Den sani di Malikisi sikiifi 16:1-8
-
Yesesi kon a libi baka (1-8)
16 Di a Sabadei pasa, Maliya Makdalena, Maliya a mma fu Yakowbesi, anga Salome bai sumee switi sani fu poti gi a dedesikin fu Yesesi.
2 A fuuku mmanten fu a fosi dei fu a wiki*, den be doo na a geebi di a san opo.
3 Den be e akisi denseefi taki: ‘Sama o lolo a siton puu na a geebi mofu gi u?’
4 Ma di den luku, den si taki wan sama be lolo a gaan bigi siton puu na a geebi mofu kaba.
5 Di den go aini a geebi, den si wan yonkuman sidon na a letise fu a geebi. A be wei wan weti koosi. Ná pikin dyombo den dyombo.
6 Ma a taigi den taki: ‘Wa dyombo. Mi sabi taki a Yesesi fu Nasaleti di sama be sipikii na a ponsu we suku. Ma aa de ya, bika a weki baka. U luku pe den be poti en ya.
7 U go taigi Peitilisi anga den taa bakaman fi en taki a de a pasi e gwa Galileya. Wo si en ape, leti enke fa a be taigi u.’
8 Di den komoto aini a geebi, den lon komoto ape, ala den sikin be e dansi. Den be e feele neen meke den á taigi nawan sama wan sani.
A maiki
^ A fosi dei fu a wiki a be sonde.