Den sani di Mateyesi sikiifi 14:1-36
14 A ten de, Herodes, a Gaanman fu Galileya yee den sani di Yesesi be e du.
2 Neen a taigi den futuboi fi en taki: ‘A man ya a Yohanisi a Dopuman. A weki baka, neen meke a poi du den gaan wonduu ya.’
3 Fosi, Herodiyas a be a uman fu Filipus. Filipus a be Herodes gaan baala. Herodes be meke sama kisi Yohanisi poti a sitaafu-osu fi en uman Herodiyas ede.
4 Bika a omen leisi Yohanisi be taigi en taki: ‘Aa bun taki ye libi anga a uman ya.’
5 Winsi fa a be wani kii Yohanisi, a be e feele den sama, bika den be e si Yohanisi enke wan polofeiti.
6 Ma di Herodes fuuyali, a holi wan gaan fesa. A umanpikin fu Herodiyas dansi gi den sama di be kon na a fesa. A sani switi gi Herodes te,
7 neen a sweli taki aw gi en iniiwan sani di a akisi en.
8 En mma taigi en san a mu akisi. Neen meke a taki: ‘Gi mi a ede fu Yohanisi a Dopuman a wan peeti tapu.’
9 Winsi fa Kownu Herodes á be lobi a sani ya, tokuso a du a sani di a meisyo akisi en, bika a be sweli a omen sama fesi.
10 Neen meke a sende sama fu go doo Yohanisi ede a sitaafu-osu.
11 Den tyai a ede fu Yohanisi a wan peeti tapu kon gi a meisyo, neen a tyai en go gi en mma.
12 Den bakaman fu Yohanisi kon teke a dedesikin fi en tyai go beli. Bakadati den go taigi Yesesi san pasa.
13 Di Yesesi yee san pasa, a teke boto gwa wan koo peesi fu a be sa de en wawan. Ma di den sama yee taki ai gwe, den komoto aini den foto neen den waka neen baka.
14 Di a komoto aini a boto, a si wan gaan kulu sama. Tyali fu den kisi en, neen a deesi ala den sama di be siki.
15 Ma di neti koosube, den bakaman fi en kon neen, neen den taigi en taki: ‘A wan faawe peesi u de, anga ala a yuu kon gwe kaba. Sende den sama gwe fu den sa go bai sani fu nyan a den foto di de koosube.’
16 Neen Yesesi piki den taki: ‘Aa de fu den gwe, u gi den sani fu nyan.’
17 Ma den piki en taki: ‘A feifi beele anga tu fisi namo wi abi.’
18 Neen Yesesi piki den taki: ‘U tyai den kon gi mi.’
19 A meke den sama go sidon aini a gaasi, a teke den feifi beele anga den tu fisi, a luku gwa tapu, neen a begi Gadu. Bakadati a booko den beele gi den bakaman fi en, neen den paati gi den sama.
20 Ala den sama nyan te den bee fuu. Di den bakaman fi en piki ala den pisi beele di be fika, den fuu 12 bakisi.
21 A wan sani fu 5000 mannengee be nyan. Den á be teli den uman anga den pikinnengee.
22 Bakadati a sende den bakaman fi en fu go teke a boto fu go na abaase. Ma a fika a baka fu sende den sama gwe.
23 Di a sende den sama gwe, en wawan subi gwa wan mongo-ede fu begi. Di neti tapu, en wawan be de ape ete.
24 Ma a ten de, a boto be de te a mindii wataa. Den bakaman fi en be e feti fu tii a boto, bika den koko balon fu a ze anga a winta be e wai den e go kon.
25 A musude, Yesesi bigin waka na a wataa tapu go miti den.
26 Ma di den si ai waka na a wataa tapu, den bakaman fi en buuya te neen den taki: ‘San na a sani di e kon de?’ Neen den bigin bali bika den be e feele.
27 Ma wantenwanten Yesesi bali taigi den taki: ‘Wa feele, a mi de ya.’
28 Neen Peitilisi taigi en taki: ‘Masaa, efu ai de ape tuu, da meke mi waka na a wataa tapu kon miti i osi.’
29 Neen a piki en taki: ‘Kon!’ Peitilisi saka komoto aini a boto, neen a bigin waka na a wataa tapu gwa Yesesi.
30 Ma di a si fa a winta e wai taanga, a feele. Di a bigin saka gwa ondoo, a bali taki: ‘Masaa yeepi mi baa!’
31 Yesesi langa ana kisi en wanten neen a taki: ‘Saide i nai biibi sai? San meke i bigin feele du?’
32 Baka di den go aini a boto, a gaan winta koo pii.
33 Den bakaman fi en di be de aini a boto saka anga kini gi en gaandi, neen den taki: ‘Ya Gadu Manpikin tuu.’
34 Den abaa go doo wan peesi den e kai Geneisaret.
35 Di den sama fu ape fusutan taki Yesesi kon de, den sende bosikopu gi den sama na a hii pisi de. Neen den tyai ala den sama di be siki kon neen.
36 Den sama di be siki be e begi Yesesi fu den sa holi a koosi mofu fi en. Ala den sama di be holi en koosi mofu kon betee.
