Den sani di Mateyesi sikiifi 16:1-28
16 Neen den Faliseiman anga den Saduseiman* kon akisi en fu du wan wonduu aini a nen fu Gadu fu di den be wani tesi en.
2 Ma a piki den taki: ‘Te a san e saka te u si tapu lebi, da we taki: “Alen naw kai tamaa.”
3 Ma mamanten te u si tapu lebi, te a peesi dunguu, da we taki: “Alen o kai tide.” U sabi fa a dei o waka te u luku tapu, toku wa poi fusutan san den sani di e pasa nownow wani taki.
4 Den ogii-ati sama fu a ten ya di daai baka gi Gadu wani si wonduu fosi den biibi. Ma den naw si nawan taa wonduu moo enke a sani di be pasa anga Yona.’ Di a taki den sani ya, a gwe fika den de.
5 Bakadati den bakaman fu Yesesi go na abaase, ma den be feegete fu tyai beele.
6 Yesesi taigi den taki: ‘U de na ain, u luku bun anga a sowda fu den Faliseiman anga den Saduseiman.’
7 Neen den bigin taigi denseefi taki: ‘Ma wa tyai beele kon ya.’
8 Di Yesesi fusutan den, a akisi den taki: ‘Saide meke we taki u naabi beele? Saide u biibi swaki so?
9 U nai fusutan ete san mi e taki noh? U feegete den feifi beele di 5000 mannengee be nyan, anga omen bakisi u be fuu anga a beele di be fika?
10 U feegete den seibin beele tu, di 4000 mannengee be nyan, anga omen gaan bakisi u be fuu anga san be fika?
11 Fa a du kon taki u nai fusutan taki a ná a sowda di den e poti aini beele mi e taki? Anga a sowda fu den Faliseiman anga den Saduseiman u mu luku bun.’
12 A so den fusutan taki a ná a sowda di den e poti aini beele ai taki, ma a den leli fu den Faliseiman anga den Saduseiman a be e taki.
13 Di Yesesi doo na a pisi fu Sesareya Filipi, a akisi den bakaman fi en taki: ‘Sama den e taki na a Manpikin fu libisama?’
14 Den piki en taki: ‘Son sama e taki ya Yohanisi a Dopuman, taawan e taki ya Eliya, taawan baka e taki ya Yelemiya, efuso wan fu den polofeiti.’
15 Neen a akisi den taki: ‘Daw noh? Sama we denki a mi?’
16 Simon Peitilisi piki en taki: ‘I na a Kelestesi, a Manpikin fu a libilibi Gadu.’
17 Neen Yesesi taki: ‘Koloku fii Simon, manpikin fu Yona. Bika a ná libisama meke i kon sabi a sani ya, ma a Nda di de a hemel meke i kon sabi a sani ya.
18 Mi e taigi i tu taki: Yu a Peitilisi. Na a gaan siton ya tapu mio sete mi kemeente. Dede seefi naw poi wini en.
19 Mio gii den sooto fu a Kownukondee fu hemel. San yo tei a goontapu, o de teitei a hemel kaba. San yo losi a goontapu, losi a hemel kaba.’
20 Neen a wasikoi den bakaman fi en taki den á mu taigi nawan sama taki neen na a Kelestesi.
21 Fanafu a ten de, Yesesi bigin taigi den bakaman fi en taki a mu gwa Yelusalem. A taigi den tu taki den gaanwan fu a foto, den fesiman fu den pilisite, anga den leliman fu a Weiti o pina en da den kii en. Ma Gadu o weki en baka na a du fu dii dei.
22 Neen Peitilisi tyai en gwa wanse go puu kaasi gi en. A taigi en taki: ‘Masaa, ya mu taki a sani de, den sani de naw miti i seefiseefi.’
23 Ma Yesesi daai gi baka gwa Peitilisi neen a taki: ‘Gwe komoto ya Saatan! I wani tapu mi fu du san Gadu wani, bika i nai denki enke fa ai denki, ma ye denki enke fa libisama e denki.’
24 Neen Yesesi taigi den bakaman fi en taki: ‘Efu wan sama wani waka a mi baka, aa mu teli enseefi moo, ma a mu teke en pina ponsu* da a tan waka a mi baka.
25 Bika a sama di wani kibii en libi, o lasi en libi, ma a sama di lasi en libi fu mi ede o fende en.
26 Sowtu wini a abi efu wan sama fende ala den sani fu goontapu, ma a lasi en libi? Efuso san wan sama sa gi fu man kibii en libi?
27 A Manpikin fu libisama o kon anga a kaakiti fi en Dda. Aw kon makandaa anga den engel fi en, da aw kuutu ibiiwan sama fu den sani di a du.
28 Biibi mi, son wan fu den sama di de ya naw dede fosi den si a Manpikin fu libisama kon aini a Kownukondee fi en.’
A maiki
^ Luku a wowtu ‘Saduseiman’ na a pisi ‘San den wowtu ya wani taki.’
^ Luku den wowtu ‘pina ponsu’ na a pisi ‘San den wowtu ya wani taki.’
