Den sani di Mateyesi sikiifi 24:1-51
24 Di Yesesi be e komoto aini a tempel*, den bakaman fi en kon neen, neen den taigi en fu luku a fasi fa a tempel meke.
2 Ma a taigi den taki: ‘We si ala den sani ya? Biibi mi, wan ten o kon pe nawan fu den siton ya o fika a taawan tapu. Ala den fiya o booko kai.’
3 Di a be sidon na a Oleifi Mongo, den bakaman fi en kon neen di taa sama á be de ape, neen den akisi en taki: ‘Taigi wi on ten den sani ya o pasa. San wo si di o soi u taki i kon, efuso taki a kaba fu a goontapu ya koosube?’
4 Yesesi piki den taki: ‘U mu luku bun fu sama á fende u koli.
5 Bika a omen sama o kon da den o taki: “A mi na a Kelestesi.” Den o fende omen sama koli.
6 Wo go e yee taki feti e feti, wo go e yee nyunsu fu feti a taa kondee tu. Ma wa mu dyombo te u yee den sani ya, bika den sani ya mu pasa, ma a kaba á doo ete.
7 Bika foluku o go e feti anga denseefi, kondee* o go e feti anga taa kondee. Nyanyan o pina, seke-doti o de a omen peesi.
8 Ala den sani ya de enke a pen di wan uman e fii te a de fu meke wan pikin.
9 Sama o du ogii anga u, den o kii u. Na ala se fu goontapu den o buuse u fu mi nen ede.
10 A omen sama o dyakata*, den o go e konkuu denseefi, den o buuse denseefi.
11 A omen falisi polofeiti o de a ten de tu, den o fende omen sama koli.
12 Sama o kon moo ogii, neen meke omen sama naw lobi taawan moo.
13 Ma a sama di holidoo te na a kaba o fende libi.
14 A bun nyunsu fu a Kownukondee fu Gadu o paati na a hii goontapu fu ala sama yee. Bakadati a kaba o kon.
15 Te u si a tyobo sani di e poli ala sani taampu aini a santa peesi enke fa polofeiti Daniyeli be taki (meke a sama di e leisi a polofeititoli ya meke moiti fu fusutan en bun),
16 da den sama di e tan a Yudeya mu lowe gwa den mongo.
17 A sama di de neen daki tapu, á mu saka go aini en osu fu teke sani.
18 A sama di de aini en goon á mu daai gwa osu fu go teke en dyakiti.
19 Heelu fu den uman di de anga bee anga den uman di abi pikin a bobi na a ten de.
20 U mu e begi naamo taki u naafu lowe na a koo ten fu a yali efuso a Sabadei.
21 Bika wan gaan banowtu* o kon, di sama á be si ete senten di goontapu sete. A naw kon noiti moo tu.
22 Efu Gadu á satu a ten de, nawan sama o tan a libi. Ma Gadu o satu a ten de gi den sama di a kai.
23 Efu wan sama taigi u taki: “Luku a Kelestesi ya,” efuso: “luku en anda,” wa mu biibi en.
24 Bika falisi Kelestesi anga falisi polofeiti o kon. Den o du omen gaan wonduu fu koli den sama di Gadu kai.
25 Wa mu feegete den sani di mi taigi u ya.
26 Efu wan sama taigi u taki: “U kon luku, a Kelestesi de aini a sabana,” wa mu go. Efu den taki: “U kon luku, a de a wan kibii peesi,” wa mu biibi.
27 Te a Manpikin fu libisama o kon, aw de enke te tapu koti faya na a se pe a san e opo, da sama si en te na a se pe a san e dongo.
28 Pe wan dedesikin de, na ape den tingi foo* e kon makandaa.
29 Wantenwanten baka a gaan banowtu fu a ten de, a san o dunguu, a mun naw kiin peesi moo, den sitali o kai komoto a tapu, ala sani di de a hemel o seke.
30 Da den o si a maiki fu a Manpikin fu libisama a hemel. Ala sama* a goontapu o go e kee, sama naw poi toosutu den. Den o si a Manpikin fu libisama e kon a den woluku. Aw kon anga gaan makiti anga gendee.
31 Aw sende den engel fi en go anga gaan tutu di o go e piki taanga. Den engel o gwa den fo uku fu goontapu fu teke ala den sama di Gadu kai, fu a wanse fu hemel te doo a taase.
32 U luku a figabon, te den taka fu a bon ya kengi teke nyun uwii, daw sabi taki a waan ten fu a yali koosube.
33 A letiso useefi mu sabi taki te u si ala den sani ya, da a Manpikin fu libisama de leti na a doomofu.
34 Biibi mi, den sama fu a ten ya naw dede fosi ala den sani ya pasa.
35 Hemel anga goontapu naw de moo, ma den sani di mi taki o tan fu teego.
36 Nawan sama sabi a dei anga a yuu. Den engel di de a hemel anga a Manpikin seefi á sabi. Na a Dda wawan sabi a dei anga a yuu.
37 Leti enke fa sani be waka aini a ten fu Nowa, a letiso sani o waka te a Manpikin fu libisama daai kon baka.
38 Fosi a Fuudu kon, sama be e nyan, den be e diingi, den be e toow, te enke a dei doo di Nowa go aini a ark.
39 Den sama á be e poti pakisei a den sani di be e pasa, te enke a Fuudu kon, neen a kii ala den fiya. A letiso aw de tu te a Manpikin fu libisama daai kon baka.
40 Te aw kon, tu man o de aini goon. Gadu o teke wan tyai gwe, da a fika a taawan ape.
41 Tu uman o go e masi alisi. Gadu o teke wan tyai gwe, da a fika a taawan ape.
42 Neen meke u mu de na ain ala yuu, bika wa sabi on dei a Masaa fu wo kon.
43 Ma u mu sabi taki efu a masaa fu a osu be sabi on yuu fufuuman be o kon, aa be o siibi. A be o koti lulu fu sama á booko kon aini en osu.
44 Neen meke useefi mu de seekaseeka, bika a Manpikin fu libisama o kon a wan yuu di wa poti pakisei.
45 Sama na a koni saafu di u sa fitoow, di en masaa poti a wooko fu gi ala den futuboi fi en nyanyan na a yuu di den abi en fanowdu?
46 Koloku fu a saafu de te en masaa kon da a si taki ai du a wooko di a be fika gi en.
47 Biibi mi, a masaa o poti en fu luku ala den sani di a abi.
48 Ma efu a saafu ya ogii, a sa denki taki: “Mi masaa naw kon ete.”
49 Da aw bigin fon den taa saafu, aw nyan diingi anga duunguman.
50 A masaa fu a saafu ya o kon a wan dei anga wan yuu di aa be pakisei,
51 da aw gi a saafu ya wan hebi sitaafu. Aw poti en a pe den bidiigiman e de. Aw kee da a kaw tifi te a de ape.
A maiki
^ Luku a wowtu ‘tempel’ na a pisi ‘San den wowtu ya wani taki.’
^ Aini Giikitongo den be taki: ‘kownukondee.’
^ Efuso ‘a omen sama naw biibi aini Gadu moo’.
^ Luku den wowtu ‘gaan banowtu’ na a pisi ‘San den wowtu ya wani taki.’
^ Aini Giikitongo den be taki: ‘agaa.’
^ Aini Giikitongo den be taki: ‘ala den lo fu goontapu.’