, ná pikin ibi a be ibi gi en.
34 A taigi den taki: ‘A buduufu di de a mi ati ibi te a sa tyai dede kii mi. U wakiti ya, u de na ain.’
35 A waka go pikinso moo faawe, a sutu kini a doti neen a bigin begi Gadu taki efu a poi, da meke a sani ya á miti en.
36 A taki: ‘Abba*, mi sabi taki i poi du ala sani, gaantangi puu a kan ya a mi fesi baa. Ma a ná san mi wani mu pasa, meke sani waka enke fai wani.’
37 Di a daai gwa den baka, a si taki den e siibi, neen meke a taigi Peitilisi taki: ‘Simon, ye siibi? Wa be poi tan wan yuu namo anga ain seefi noh?
38 U de na ain, u mu e begi naamo, daw naw sondu te tesi miti u. Mi sabi taki a ati wani, ma a sikin swaki.’
39 A gwe baka go begi, neen a taki denseefi sani.
40 Di a daai kon a den, a si taki den be e siibi baka, bika siibi be moo den. Den á be sabi san fu piki en.
41 Di a daai kon a den du fu dii leisi a taigi den taki: ‘Na a yuu ya we siibi e boo sikin? A sai, a yuu doo. Den o seli a Manpikin fu libisama gi ogii sama.
42 Wi opo meke u gwe. A sama di o konkuu mi doo kaba.’
43 Aa kaba taki seefi, neen Yudas, wan fu den twalufu apostel fi en doo ape anga wan gaan kulu sama. Den be de anga fetihow anga kodya. A den fesiman fu den pilisite anga den gaanwan fu a foluku be sende den kon.
44 A sama di be o konkuu en be taigi den taki: ‘Na a sama di mio bosi u mu kisi ye, u luku en bun fu aa lowe.’
45 A waka langalanga gwa Yesesi neen a taki: ‘Leliman.’ Neen a bosi en neen sikinfesi.
46 A so den kisi Yesesi tyai gwe.
47 Ma wan fu den sama di be de anga Yesesi hali en fetihow neen a koti a yesi fu a saafu fu a gaan pilisite* puu.
48 Ma Yesesi taigi den taki: ‘Anga fetihow anga kodya u kon teke mi fu tyai go sooto enke mi a fufuuman?
49 Na ala dei mi be de aini a tempel e leli sama, ma wa be e kisi mi tyai go sooto. Ma den sani ya pasa fu meke den sani di Gadu buku taki kon tuu.’
50 Bakadati ala den bakaman fi en lon gwe fika en.
51 Ma wan yonkuman, di be wei wan dyakiti di be meke anga fini linnen be e waka neen baka. Di den sama kon fu kisi en,
52 a fika a dyakiti fi en neen a lon gwe anga a koosi di a be wei a ondoo*.
53 Den tyai Yesesi go na a gaan pilisite. Ala den fesiman fu den pilisite, den gaanwan fu a foluku, anga den leliman fu a Weiti be kon makandaa ape.
54 Ma Peitilisi be e waka faawe neen baka, te enke den doo a dyali fu a gaan pilisite. A go sidon e waan faya anga den futuboi fu a osu.
55 Den fesiman fu den pilisite anga ala den sama fu a Sanhedrin* be e suku sama fu lei gi Yesesi, fu den be sa fende en kii, ma den á be fende nawan sani fu kuutu en.
56 A omen sama be lei gi Yesesi, ma ala den be e taki wan taa sani.
57 Wantu fu den sama di be de ape opo taampu neen den taki:
58 ‘U be yee a taki: “Mio booko a tempel ya di libisama ana meke, da mio meke wan taawan di libisama ana á meke.”’
59 Ma nawan fu den sani di den sama ya taki be e kai anga denseefi.
60 A gaan pilisite opo taampu neen a akisi Yesesi taki: ‘I nai piki noh? I nai yee san den man ya e taki fii noh?’
61 Ma a be de pii, aa taki nawan sani. Neen meke a gaan pilisite akisi en taki: ‘A yu na a Kelestesi, a Manpikin fu a Moo Santa Gadu?’
62 Neen Yesesi piki en taki: ‘Eeye, a mi. Wo si a Manpikin fu libisama e kon aini den woluku fu hemel. Aw sidon na a letise-ana fu a makiti Gadu.’
63 Di a taki den sani ya, a gaan pilisite piiti en koosi neen a taki: ‘Wi abi kotoigi fanowdu ete?
64 Useefi yee fa a wisiwasi Gadu. Saw mu du anga en?’ Neen ala den taki a mu dede.
65 Wantu fu den bigin tufe neen, den tapu en fesi neen den naki en anga kofu. Den taigi en taki: ‘Efi ya wan polofeiti, da taigi u sama naki yu osi.’ Den suudati fu a kuutu-osu naki en aini en fesi neen den tyai en gwe.
66 Di Peitilisi be de aini a dyali, wan fu den uman di be e wooko aini a osu fu a gaan pilisite kon ape.
67 Di a si Peitilisi e waan faya, a luku en duun neen a taigi en taki: ‘Ya wan fu den man di be lobi waka anga Yesesi fu Nasaleti.’
68 Ma a sitee taki: ‘Mia sabi a sama di ye taki, mia sabi san ye taki.’ A komoto de neen a gwa doose, koosube fu a doomofu fu a dyali.
69 Ma a uman di be e wooko gi a gaan pilisite kon ape tu, neen a bigin taigi den sama di be de ape taki: ‘En a wan fu den bakaman fi en oo.’
70 Ma Peitilisi sitee baka taki a ná tuu. Baka wan pisiten wantu taa sama di be taampu ape bigin taigi en taki: ‘Ya wan fu den ai, bika ya wan Galileyasama.’
71 Ma Peitilisi bigin sweli taki ogii sa miti en efu a nai taki a tuu. A taki: ‘Mia sabi a man di we taki de!’
72 Faisi a taki a sani ya, wan kakafoo bali du fu tu boo. Neen Peitilisi membee a sani di Yesesi be taigi en. A be taigi en taki: ‘Fosi wan kakafoo bali tu leisi, yo taki dii boo taki ya sabi mi.’ Neen Peitilisi bali kee.
A maiki
^ A be wan alabaster bataa. Luku a wowtu ‘alabaster’ na a pisi ‘San den wowtu ya wani taki.’
^ Luku a wowtu ‘nardus’ na a pisi ‘San den wowtu ya wani taki.’
^ Efuso ‘den bigin ligei anga a uman’.
^ Aini Giikitongo den be taki: ‘solufu moni.’
^ Wan Hebrew efuso Arameisi wowtu di wani taki ‘Nda’.
^ Luku a wowtu ‘gaan pilisite’ na a pisi ‘San den wowtu ya wani taki.’
^ Aini Giikitongo den be taki: ‘a lon gwe soso sikin.’
^ A moo hei kuutu-osu fu den Dyu.
