Den sani di Malikisi sikiifi 8:1-38
-
Yesesi gi 4000 mannengee nyanyan (1-9)
-
Den be wani Yesesi du wan wonduu (10-13)
-
A sowda fu den Faliseiman anga du fu Herodes (14-21)
-
Yesesi deesi wan beendiman aini Betsaida (22-26)
-
Peitilisi e taki Yesesi na a Kelestesi (27-30)
-
Yesesi taigi den bakaman fi en taki aw dede (31-33)
-
San a wani taki fu de wan bakaman fu Yesesi (34-38)
8 Wan taa leisi baka, wan gaan kulu sama kon a Yesesi. Den á be abi sani fu nyan, neen meke Yesesi kai den bakaman fi en neen a taigi den taki:
2 ‘Tyali fu den sama e kisi mi, bika a dii dei langa den de anga mi ya kaba. Den naabi nawan sani fu nyan moo.
3 Efu mi sende den gwa osu anga angii den naw meke en. Son wan fu den e tan faawe.’
4 Ma den bakaman fi en piki en taki: ‘Pe wo fende nyanyan fu sai den somen sama ya na a faawe peesi ya?’
5 Neen a akisi den taki: ‘Omen beele wi abi?’ Den piki en taki: ‘Seibin.’
6 Yesesi taigi den sama fu sidon a doti neen a teke den seibin beele. Baka di a begi Gadu, a booko den beele neen a gi den bakaman fi en fu paati gi den sama.
7 Den be abi wantu pikin fisi tu. Baka di a gi Gadu daa, a taigi den bakaman fi en fu paati den fisi.
8 Di den sama nyan te den bee fuu, den bakaman fi en piki den pisi beele di be fika, neen den fuu seibin bakisi.
9 A wan sani fu 4000 mannengee be nyan a dei de. Bakadati a sende den sama gwe.
10 Faisi a sende den sama gwe, en anga den bakaman fi en go aini wan boto neen den gwa wan peesi den e kai Dalmanuta*.
11 Di den doo ape, den Faliseiman kon sitee taki anga Yesesi. Den akisi en fu du wan wonduu aini a nen fu Gadu fu di den be wani tesi en.
12 Yesesi hali wan dipi boo neen a taki: ‘Saide den sama fu a ten ya wani mi du wan wonduu? Biibi mi, den naw si nawan wonduu.’
13 Baka di a taki a sani de, en anga den bakaman fi en go aini wan boto, neen den go na abaase.
14 Ma den bakaman fi en be feegete fu tyai beele. A wan beele namo den be abi aini a boto.
15 Yesesi wasikoi den taki: ‘U de na ain, u luku bun anga a sowda* fu den Faliseiman anga a sowda fu Herodes*.’
16 Neen den bigin kwali anga denseefi fu di nawan fu den be denki fu tyai beele.
17 Di Yesesi si a sani ya a taigi den taki: ‘Saide u de ya e kwali fu di wa tyai beele? U nai fusutan ete san mi e taigi u noh? Na a sani ya taanga gi u fu fusutan so?
18 “Wi abi ain, ma u nai si, wi abi yesi ma u nai yee.” U sabi ete
19 di mi be booko den feifi beele gi 5000 mannengee fu nyan? Omen bakisi u be fuu di u piki den pisi beele di be fika?’ Den piki en taki: ‘Twalufu.’
20 ‘Di mi be booko den seibin beele gi 4000 mannengee fu nyan, omen gaan bakisi u be fuu di u piki den pisi beele di be fika?’ Den piki en taki: ‘Seibin.’
21 Neen a taigi den taki: ‘Da te enke now u nai fusutan san a sani ya wani taki ete noh?’
22 Bakadati den doo Betsaida. Sama tyai wan beendiman kon neen, neen den begi en fu deesi a man.
23 A holi a beendiman na ana tyai gwa doose fu a foto. Baka di a poti wataamofu na a man ain, a holi a man neen a akisi en taki: ‘San ye si?’
24 A man luku lontu, neen a taki: ‘A gei mi e si sama, ma den e gei bon di e waka.’
25 A holi a man ain baka, neen a man betee. A be e si kiin now.
26 A sende a man gwe neen a taigi en taki: ‘Ya mu go aini a foto ye.’
27 Yesesi anga den bakaman fi en komoto ape, neen den gwa den foto fu Sesareya Filipi. Di den de a pasi, a akisi den taki: ‘Sama den sama e taki a mi?’
28 Den taigi en taki: ‘Son sama e taki ya Yohanisi a Dopuman, ma taawan e taki ya Eliya, taawan baka e taki ya wan fu den polofeiti.’
29 Neen a akisi den taki: ‘Ma sama we denki a mi?’ Peitilisi piki en taki: ‘I na a Kelestesi.’
30 Neen a taigi den taki den á mu taigi nawan sama, sama neen.
31 A bigin leli den taki sama o pina a Manpikin fu libisama. Den gaanwan fu a foluku, den leliman fu a Weiti, anga den fesiman fu den pilisite o buuse en. Den o kii en, ma baka dii dei aw kon a libi baka.
32 A taki kiin anga den, ma Peitilisi tyai en gwa wanse neen a puu kaasi gi en fu di a taki a sani de.
33 Yesesi daai luku den bakaman fi en, neen a bali Peitilisi taki: ‘Gwe komoto ya Saatan, bika i nai denki enke fa Gadu e denki, ma ye denki enke fa libisama e denki.’
34 A kai den bakaman fi en anga den sama di be de ape, neen a taigi den taki: ‘Efu wan sama wani toon mi bakaman, aa mu teli enseefi moo, ma a mu teke en pina ponsu* da a tan waka a mi baka.
35 Bika a sama di wani kibii en libi, o lasi en, ma a sama di lasi en libi fu mi ede, efuso fu di ai paati a bun nyunsu, o fende en.
36 Sowtu wini a abi efu wan sama fende ala den sani di de a goontapu, ma a lasi en libi?
37 San wan sama sa gi fu man kibii en libi?
38 Den sama fu a ten ya e du omen sondu, den daai baka gi Gadu. Efu wan sama e sen gi mi efuso den sani di mi e taki, da te a Manpikin fu libisama o kon anga a kaakiti fu Gadu anga den santa engel fi en, sen o kisi en tu fu taki a sama de neen bakaman.’
A maiki
^ A gei enke disi a wan taa nen fu Magadan. Luku Mat. 15:39.
^ Luku a wowtu ‘sowda’ na a pisi ‘San den wowtu ya wani taki.’
^ Efuso ‘du fu den bakaman fu Herodes’.
^ Luku den wowtu ‘pina ponsu’ na a pisi ‘San den wowtu ya wani taki.’