Den sani di Mateyesi sikiifi 10:1-42
10 Yesesi kai den 12 bakaman fi en, neen a gi den a makiti fu puu takuu yeye a sama tapu. A gi den a makiti tu fu deesi iniiwan siki di sama be abi.
2 Den nen fu den 12 apostel a be: Simon di sama be sabi enke Peitilisi, anga en baala Andreyas. Yakowbesi a manpikin fu Sebedeyus, anga en baala Yohanisi.
3 Filipus anga Bartolomeyus, Tomasi, anga Mateyesi di be e piki lantimoni. Tadeyus, anga Yakowbesi a manpikin fu Alfeyus.
4 Simon fu Kaana, anga Yudas Iskariot di be konkuu Yesesi bakaten.
5 Yesesi sende den 12 man ya go peleiki, neen a taigi den taki: ‘Wa mu go na a pisi fu den taa kondee sama. Wa mu gwa nawan fu den foto fu Samaria tu.
6 A den lasi sikapu fu Islayeli wawan u mu go.
7 Te u go, u mu paati a bosikopu taki: “A Kownukondee fu hemel koosube.”
8 U deesi den sama di siki, u weki den sama di dede, u deesi ala den gwasiman, u mu puu takuu yeye a sama tapu. U fende fu soso, daw mu gi fu soso tu.
9 Wa mu poti gowtu, solufu, efuso kopoo aini u monisaka.
10 Wa mu lai nyanyan a saka tyai. Wa mu tyai moo enke wan koosi efuso susu. Wa mu tyai moo enke wan wakatiki tu. Bika a wookoman fiti fu fende en nyanyan.
11 Winsi sowtu foto efuso kondee u go, suku den sama di fiti fu yee a bosikopu, daw tan anga den te enke a yuu doo fu u gwe.
12 Gi den sama odi te u go aini den osu.
13 Den o fende wini efu den bali wadaa gi u. Ma efu den á bali wadaa gi u, den naw fende nawan wini.
14 Efu wan sama á wani aliki u efuso holi u neen osu, da naki a doti puu aw futu te we komoto aini a osu efuso a foto de.
15 Fu tuu mi e taigi u taki, a sani di o miti a foto ya na a dei di Gadu o kuutu libisama, o ogii moo a sani di be miti Sodom anga Gomora.
16 Fa mi e sende u go ya, wo de enke sikapu a busidagu mindii. Neen meke u mu konikoni enke sineki, ma u mu de enke doifi di nai du ogii.
17 U mu luku bun, bika sama o tyai u gwa kuutu, den o wipi u aini den snoga fu den.
18 Den o tyai u gwa tiiman anga kownu fesi fu mi ede. Da wo taigi den anga den taa kondee sama san we biibi.
19 Ma te den o tyai u gwa kuutu, wa mu booko wi ede anga san wo taki. Di a yuu o doo wo sabi saw mu taki.
20 A naw wawan o de, bika a yeye fu u Dda di de a hemel o yeepi u fu sabi saw mu taki.
21 Baala o meke den kii baala, dda o meke den kii pikin, pikin o libi ogii anga den mma anga den dda te da den meke sama kii den.
22 Sama o buuse u fu mi nen ede. Ma a sama di holidoo te na a kaba o fende libi.
23 Efu den libi ogii anga u aini wan foto, u mu lowe gwa wan taa foto. Bika mi e taigi u taki u naw poi kaba a wooko na ala den foto fu Islayeli fosi a Manpikin fu libisama doo.
24 Wan sama di e teke leli á bigi moo en leliman. Wan saafu á hei moo en masaa.
25 Wan sama mu teke en fu bigi taki a de enke en leliman. Wan saafu mu teke en fu bigi taki a sa de enke en basi. Efu den e kai a sama di abi a osu Beyelsebub*, da faw denki den o kai den taa sama di e tan aini a osu?
26 Neen meke wa mu feele den. Bika nawan sani o kibii te, da aa kon a kiin. Ala kibiitoli o kon a kiin wan dei.
27 Den sani di mi e taigi u di mi anga u wawan de, a den u mu taigi sama. Den sani di mi e taigi u saafi, a den u mu meke ala sama yee.
28 Wa mu feele den sama di wani kii u, ma di á poi meke u fende a libi. Na a sama di poi kii wi aini Gehena u mu feele.
29 Sama e seli tu pikin foo gi wan tii sensi, ná so noh? Tokuso nawan fu den foo ya e kai a doti sondee fu u Dda di de a hemel sabi.
30 Ala den uwii di de a wi ede seefi a teli.
31 Neen meke wa mu booko wi ede, bika u pelensipali moo tyaipi pikin foo.
32 Ala sama di taki a taawan fesi taki a sabi mi, miseefi o taki a mi Dda di de a hemel fesi taki mi sabi en.
33 Ma efu wan sama e taki a taawan fesi taki aa sabi mi, da a Manpikin fu libisama o taki a den engel anga Gadu fesi taki aa sabi en tu.
34 Wa mu denki taki mi kon a goontapu fu meke sama libi na a wan. Ma mi kon anga wan fetihow fu poli sama anga sama.
35 Bika mi kon fu poli wan man anga en dda, wan umanpikin anga en mma, anga wan uman anga en main.
36 Den feyanti fu wan sama o de en eigi famii.
37 Iniiwan sama di lobi en dda, en mma, efuso en pikin moo mi á fiti fu de mi bakaman.
38 Wan sama á fiti fu de mi bakaman efu aa wani teke en pina ponsu* da a waka a mi baka.
39 Bika a sama di wani kibii en libi, o dede. Ma a sama di lasi en libi fu mi ede o fende en.
40 Iniiwan sama di e bali wadaa gi u, bali wadaa gi mi tu. A sama di e bali wadaa gi mi, e bali wadaa tu gi a sama di sende mi.
41 Gadu e belesi den polofeiti anga den sama di e dini en. Fu di den e dini Gadu, meke aw belesi iniiwan sama di e bali wadaa gi den.
42 Mi e taigi u taki, iniiwan sama di e gi wan fu den mofinawan ya wan kan koo wataa fu diingi fu di en a mi bakaman, o fende en pai.’
A maiki
^ Luku a wowtu ‘Beyelsebub’ na a pisi ‘San den wowtu ya wani taki.’
^ Efuso ‘nyan pina fu mi ede’.
