Den sani di Mateyesi sikiifi 19:1-30
19 Di Yesesi kaba taki den sani ya, a komoto a Galileya neen a go na a pisi fu Yudeya di de na abaase fu Yordaan liba.
2 Wan gaan kulu sama waka neen baka, neen a deesi ala den sama di be siki.
3 Den Faliseiman be wani tesi en, neen meke den kon akisi en taki: ‘Wan man sa booko toow anga en uman fu iniiwan sani?’
4 A piki den taki: ‘Wa leisi aini a wowtu fu Gadu taki a sama di meke den na a bigin, meke den enke man anga uman noh?
5 A be taki: “Neen meke wan man o gwe fika en mma anga en dda. Aw de anga en uman, da den tu man o toon wan sikin.”
6 Den naw de tu sikin moo, ma wan sikin. Neen meke nawan sama mu paati san Gadu tyai kon a wan.’
7 Neen den akisi en taki: ‘Da saide Mosesi taki wan man mu gi en uman wan pampila di e soi taki a toow booko efu aa wani en moo?’
8 Yesesi piki den taki: ‘A di u nai teke taki meke Mosesi gi u pasi fu booko toow anga wi uman. Ma a ná so sani be de di Gadu be meke a fosi man anga uman.
9 Ma mi e taigi u taki efu wan man booko toow anga en uman sondee fu a uman du ogii neen osu, neen a toow anga wan taa uman, da a waka a waka gi en uman.’
10 Den bakaman fi en taigi en taki: ‘Efu a so a toowlibi de, da a moo betee sama á toow.’
11 Yesesi piki den taki: ‘A ná ala sama poi du a sani ya. A den sama di Gadu gi a okasi wawan poi du a sani ya.
12 Son mannengee nai toow, bika den meke anga wan mankei a den senpeesi. Son wan á toow, bika sama gi den mankei a den senpeesi. Taawan á toow, bika den wani du moo gi a Kownukondee fu hemel. Efu wan sama wani tan sondee fu toow, da meke a tan so.’
13 Bakadati sama tyai wantu pikinnengee kon a Yesesi fu a belesi den*, da a begi gi den. Ma den bakaman fi en bali den sama.
14 Yesesi taigi den taki: ‘U fika den pikin meke den kon a mi, wa mu tapu den, bika a den sama di de enke den pikin ya o fende a Kownukondee fu hemel.’
15 A belesi den pikin, neen a komoto ape.
16 Bakadati, wan yonkuman kon neen, neen a akisi en taki: ‘Leliman, sowtu bun mi mu du fu mi sa fende teego libi?’
17 Yesesi taigi en taki: ‘Saide ye akisi mi sowtu bun i mu du? A wan sama namo abi a leti fu taki san bun. Ma efii wani fende teego libi, dai mu e du san a Weiti e taki ala yuu.’
18 Neen a akisi en taki: ‘On di fu den weiti mi mu holi?’ Yesesi piki en taki: ‘Ya mu kii sama, ya mu libi wan wakalibi, ya mu fufuu, ya mu lei gi taawan,
19 lesipeki i mma anga i dda, i mu lobi taa sama enke fai lobi iseefi.’
20 A man taigi en taki: ‘Mi e du ala den sani ya kaba. San mi mu du ete?’
21 Yesesi piki en taki: ‘Efii wani de sondee fowtu, go seli ala den sani di yu abi, paati a moni gi den pootiman, da yo fende wan gudu a hemel. Tei kaba dai kon toon mi bakaman.’
22 Di a man yee a sani ya, a daai gwe tyokoo*, bika a be abi tyaipi gudu.
23 Neen Yesesi taigi den bakaman fi en taki: ‘Biibi mi, aw taanga gi wan guduman fu go aini a Kownukondee fu hemel.
24 Mi e taigi u taki aw moo makiliki gi wan kameili fu pasa a wan nanain-olo, moo enke gi wan guduman fu go aini a Kownukondee fu hemel.’
25 Ná pikin foondoo den bakaman fi en foondoo di den yee a sani ya. Den taki: ‘Da sama sa fende a teego libi seefi?’
26 Yesesi luku den duun neen a taigi den taki: ‘Libisama e si enke a sani ya á poi, ma Gadu poi du ala sani.’
27 Neen Peitilisi taigi en taki: ‘U gwe fika ala saw be abi, neen u kon waka ai baka. San wo fende?’
28 Yesesi taigi den taki: ‘Biibi mi, di ala sani o kon bun baka, te a Manpikin fu libisama o sidon na a gaan kownusutuu fi en, da wi di be waka a mi baka, o sidon a 12 kownusutuu fu kuutu den 12 lo fu Islayeli.
29 Iniiwan sama di gwe fika en osu, en baala, en sisa, en dda, en mma, en pikin anga en goon fu di a toon mi bakaman, o fende den sani ya 100 toon baka. Aw fende teego libi tu.
30 A omen fu den fosiwan o toon lasitiwan, da omen fu den lasitiwan o toon fosiwan.
