Den sani di Mateyesi sikiifi 11:1-30
11 Di Yesesi kaba taigi den 12 bakaman fi en san den mu du, a go paati a bun nyunsu a den taa foto. A be e leli den sama tu.
2 Yohanisi a Dopuman be de a sitaafu-osu di a yee den sani di Kelestesi e du. Neen meke a sende den bakaman fi en go akisi en taki:
3 ‘A yu na a sama di be mu kon, efuso wan taa sama o kon ai baka?’
4 Neen Yesesi piki den taki: ‘U go taigi Yohanisi saw si anga saw yee.
5 U taigi en taki: den sama di be beendi e si, den sama di be malengii e waka, den gwasiman kon betee, den sama di be dofu e yee, dedesama e kon a libi baka, den pootiman seefi e yee a bun nyunsu.
6 Koloku fu a sama di nai meke en biibi kon swaki fu mi ede.’
7 Baka di den bakaman fu Yohanisi gwe, Yesesi bigin taki fu Yohanisi. A akisi den sama taki: ‘Sama na a man di u be si aini a sabana? A wan sama di de enke kamaluwa di winta e wai go kon enke fa a wani?
8 Sama neen? A wan man di be wei moin koosi? Nono, bika den sama di e wei moin koosi, aini kownu osu den e tan.
9 Da sama na a man ya? A wan polofeiti? Eeye, a man ya a moo enke wan polofeiti seefi.
10 Na a sama ya Gadu be e taki, di a meke en polofeiti sikiifi taki: “Luku, mio sende mi bosikopuman go ai fesi fu seeka a pasi gii.”
11 Biibi mi, fu ala den sama di umansama meke, nawan á de di bigi moo Yohanisi a Dopuman. Tokuso a moo pikinwan aini a Kownukondee fu hemel seefi bigi moo en.
12 Fanafu a ten fu Yohanisi a Dopuman te enke now, a omen sama e meke moiti fu go aini a Kownukondee fu hemel. Ma a den sama di nai gi abaa, e go aini.
13 Den Polofeiti anga a Weiti be taki kaba saw pasa te enke Yohanisi doo.
14 A fika gi u efu u wani biibi. Ma neen na a “Eliya di den polofeiti be taki o kon”.
15 Meke sama di abi yesi aliki bun.
16 Anga sama mi sa maiki den sama fu a ten ya? Den de enke yonkuu-pikin di sidon a wowoyo e kai taa pikin.
17 Den taigi den taki: “U boo tutu gi u, ma wa dansi. U singi tyali singi, tokuso tyali á kisi u.”
18 Di Yohanisi kon aa be e nyan diingi enke taa sama, tokuso sama be e taki: “A takuu yeye de neen tapu.”
19 Di a Manpikin fu libisama kon, a be e nyan, a be e diingi, tokuso sama e taki: “Ai nyan pasa peesi, en a wan sopiman, ai paa anga sama di e piki lantimoni anga sama di e libi wan sondu libi.” A den sani di wan sama e du e soi taki a koni.’
20 Den sama aini den foto pe a be du den moo gaan wonduu á be daai den libi. Neen meke Yesesi puu kaasi gi den. A taigi den taki:
21 ‘Heelu fii Korasin, heelu fii Betsaida, bika efu aini Tirus anga Sidon mi be du den gaan wonduu di mi du aini u foto, da den sama ya be o daai den libi. Den be o wei koosi di sama e wei te den e tyali da den sidon aini asisi.
22 Ma mi e taigi u taki a sitaafu di wo fende na a dei di Gadu o kuutu sama, o ibi moo du fu Tirus anga Sidon.
23 Kaperna-um, u dati denki taki wo gwa hemel? Noiti, a geebi wo go. Bika efu a den sama fu Sodom be si den gaan wonduu di u si, da a foto ya be o de ete te enke a dei fu tide.
24 Ma mi e taigi u taki a sitaafu di wo fende na a dei di Gadu o kuutu sama, o ibi moo du fu Sodom.’
25 Bakadati Yesesi taki: ‘Nda, Masaa fu hemel anga goontapu, mi e gafa i na ala sama fesi ye. Bika i kibii den sani ya gi den koniman anga den sabiman, ma i tyai den kon a kiin gi pikinnengee.
26 Eeye Nda, bika a so i wani sani waka.
27 Nda poti ala sani aini mi ana. A wan kodo sama di sabi a Manpikin tuutuu na a Dda. A wan kodo sama di sabi a Dda tuutuu na a Manpikin, anga iniiwan sama di a Manpikin gi a gaandi fu sabi a Dda.
28 Den sama di weli anga den sama di e tyotyo fu di we sow ibi lai, u kon a mi da mio gi u kaakiti.
29 U teke mi tyatyali*, daw luku san mi e du. Da wo fende kaakiti baka, bika mi ati safu, mi abi sakafasi,
30 a tyatyali fu mi feke, a lai di mio gi u fu tyai ná ibi tu.’
A maiki
^ A ná a tyatyali di u sabi, ma a be wan pisi udu di sama be e poti a den sikoo fu sow ibi sani.
