Den sani di Malikisi sikiifi 15:1-47
15 A fuuku mmanten ala den sama fu a Sanhedrin, dati a den fesiman fu den pilisite, den gaanwan fu a foto, anga den leliman fu a Weiti kon makandaa, den tei Yesesi neen den tyai en gwa Pilatus.
2 Neen Pilatus akisi en taki: ‘A yu na a Kownu fu den Dyu?’ Yesesi piki en taki: ‘A leti enke fai taki de.’
3 Den fesiman fu den pilisite be e taki omen ogii fu Yesesi.
4 Pilatus akisi en taki: ‘I nai piki noh? I nai yee den somen ogii di den e taki fii noh?’
5 Ma Yesesi á piki en. A sani ya meke Pilatus foondoo.
6 Ala yali te a Paskafesa be e holi, Pilatus be e losi wan sitaafuman. Na a foluku seefi be e taigi en sama a be mu losi gi den.
7 A ten de wan man den e kai Barabas be de a sitaafu-osu. En anga wan kulu sama di á be wani saka denseefi a lanti ondoo be de a sitaafu-osu bika den be kii sama.
8 Den sama kon a Pilatus neen den akisi en fu du a sani di a be gwenti du gi den ala yali.
9 A akisi den taki: ‘U wani mi losi a Kownu fu den Dyu gi u?’
10 Bika Pilatus be sabi taki a fu di den fesiman fu den pilisite be e dyalusu anga Yesesi meke den be tyai en kon neen.
11 Ma den fesiman fu den pilisite sende a foluku fu akisi Pilatus fu losi Barabas gi den, a peesi fu Yesesi.
12 Pilatus akisi den baka taki: ‘Da san mi mu du anga a man di we kai a Kownu fu den Dyu?’
13 Den bali baka taki: ‘Sipikii en a wan ponsu!’
14 Neen Pilatus akisi den taki: ‘Saide? Sowtu ogii a du?’ Ma den be e bali moo taanga taki: ‘Sipikii en a wan ponsu!’
15 Di Pilatus yee san den taki, a losi Barabas gi a foluku, bika aa be wani den ati boon neen. A meke den wipi Yesesi, neen a taigi den suudati fu den tyai en go sipikii a wan ponsu.
16 Den suudati tyai Yesesi gwa doose* fu a osu fu a gaanman, neen den kai ala den suudati kon a wan.
17 Den wei wan baaw-lebi koosi gi en. Den teke taka fu wan makabon, den bei wan kownu-ati, neen den poti en neen ede.
18 Neen den bigin taki: ‘Odi oo, Kownu fu den Dyu.’
19 Den be e naki en neen ede anga wan tiki, den be tufe neen, den sutu kini a doti boigi gi en tu.
20 Di den kaba soso en, den puu a baaw-lebi koosi di den be wei gi en, neen den wei en dyakiti gi en baka. Bakadati den tyai en gwe fu go sipikii a wan ponsu.
21 Di Simon, wan man fu Sireine di be komoto a doose fu a foto be e pasa ape, den dwengi en fu tyai a ponsu fu Yesesi. A man ya a be a dda fu Aleksander anga Rufus.
22 Den tyai Yesesi gwa wan peesi den e kai Golgota. Dati wani taki ‘Ede-kaabasi’.
23 Di den de ape, den puubei fu gi en win di mokisa anga mirre*, ma aa be wani.
24 Den sipikii en na a ponsu, neen den iti lowte* fu luku sama be o fende son wan fu den koosi fi en.
25 Wan pisiten fu 9 yuu mmanten, den sipikii en na a ponsu.
26 Den be sipikii wan sani poti na a ede fu a ponsu fu soi saide den kii en. Den be sikiifi taki: ‘A Kownu fu den Dyu.’
27 Den be sipikii tu ogiiman a den ponsu neen se tu, wan neen letise, a taawan neen kukutuse.
28 *——
29 Den sama di be e pasa be e soso en. Den be e seke den ede da den be e taki: ‘Ai be e taki yo booko a tempel dai meke en baka aini dii dei.
30 Yeepi iseefi noh, saka komoto na a ponsu.’
31 Den fesiman fu den pilisite anga den leliman fu a Weiti seefi be e soso en. Den be e taki: ‘A be e yeepi taa sama, ma aa poi yeepi enseefi.
32 Efu neen na a Kelestesi, a Kownu fu Islayeli, da meke a saka komoto na a ponsu osi. A te a du a sani ya fosi wo biibi en.’ Den sama di den be sipikii neen se seefi be e soso en.
33 Wan pisiten fu twalufu yuu mindii dei, a hii kondee dunguu pii te enke dii yuu bakadina.
34 Di dii yuu doo, Yesesi bali taki: ‘Eli, Eli, lama sabaktani?’ Dati wani taki: ‘Mi Gadu, mi Gadu, saide i gwe fika mi?’
35 Di son wan fu den sama di be taampu ape yee a sani ya, den taki: ‘Yee de, ai kai Eliya.’
36 Wan fu den lon go teke wan siponsu, a nati en anga suwa win, a poti en a wan tiki, neen a gi Yesesi fu diingi. A taki: ‘U fika en, meke u luku efu Eliya o kon yeepi en.’
37 Yesesi bali, neen en boo koti.
38 A gaan koosi di be tapu a santa peesi fu a tempel piiti fu tapu te a doti.
39 Di a suudati-edeman di be taampu ape si den sani di pasa di Yesesi dede, a taki: ‘A man ya a be Gadu Manpikin tuu.’
40 Wantu uman be taampu a faawe e luku. Maliya Makdalena, Salome, anga Maliya a mma fu Yakowbesi* anga Yoses be de ape tu.
41 Den uman ya be e holibaka gi Yesesi di a be de a Galileya. Den anga omen taa uman be kon anga Yesesi a Yelusalem.
42 A be lati kaba, den be e seeka sani gi a Sabadei di be o de a taa dei tu.
43 Neen Yowsefu fu Arimateya, wan man fu a Sanhedrin di sama be e lesipeki, teke deki-ati go akisi Pilatus a dedesikin fu Yesesi. A man ya seefi be e wakiti a Kownukondee fu Gadu.
44 Ma Pilatus be wani sabi efu Yesesi dede kaba, neen meke a sende kai a suudati-edeman fu akisi efu Yesesi dede.
45 Baka di a suudati-edeman piki en taki Yesesi dede tuu, a taigi Yowsefu taki a sa teke a dedesikin.
46 Yowsefu go bai wan dii linnen koosi, a puu Yesesi na a ponsu, a lolo en aini a koosi, neen a poti en aini wan siton-olo di den be diki fu beli sama. Bakadati, a lolo wan siton tapu a geebi.
47 Ma Maliya Makdalena, anga Maliya a mma fu Yoses be fika e luku a geebi pe den be poti Yesesi.
A maiki
^ Efuso ‘aini a dyali fu a paleisi’.
^ Luku a wowtu ‘mirre’ na a pisi ‘San den wowtu ya wani taki.’
^ Luku a wowtu ‘lowte’ na a pisi ‘San den wowtu ya wani taki.’
^ Son Beibel abi a vers ya, ma aa de aini omen fu den pelensipali Giiki bukulolo.
^ A Yakowbesi ya na a pikinwan. A gei a be yonkuu moo apostel Yakowbesi, efuso kande a be satu moo en.
