Den sani di Mateyesi sikiifi 2:1-23
2 Yesesi meke a Betlehem aini Yudeya na a ten di Herodes be e tii enke kownu. Bakaten, wantu man di e luku den sitali* fu sabi saw pasa, be kon a Yelusalem. Den be komoto na a se pe a san e opo.
2 Di den doo, den akisi taki: ‘Pe a pikin di o toon kownu fu den Dyu de? U si a sitali fi en di u be de na a se pe a san e opo, neen i si u kon fu gi en gaandi*.’
3 Kownu Herodes anga ala den sama fu Yelusalem buuya di den yee a sani ya.
4 Neen meke a kai ala den fesiman fu den pilisite* anga den leliman fu a Weiti kon, neen a akisi den pe a Kelestesi be o meke.
5 Den taigi en taki: ‘Aini Betlehem di de aini a foto Yudeya, bika a polofeiti be sikiifi taki:
6 “Betlehem fu a kondee Yuda, den gaanman fu Yuda á mu si yu enke wan peesi di naabi fa. Bika na ape wan tiiman o komoto, di o de enke wan sikapuman gi mi foluku Islayeli.”’
7 Bakadati Herodes kai den lukuman kon sondee fu sama sabi, neen a akisi den fu taigi en pilisisi on ten den si a sitali.
8 A sende den gwa Betlehem, neen a taigi den taki: ‘U go suku a pikin ya na ala den foto. Te u fende en, daw kon piki mi, bika miseefi wani go gi en gaandi.’
9 Baka di a kownu taigi den a sani ya, den gwe, neen den si a sitali di den be si na a pisi pe a san e opo. Den waka anga en te enke a sitali tyai den doo a pe a pikin be de.
10 Ná pikin poolo den poolo di a sitali sitopu a pe a pikin be de.
11 Di den go aini a osu, den si a pikin anga en mma Maliya. Den sutu kini a doti gi en gaandi, neen den gi en kado. Den gi en gowtu, anga tu sumee switi puili*.
12 Ma Gadu be taigi den aini wan deen taki den á mu daai gwa Herodes moo, neen meke den waka a wan taa pasi gwa den kondee.
13 Baka di den gwe, a engel fu Yehofa kon taigi Yowsefu aini wan deen taki: ‘Opo teke a pikin anga en mma, dai lowe gwa Egepte. Tan anda te enke mi piki i taki i sa daai kon baka, bika Herodes wani kii a pikin.’
14 A so Yowsefu opo a neti, a teke a pikin anga en mma, neen den gwa Egepte.
15 A tan ape te enke Herodes dede. A so a sani di Yehofa be meke en polofeiti taki be kon tuu. A be taki: ‘Mi kai mi manpikin puu a Egepte.’
16 Ná pikin boon Herodes ati boon di a si taki den lukuman koli en. Neen meke a sende sama go kii ala den mannengee pikin di be abi tu yali gwa ondoo a Betlehem, anga ala den foto di be de koosube. A be du a sani ya, bika den lukuman be taigi en taki na a yali ya a pikin be o abi.
17 Den sani ya pasa enke fa Gadu be meke polofeiti Yelemiya taki. A be taki:
18 ‘Den yee wan sama e kee aini a foto Rama. A Lakeli e kee gi den pikin fi en. Sama á be poi toosutu en, bika den pikin fi en á de a libi moo.’
19 Di Herodes dede, a engel fu Yehofa kon a Yowsefu aini wan deen di a be de a Egepte,
20 neen a taigi en taki: ‘Opo teke a pikin anga en mma dai gwa Islayeli, bika den sama di be wani kii a pikin dede.’
21 Yowsefu opo, a teke a pikin anga en mma neen den daai gwa Islayeli baka.
22 Ma di a yee taki Akelayus toon kownu di en dda Herodes dede, a be feele fu go anda. Boiti dati, Gadu be wasikoi en aini wan deen, neen meke a go na a pisi fu Galileya.
23 Di a go ape, a go tan aini wan foto di den e kai Nasaleti. A so den sani di den polofeiti be taki be kon tuu. Den be taki: ‘Den o kai en wan sama fu Nasaleti.’
A maiki
^ Den man ya be e luku a mun, a san anga den sitali.
^ Aini Giikitongo den be taki: ‘sutu kini a doti gi en.’
^ Luku den wowtu ‘fesiman fu den pilisite’ na a pisi ‘San den wowtu ya wani taki.’
