Den sani di Malikisi sikiifi 3:1-35
3 Wan taa leisi di Yesesi go aini a snoga, wan man be de ape di be malengii neen ana.
2 Den Faliseiman be de setesete e luku efu Yesesi be o deesi a man na a Sabadei, fu den be sa fende wan sani fu kuutu en.
3 Yesesi taigi a man di be malengii neen ana taki: ‘Opo dai kon taampu a mindii ya.’
4 Bakadati a akisi den taki: ‘A fiti fu du bun efuso fu du ogii a Sabadei? A fiti fu yeepi wan sama efuso fu fika en fu a dede a Sabadei?’ Ma nawan fu den piki en.
5 Ná pikin tyali be kisi en di a si taki den á be e fii gi taawan. Yesesi ati be boon a den. Baka di a luku den, a taigi a man taki: ‘Langa yu ana.’ Faisi a man du a sani ya, en ana kon bun wanten.
6 Di a sani ya pasa, den Faliseiman gwa doose go taki anga den bakaman fu Herodes* fu suku wan fasi fu kii Yesesi.
7 Ma Yesesi anga den bakaman fi en komoto ape go na a ze. Wan gaan kulu sama fu Galileya anga Yudeya be e waka neen baka.
8 Tyaipi sama komoto a Yelusalem, Idumiya, abaase fu Yordaan liba, Tirus anga Sidon kon a Yesesi di den yee den somen sani di a du.
9 A taigi den bakaman fi en fu seeka wan pikin boto gi en fu den sama á toto kon banda en.
10 Fu di a be deesi omen sama meke ala den sama di be abi wan gaan siki be e suku wan fasi fu holi en.
11 Te den sama di be abi takuu yeye a den tapu be si Yesesi, den be e kai a doti neen fesi da den bali taki: ‘A yu na a Manpikin fu Gadu.’
12 Ma Yesesi be e bali den taki den á mu meke sama sabi sama neen.
13 A subi gwa wan mongo tapu, neen a kai wantu fu den bakaman fi en, neen den kon neen.
14 A teke 12 fu den, neen a kai den apostel*. A den wan ya be o de makandaa anga en. A den a be o sende fu go paati a bun nyunsu gi sama.
15 A gi den a makiti fu puu takuu yeye a sama tapu tu.
16 Den 12 apostel di a be teke a be Simon, di a be kai Peitilisi,
17 Yakowbesi a manpikin fu Sebedeyus anga en baala Yohanisi (a be e kai den tu baala ya Bowanerges, dati wani taki: ‘Den Manpikin fu Dondoo.’)
18 Andreyas, Filipus, Bartolomeyus, Mateyesi, Tomas, Yakowbesi a manpikin fu Alfeyus, Tadeyus, Simon fu Kaana,
19 anga Yudas Iskariot di konkuu en bakaten.
20 Bakadati Yesesi go aini wan osu, ma sama booko kon de te, neen nyan seefi en anga den bakaman fi en á be poi nyan.
21 Di den famii fi en yee a sani ya, den go fu teke en puu de, bika den be e taki: ‘En ede nai wooko bun moo.’
22 Den leliman fu a Weiti di komoto a Yelusalem be e taki: ‘Didibii* de neen tapu. Na a tiiman fu den takuu yeye gi en makiti fu puu takuu yeye a sama tapu.’
23 Yesesi kai den kon neen a gi den wantu ageisitoli. A taki: ‘Saatan á poi puu Saatan a sama tapu.
24 Efu den sama aini wan kownukondee e feti anga denseefi, a kownukondee de o booko.
25 Efu den sama aini wan osufamii e feti anga denseefi, a osufamii de o booko.
26 A letiso a de anga Saatan tu. Efu ai feti anga enseefi, aw kaba a soso.
27 Nawan sama poi booko go aini a osu fu wan taanga man, da a teke den sani fi en sondee fu a tei en. A te a tei en fosi aw poi fufuu den sani aini en osu.
28 Biibi mi, Gadu sa gi wan sama paadon winsi sowtu sondu a du, efuso winsi sowtu ogii-ati sani a taki.
29 Ma efu wan sama taki ogii fu a santa yeye, noiti Gadu o gi en paadon.’
30 A be taki a sani ya bika den be e taki: ‘Wan takuu yeye de neen tapu.’
31 En mma anga den baala fi en kon ape. Den be taampu a doose, neen den sende wan sama go kai en.
32 Wan kulu sama be sidon lontu Yesesi. Wan fu den taigi en taki: ‘I mma anga den baala fii e kai yu oo, den de a doose.’
33 Ma a akisi en taki: ‘I sabi sama a mi mma anga den baala fu mi?’
34 A luku den sama di be sidon koosube fi en neen a taki: ‘Luku mma anga mi baala ya.
35 Iniiwan sama di e libi enke fa Gadu wani, a mi baala, mi sisa, anga mma.’
A maiki
^ Luku a wowtu ‘Herodes’ na a pisi ‘San den wowtu ya wani taki.’
^ Luku a wowtu ‘apostel’ na a pisi ‘San den wowtu ya wani taki.’
^ Aini Giikitongo den be taki: ‘Beyelsebub.’ Luku a wowtu ‘Beyelsebub’ na a pisi ‘San den wowtu ya wani taki.’
