Den sani di Malikisi sikiifi 2:1-28
2 Baka wantu dei Yesesi daai gwa Kaperna-um, neen a taki paati taki a doo osu.
2 Tyaipi sama booko bguullu go aini a osu. Sama be lai na a doomofu te, peesi á be de fu taampu moo. Neen a bigin leli den a wowtu fu Gadu.
3 Fo man tyai wan man di lan kon neen. Wan kulu sama be kon anga den.
4 Fu di tyaipi sama be de ape meke den á be poi tyai a man go doo a Yesesi. Neen meke den puu wan pisi fu a daki a pe Yesesi be de, neen den saka a lanman anga a bedi* go aini a osu.
5 Di Yesesi si a biibi fu den sama, a taigi a man di be lan taki: ‘Pikin, mi gii paadon fu den sondu fii.’
6 A pisiten de son wan fu den leliman fu a Weiti di be de ape be e denki taki:
7 ‘Fa a man ya sa taki sowan sani? Ai wisiwasi Gadu. A Gadu wawan poi gi sama paadon fu sondu.’
8 Ma Yesesi be sabi san den e pakisei, neen meke a taigi den taki: ‘Saide we denki so aini wi ati?
9 San moo makiliki? Fu taigi a man di lan taki: “Mi gii paadon fii sondu?” Efuso fu taigi en taki: “Opo teke i bedi dai bigin waka.”
10 Ma mi wani u sabi taki a Manpikin fu libisama abi a makiti a goontapu ya fu gi sama paadon fu den sondu.’ A taigi a lanman taki:
11 ‘Mi e taigi i, opo teke i bedi dai gwa yu osu.’
12 Di a taki a sani ya, a man opo teke en bedi neen a waka pasa ala den sama di be de ape gwa doose. Ala den sama be foondoo, neen den gafa Gadu. Den be e taki: ‘A fositoon u si a sani ya.’
13 Baka di Yesesi gwa wataa mofu na a ze, tyaipi sama booko kon neen, neen a bigin leli den.
14 Di a be e pasa, a si Leifi, a manpikin fu Alfeyus sidon na a kantoo pe sama e go pai lantimoni, neen a taigi en taki: ‘Kon waka a mi baka*.’ Faisi a kai en, a opo neen a bigin waka neen baka.
15 Bakaten Yesesi anga den bakaman fi en be sidon a tafaa e nyan aini a osu fu Leifi. Omen sama di be e piki lantimoni anga sama di be e libi wan sondu libi be de makandaa anga den, bika omen fu den be toon Yesesi bakaman.
16 Ma di wantu leliman fu a Weiti di be de Faliseiman* si Yesesi sidon a tafaa anga den sama ya, den akisi den bakaman fi en taki: ‘Saide ai nyan anga sama di e piki lantimoni anga sama di e libi wan sondu libi?’
17 Di Yesesi yee san den taki, a taigi den taki: ‘Gusontu sama naabi dataa fanowdu, a siki sama abi dataa fanowdu. Mia kon a goontapu gi bun sama, a sondu sama mi kon gi.’
18 Den bakaman fu Yohanisi anga den Faliseiman be e faste. Neen meke, den bakaman fu Yohanisi go akisi Yesesi taki: ‘Wi anga den bakaman fu den Faliseiman e faste*, da saide den bakaman fii nai faste?’
19 Yesesi piki den taki: ‘Te a man di e toow de na a fesa anga den mati fi en, den mati fi en naafu faste, na so noh? Solanga a de anga den, den naw faste.
20 Ma wan ten o kon te a toowman naw de anga den moo. Di a dei de o doo, da den o faste.
21 Nawan sama e nain wan nyun pisi koosi miti anga wan gaandiwan. Efu a be o du a sani de a nyun pisi koosi be o hali a gaandiwan piiti, da a piiti fu a koosi o kon moo bigi.
22 A letiso sama nai poti nyun win aini gaandi winsaka*. Efu a be o du a sani de, a winsaka o piiti, da a win o doo kai. Ma te sama poti nyun win aini nyun winsaka, da nawan fu den tu o poli.’
23 Yesesi anga den bakaman fi en be e waka pasa wantu alisigoon a wan Sabadei. Di den e pasa, den bakaman fi en bigin piki alisi* nyan.
24 Neen meke den Faliseiman taigi en taki: ‘Saide den bakaman fii nai holi a weiti fu a Sabadei?’
25 Ma a piki den taki: ‘Noiti wa leisi san David du di angii be e kii en anga den man fi en noh?
26 A toli fu Abiyatar a fesiman fu den pilisite e soi taki David go aini a osu fu Gadu, a teke den beele di den be poti enke ofaandi gi Gadu, neen en anga den man fi en nyan. Ma a Weiti be e soi taki a den pilisite wawan be sa nyan den beele ya.’
27 Bakadati a taigi den taki: ‘A Sabadei be meke fu yeepi libisama, ma a ná be fu fooseli den.
28 A Manpikin fu libisama na a Masaa fu a Sabadei.’
A maiki
^ Efuso ‘daagi’.
^ Aini Giikitongo den be taki: ‘toon mi bakaman.’
^ Luku a wowtu ‘Faliseiman’ na a pisi ‘San den wowtu ya wani taki.’
^ Luku a wowtu ‘faste’ na a pisi ‘San den wowtu ya wani taki.’
^ Den saka ya be e meke anga metibuba.
^ Wan sowtu sani enke alisi den e kai tarwe.
