Den sani di Mateyesi sikiifi 15:1-39
15 Wantu Faliseiman anga leliman fu a Weiti be komoto a Yelusalem kon a Yesesi, neen den akisi en taki:
2 ‘Saide den bakaman fii nai holi den weiti fu den gaansama fu u? Den nai wasi den ana enke fa den mu wasi en te den e go nyan.’
3 Ma Yesesi piki den taki: ‘Saide we poti den weiti fu Gadu a wanse, fu di u wani du sani enke den gaansama fu u?
4 Gadu taki: “I mu lesipeki i mma anga i dda.” A taki: “Den mu kii iniiwan sama di e kosi en mma efuso en dda.”
5 Ma we leli den wan taa sani. Te wan sama taigi en mma anga en dda taki: “Mia poi yeepi i, bika mi paamisi Gadu taki mio gi en ala den sani di mi abi,”
6 da we taigi en taki aa de fu a yeepi en mma anga en dda tuu. A so we poti a wowtu fu Gadu a wanse, da we du sani enke fa den gaansama fu u gwenti.
7 U bidiigiman! Yesaya be abi leti di a be taki:
8 “Den sama ya e gafa mi anga den mofu, ma den ati de faawe fu mi.
9 A sosokaali den e dini mi, bika a den weiti fu libisama den e leli taawan.”’
10 Bakadati a kai den sama di be de ape kon, neen a taigi den taki: ‘Wi aliki, daw meke moiti fu fusutan san mio taigi u:
11 A ná den sani di wan sama e nyan e tyobo en, ma a den sani di ai taki e tyobo en.’
12 Neen den bakaman fi en kon taigi en taki: ‘I sabi taki den Faliseiman ati boon di den yee sai taki?’
13 Ma a piki den taki: ‘Nda di de a hemel o hali iniiwan bon di aa paandi puu.
14 U fika den! Den e soi taawan a pasi, ma denseefi beendi. Efu wan beendiman e tyai wan beendiman, a den tu man o kai go aini wan gaan olo.’
15 Peitilisi akisi Yesesi taki: ‘I sa taigi u san a ageisitoli wani taki?’
16 Neen a taki: ‘Useefi nai fusutan mi ete noh?
17 Wa sabi taki ala san wan sama e nyan e go aini en bee, da baka wan pisiten ai komoto baka noh?
18 Ma a san de aini wan sama ati, a dati e komoto aini en mofu. A den sani ya e meke aa kiin.
19 Den sani di e komoto aini wan sama ati a takuu pakisei, kii taawan, wakalibi, hululibi*, fufuu, lei, anga a taki di sama e taki ogii fu Gadu efuso taa sama.
20 A den sani ya e meke wan sama á kiin, ma a ná te aa wasi en ana fosi a nyan.’
21 Di Yesesi komoto de, a go na a se fu Tirus anga Sidon.
22 Di den doo de, wan Finisiya uman waka kon a den, neen a begi en taki: ‘Masaa, Manpikin fu David, soi tyali-ati gi mi baa! Wan takuu yeye e kii a meisyo fu mi anga fooseli.’
23 Ma aa piki a uman, neen meke den bakaman fi en taigi en taki: ‘Sende en gwe baa, bika senten neen ai waka aw baka e begi i fu yeepi en.’
24 Neen Yesesi taki: ‘A den sama fu Islayeli wawan di de enke sikapu di naabi sikapuman Gadu sende mi kon.’
25 Ma a uman sutu kini a doti neen a taki: ‘Masaa, yeepi mi baa.’
26 Ma a piki en taki: ‘Aa bun fu mi teke a beele fu den pikin, da mi iti en gi den pikin dagu.’
27 Ma a uman piki en taki: ‘A tuu Masaa, ma toku den pikin dagu e nyan den sakasaka di e kai komoto na a tafaa fu a masaa fu den.’
28 Neen Yesesi piki a uman taki: ‘I biibi taanga tuu, meke sani pasa enke fai wani.’ Di a taki a sani ya, a meisyo fu a uman betee wanten.
29 Di Yesesi komoto de, a go koosube fu a ze fu Galileya, neen a subi go sidon a wan mongo.
30 Neen tyaipi sama booko kon neen. Den tyai sama di be lan, sama di be malengii, beendiman, babawman, anga sama di be abi taa sowtu siki kon a Yesesi, neen a deesi ala den.
31 Den sama foondoo di den si taki babawman e taki, sama di be malengii betee, lanman e waka, beendiman e si. Neen den gafa a Gadu fu Islayeli.
32 Yesesi kai den bakaman fi en neen a taigi den taki: ‘Tyali fu den sama e kisi mi, bika a dii dei langa den de anga mi ya kaba. Den naabi nawan sani fu nyan moo. Mia wani den gwe anga angii, bika falanfalan sa naki den a pasi.’
33 Ma den bakaman fi en akisi en taki: ‘Pe wo fende beele gi den somen sama ya na a faawe peesi ya?’
34 Neen Yesesi akisi den taki: ‘Omen beele wi abi?’ Den piki en taki: ‘Wi abi seibin beele anga wantu pikin fisi.’
35 Baka di a taigi den sama fu go sidon a doti,
36 a teke den seibin beele anga den fisi, neen a begi Gadu. Bakadati a booko den beele anga den fisi, neen a gi den bakaman fi en, neen den paati gi den sama.
37 Ala den sama nyan te den bee fuu. Di den bakaman fi en piki den pisi beele di be fika, den fuu seibin bakisi.
38 Ala anga ala a 4000 mannengee be nyan. Den á be teli den uman anga den pikin.
39 Baka di a sende den sama gwe, a go aini wan boto, neen a go na a pisi fu Magadan.
A maiki
^ Luku a wowtu ‘hululibi’ na a pisi ‘San den wowtu ya wani taki.’
