Den sani di Mateyesi sikiifi 21:1-46
-
Yesesi go a Yelusalem (1-11)
-
Yesesi e kiin a tempel (12-17)
-
Yesesi fuuku a figabon (18-22)
-
Den akisi Yesesi pe a fende a makiti fu du wonduu (23-27)
-
A ageisitoli fu den tu manpikin (28-32)
-
A ageisitoli fu den ogii-ati kiiman di a guduman be yuu a goon gi (33-46)
-
A moo pelensipali siton di den á be wani (42)
-
21 Di den doo koosube fu Yelusalem anga Betfage na a Oleifi Mongo, Yesesi taigi tu fu den bakaman fi en taki:
2 ‘U go aini a foto di we si ape, da wo si wan buliki de teitei anga en pikin. U losi den kon gi mi.
3 Efu wan sama akisi u pe we go anga den, u taigi en taki: “Masaa abi den fanowdu.” Da aw meke u gwe anga den.’
4 Di a du a sani ya, den sani di Gadu be meke en polofeiti taki kon tuu. A be taki:
5 ‘Taigi a umanpikin fu Siyon taki: “A kownu fu we kon. A abi sakafasi, a sidon a wan yonkuu buliki tapu, eeye, a sidon na a pikin fu wan buliki tapu.”’
6 Den tu bakaman fu Yesesi gwe, neen den du pilisisi san a taigi den.
7 Den teke a buliki anga a pikin fi en tyai kon. Den baala den koosi a den tapu, neen Yesesi sidon na a yonkuu buliki tapu.
8 Somen fu den sama di be de ape baala den dyakiti na a pasi, taawan koti taka puu a den bon fu baala a doti gi en.
9 Den sama di be e waka neen fesi, anga den sama di be e waka neen baka be e bali taki: ‘Gadu we begi i baa, kibii a Manpikin fu David. A sama di e kon aini Yehofa nen mu fende belesi. Gadu di de na a moo hei peesi a hemel, we begi i fu kibii en baa.’
10 Di a doo aini Yelusalem a hii foto seke. Ala den sama be e akisi taki: ‘Sama na a man ya?’
11 Den sama di be kon anga en be e taigi den taki: ‘Disi a Yesesi, a polofeiti fu Nasaleti a Galileya.’
12 Yesesi go aini a tempel, neen a yaki ala den sama di be e seli efuso bai sani puu aini a tempel. A daai den tafaa fu den sama di be e booko moni tapu. A daai den bangi fu den sama di be e seli doifi tapu tu.
13 A taigi den taki: ‘Gadu buku taki: “Sama o kai a osu fu mi wan peesi pe sama e kon fu begi.” Ma u meke a toon wan peesi pe fufuuman e tan.’
14 Di a be de aini a tempel, sama di be beendi anga sama di be malengii be kon neen, neen a deesi den.
15 Den fesiman fu den pilisite anga den leliman fu a Weiti si den foondoo sani di Yesesi du. Den yee tu fa den boi e bali aini a tempel taki: ‘Gadu we begi i baa, kibii a Manpikin fu David.’ Ná pikin boon a sani ya meke den ati boon.
16 Den akisi Yesesi taki: ‘Ye yee san den e taki?’ Yesesi piki den taki: ‘Eeye, mi e yee. Wa leisi a pisi aini Gadu buku di e taki: “Yo meke pikinnengee anga beibi gafa i noh?”’
17 Bakadati a komoto a Yelusalem gwa Betaniya, neen a siibi ape.
18 A mmanten di a be e daai gwa Yelusalem baka, angii be e kii en.
19 A si wan figabon a sikinpasi, neen a waka go na a bon. Ma a si taki a soso uwii be de neen, aa be abi nawan nyanyan. Neen a taigi a bon taki: ‘Noiti moo yo meke nyanyan.’ Di a taki so, a figabon dee wanten neen a dede.
20 Di den bakaman fi en si a sani ya den foondoo te neen den taki: ‘Fa a figabon du dee wanboowanboo so?’
21 Yesesi taigi den taki: ‘Biibi mi, efu we biibi tuutuu, a ná a sani di mi du anga a figabon wawan wo poi du, ma wo man taigi a mongo ya taki: “Opo komoto ya go aini a ze”, da sani o pasa enke faw taki.
22 Efu u begi fu wan sani, neen we biibi, wo fende san wi akisi.’
23 Di a be de aini a tempel e leli sama, den fesiman fu den pilisite anga den gaanwan fu a foluku kon neen, neen den akisi en taki: ‘Sama sende i fu du den sani ya? Sama gi ya makiti fu du den?’
24 Yesesi piki den taki: ‘Mio akisi u wan sani tu. Efu u piki mi, da mio taigi u sama gi mi a makiti fu du den sani ya.
25 Sama be sende Yohanisi fu dopu sama? Gadu di de a hemel efuso libisama?’ Den bendi a se fu luku fa den o piki en. Den taki: ‘Efu u taki a Gadu, aw akisi u taki: “Da saide wa be e biibi den sani di a be e leli?”
26 Ma efu u taki: “A libisama”, den sama ati o boon aw, bika ala den e si Yohanisi enke wan polofeiti.’
27 Neen meke den piki Yesesi taki: ‘Wa sabi.’ Neen Yesesi taigi den taki: ‘Da miseefi naw taigi u sama gi mi a makiti fu du den sani ya.
28 U taigi mi fa we si a toli ya osi. Wan man abi tu pikin. A taigi a fosiwan taki: “Tide i mu go wooko aini a doloifigoon ye.”
29 A piki en dda taki: “Mi naw go.” Ma bakaten a hati en taki a piki en dda so, neen a go na a goon.
30 Bakadati a dda go na a taa pikin neen a taigi en aseefi sani. A wan ya piki en taki: “A bun nda, mio go.” Ma aa go.
31 On di fu den pikin ya du san a dda wani?’ Den taigi en taki: ‘A fosiwan.’ Neen Yesesi piki den taki: ‘Biibi mi, den sama di e piki lantimoni, anga den hulu-uman* o go aini a Kownukondee fu Gadu fosi u.
32 Yohanisi kon, neen a soi u faw mu du sani a wan letifasi, ma wa biibi en. Ma den sama di e piki lantimoni anga den hulu-uman biibi en. Winsi faw si a sani ya, toku u kosensi á fon u fu u biibi en.
33 Mio gi wi ete wan ageisitoli fu wan man di be abi wan goon. A paandi doloifi neen, a meke wan sikotu lontu en, neen a seeka wan peesi fu masi a doloifi. A meke wan hei osu tu fu den wakitiman luku a goon. Bakadati a yuu a goon gi sama di e paandi, neen a gwa taa kondee.
34 Di den doloifi lepi, a sende den saafu fi en gwa den goonman fu den sende fi en se gi en.
35 Ma den goonman wai den saafu kon, neen den fon wan fu den te a fon, den kii wan fu den, neen den fiingi siton naki a taawan te enke a dede.
36 Bakadati a sende taa saafu go, moo enke san a be sende a fosi leisi, ma den du aseefi sani anga den saafu ya.
37 Te fu kaba a sende en boi gwa den bika a be denki taki: “Den o lesipeki en bika a mi boi.”
38 Ma di den goonman si a boi fu a man, den taki: “Neen o fende a doloifigoon. Kow kii en, da wo fende a goon.”
39 Neen den hali en puu aini a goon neen den kii en.
40 Te a man di abi a doloifigoon kon, saw denki aw du anga den goonman ya?’
41 Den taigi en taki: ‘Fu di den abi ogii-ati meke aw kii ala den fiya. Aw yuu a goon gi taa sama di e paandi goon di a sabi taki o gi en san a mu fende te a yuu o doo.’
42 Yesesi taigi den taki: ‘Noiti u leisi a pisi fu Gadu buku di e taki: “A siton di den sama di e meke osu á be wani, neen kon toon a moo pelensipali siton. A Yehofa seefi meke a sani ya pasa so. A sani ya a wan wonduu gi u.”
43 Neen meke mi e taigi u taki Gadu o puu a Kownukondee fi en a wi ana, da aw gi wan foluku en di o du sani enke fa a wani.
44 A sama di o naki en futu na a siton ya, o kisi gaan mankei. Ma efu a siton ya kai naki wan sama, aw masi en.’
45 Di den fesiman fu den pilisite anga den Faliseiman yee den ageisitoli ya, den fusutan taki a den Yesesi be e taki.
46 Den be wani kisi en, ma den be e feele den sama, bika den sama be e si Yesesi enke wan polofeiti.
A maiki
^ Den uman di sama e pai fu siibi anga den.
