Den sani di Mateyesi sikiifi 1:1-25
1 Disi na a buku di e taki fu a libi fu Yesesi Kelestesi*, wan bakapikin fu David, anga wan bakapikin fu Abalaham.
2 Abalaham meke Isaki,Isaki meke Yakopu,neen Yakopu meke Yuda anga den baala fi en.
3 Den manpikin fu Yuda anga Tamar,a be Peres anga Sera. Peres meke Hesron,neen Hesron meke Ram.
4 Ram meke Aminadab,Aminadab meke Naheson,neen Naheson meke Salmon.
5 Salmon anga Rakab meke Bowas,Bowas anga Rut meke Obed,neen Obed meke Isai.
6 Isai meke Kownu David,
neen David meke Salomo. Salomo mma a be a uman fu Uriya.
7 Salomo meke Rehabeyam,Rehabeyam meke Abiya,neen Abiya meke Asa.
8 Asa meke Yosafat,Yosafat meke Yoram,neen Yoram meke Usiya.
9 Usiya meke Yotam,Yotam meke Akas,neen Akas meke Heskiya.
10 Heskiya meke Manase,Manase meke Amon,neen Amon meke Yosiya.
11 Yosiya meke Yekoniya anga den baala fi en na a pisiten di sama tyai den Dyu go a katibo a Babilon.
12 Yekoniya meke Seyaltiyel aini Babilon,neen Seyaltiyel meke Serubabel.
13 Serubabel meke Abihud,Abihud meke Eliyakim,neen Eliyakim meke Asor.
14 Asor meke Sadok,Sadok meke Akim,neen Akim meke Elihud.
15 Elihud meke Eliyasar,Eliyasar meke Matan,neen Matan meke Yakopu.
16 Yakopu meke Yowsefu, a man fu Maliya. Maliya a be a mma fu Yesesi, a Kelestesi.
17 Fanafu a ten fu Abalaham te enke a ten fu David, i be abi 14 bakapikin. Fanafu a ten fu David te enke a ten di den tyai den Dyu go a Babilon, i be abi 14 bakapikin. Fanafu a ten di den Dyu go a Babilon te enke a ten fu Kelestesi, i be abi 14 bakapikin.
18 Maliya anga Yowsefu be abi mofu fu toow, fosi Yesesi Kelestesi meke. Ma fosi den toow, a santa yeye be meke Maliya kon de anga bee.
19 Ma Yowsefu, a man fu Maliya a be wan bun man, neen meke aa be wani paati a taki. A be wani fika Maliya sondee taa sama sabi, bika aa be wani gi en sen.
20 Ma baka di Yowsefu pakisei fu du a sani ya, wan engel fu Yehofa* kon neen aini wan deen. A taigi en taki: ‘Yowsefu, manpikin fu David, ná feele fu tyai yu uman Maliya go a osu. Bika na a santa yeye meke a de anga bee.
21 Aw meke wan manpikin, dai mu kai en Yesesi. Bika aw meke sama fii fu sondu.’
22 Ala den sani ya pasa leti enke fa Yehofa be meke wan fu den polofeiti fi en taki. A be taki:
23 ‘Wan yonkuu-uman di á siibi anga man ete o de anga bee. Aw meke wan manpikin, di den o kai Imanuwel.’ A nen ya wani taki: ‘Gadu de anga u.’
24 Di Yowsefu weki a siibi, a du san a engel fu Yehofa taigi en. Neen a teke en uman Maliya poti a osu.
25 Ma aa siibi anga Maliya fosi a pikin meke. Di a pikin meke, Yowsefu kai en Yesesi.
A maiki
^ Luku a wowtu ‘Kelestesi’ na a pisi ‘San den wowtu ya wani taki.’
^ A nen Yehofa sikiifi 237 leisi aini a vertaling ya fu den Kelesten Giiki buku fu Beibel. Disi na a fosi peesi pe a sikiifi. Luku a wowtu ‘Yehofa’ na a pisi ‘San den wowtu ya wani taki.’
