Den sani di Mateyesi sikiifi 27:1-66
27 A fuuku mamanten, den fesiman fu den pilisite anga den gaanwan fu a foluku kon makandaa fu taki fiti fa den sa kii Yesesi.
2 Baka di den tei en ana, den tyai en gwa Pilatus, a tiiman fu Yudeya.
3 Di Yudas, a sama di be konkuu Yesesi si taki den leisi dede sitaafu gi en, en kosensi bigin fon mi en. Neen a tyai den 30 pisi solufu moni go gi den fesiman fu den pilisite, anga den gaanwan fu a foluku baka.
4 A taigi den taki: ‘Mi sondu di mi yeepi u fu kisi wan sama di á du nawan ogii.’ Den taigi en taki: ‘Da saw mu du? Dati a naw booko-ede.’
5 A iti den solufu moni aini a tempel, neen a go anga enseefi kii.
6 Den fesiman fu den pilisite teke den solufu moni neen den taki: ‘Wa poi poti den moni ya aini a santa kedee fu a tempel, bika a buulu moni.’
7 Baka di den taki fiti, den bai wan pisi doti* anga a moni fu beli taa kondee sama.
8 Neen meke te anga a dei fu tide sama e kai a pisi doti ya Buulu-doti.
9 A so den sani di polofeiti Yelemiya taki kon tuu. A be taki: ‘Den seli wan man gi 30 pisi solufu moni. Na a moni ya den manpikin fu Islayeli be taki den o pai gi en.
10 Den teke a moni, neen den bai wan pisi doti na a man di e meke doti patu, enke fa Yehofa be taigi mi.’
11 Di den tyai Yesesi gwa Pilatus, a akisi en taki: ‘A yu na a Kownu fu den Dyu?’ Yesesi piki en taki: ‘A leti enke fai taki de.’
12 Di den fesiman fu den pilisite anga den gaanwan fu a foluku be e taki ogii fu Yesesi aa piki den.
13 Neen Pilatus akisi en taki: ‘I nai yee den somen ogii di den e taki fii noh?’
14 Ma Yesesi á piki en nawan sani. A sani ya meke Pilatus foondoo.
15 Ala yali te a Paskafesa be e holi, a gaanman be e losi wan sitaafuman. Na a foluku seefi be e taigi a gaanman sama a mu losi gi den.
16 A ten de, wan gaan ogiiman den be e kai Barabas be de a sitaafu-osu.
17 Pilatus akisi a kulu sama di be de ape taki: ‘On di fu den u wani mi losi gi u? Barabas efuso Yesesi di sama e kai a Kelestesi?’
18 Pilatus be sabi taki a fu dyalusu ede meke den be tyai Yesesi kon neen.
19 Di a be sidon na a sutuu pe ai kuutu sama, en uman sende bosikopu gi en taki: ‘A man ya á du nawan ogii. Ya mu de aini kuutu en, bika tide neti mi deen wan sani fi en di meke mi feele.’
20 Ma den fesiman fu den pilisite anga den gaanwan fu a foluku be gi den sama taanga-sikin fu taki: ‘Losi Barabas dai kii Yesesi.’
21 Pilatus akisi den baka taki: ‘On di fu den tu man ya u wani mi losi gi u?’ Den piki en taki: ‘Losi Barabas gi u.’
22 Neen Pilatus akisi den taki: ‘Da san mi mu du anga Yesesi di sama e kai Kelestesi?’ Ala den sama taki: ‘Sipikii en a wan ponsu.’
23 A akisi den taki: ‘Saide? Sowtu ogii a du?’ Ma den sama bigin bali moo taanga taki: ‘Sipikii en a wan ponsu!’
24 Di Pilatus si taki aa be poi du nawan sani fu di den sama be e moo ligei, a teke wataa wasi en ana na ala den sama fesi, neen a taki: ‘A dede fu a man ya naw fika a mi neki tapu. A fu u luku saw wani du.’
25 Neen ala den sama di be de ape piki taki: ‘Eeye, meke a dede fi en fika a wi anga den pikin fu u neki tapu.’
26 Pilatus meke den losi Barabas gi den, neen a taigi den suudati fi en fu wipi Yesesi da den tyai en go sipikii a wan ponsu.
27 Bakadati, den suudati tyai Yesesi go aini a osu fu Gaanman Pilatus, neen ala den suudati kon taampu lontu en.
28 Den puu en koosi neen sikin neen den wei wan lebi dyakiti gi en.
29 Den teke wan taka fu wan makabon neen den bei wan kownu-ati poti neen ede. Den meke a holi wan tiki aini en leti-ana. Den sutu kini a doti neen den bigin soso en. Den be e taki: ‘Odi oo, Kownu fu den Dyu.’
30 Den tufe neen, neen den bigin naki en neen ede anga a tiki di be de aini en ana.
31 Baka di den kaba soso en, den puu a dyakiti di den be wei gi en, den wei en koosi gi en baka, neen den tyai en gwe fu go sipikii a wan ponsu.
32 Di den be e komoto aini a foto, den si wan man fu Sireine den e kai Simon. Neen den dwengi en fu tyai a pina ponsu fu Yesesi.
33 Den waka te neen den doo wan peesi den e kai Golgota. Dati wani taki ‘Ede-kaabasi’.
34 Den gi Yesesi win di mokisa anga bita, ma di a tesi en aa be wani diingi en.
35 Baka di den sipikii en na a ponsu, den iti lowte* fu luku sama o fende den koosi fi en.
36 Neen den sidon fika ape fu holi wakiti gi en.
37 Den be sipikii wan pisi paanga na a ede fu a ponsu fu soi saide den be kii en. Den be sikiifi taki: ‘Disi a Yesesi, a Kownu fu den Dyu.’
38 Den be sipikii tu ogiiman neen se tu, wan neen letise-ana, a taawan neen kukutuse-ana.
39 Den sama di be e waka e pasa be e soso en. Den be e seke den ede da den be e taki:
40 ‘Ai be taki yo booko a tempel dai meke en baka aini dii dei, neen ya poi yeepi iseefi? Efi ya wan manpikin fu Gadu, da saka komoto na a ponsu osi.’
41 Den fesiman fu den pilisite, den leliman fu a Weiti, anga den gaanwan fu a foluku seefi be e soso en. Den be e taki:
42 ‘A be e yeepi taa sama, ma aa poi yeepi enseefi. Efi en na a Kownu fu Islayeli, da meke a saka komoto na a pina ponsu osi, da wo biibi en.
43 Ai fitoow Gadu. Efu Gadu lobi en, da aw yeepi en, bika a be taki: “Mi a Gadu Manpikin.”’
44 Den tu ogiiman di den be sipikii neen se bigin soso en tu.
45 Fanafu twalufu yuu mindii dei te go miti wan sani fu dii yuu bakadina, a hii kondee be dunguu pii.
46 A pisiten fu dii yuu bakadina, Yesesi bali taki: ‘Eli, Eli, lama sabaktani?’ Dati wani taki: ‘Mi Gadu, mi Gadu, saide i gwe fika mi?’
47 Di son wan fu den sama di be taampu ape yee a sani ya, den taki: ‘A man ya e kai Eliya.’
48 Neen wan fu den lon go teke wan siponsu, a nati en anga suwa win, a poti en a wan tiki, neen a gi Yesesi fu diingi.
49 Ma den taawan be e taki: ‘Fika en, kow luku efu Eliya o kon yeepi en osi.’
50 Yesesi bali ete wan leisi, neen en boo koti.
51 Neen a gaan deki koosi di be tapu a santa peesi fu a tempel piiti fu tapu te a doti, a doti seke, den siton piiti.
52 Den geebi opo, i be poi si den dedesikin fu omen fu den sama di be e dini Gadu.
53 A omen sama be si den. (Baka di Yesesi kon a libi baka, wantu sama di be de a den geebi go aini a santa foto.)
54 A suudati-edeman anga den suudati di be e holi wakiti gi Yesesi bigin feele di den si fa a doti seke anga ala den taa sani di pasa. Neen meke den taki: ‘A man ya a be Gadu Manpikin tuu.’
55 A omen fu den uman di be e yeepi Yesesi be komoto a Galileya makandaa anga en. Den be taampu a faawe e luku sai pasa.
56 Wantu fu den uman ya a be Maliya Makdalena, Maliya a mma fu Yakowbesi anga Yoses, anga a mma fu den manpikin fu Sebedeyus.
57 A bakadina de, wan guduman fu Arimateya den e kai Yowsefu, di be toon wan bakaman fu Yesesi
58 gwa Pilatus, neen a akisi en a dedesikin fu Yesesi. Pilatus taigi den suudati fi en taki den sa gi en a dedesikin fu Yesesi.
59 Yowsefu teke a dedesikin fu Yesesi, neen a lolo en aini wan fini linnen koosi.
60 Bakadati a poti en aini wan nyun geebi olo di enseefi be diki. Di a kaba, a lolo wan gaan siton poti na a geebi mofu neen a gwe.
61 Ma Maliya Makdalena anga a taa Maliya be sidon fika na a geebi fesi.
62 Den sani ya pasa na a dei di sama be e seeka sani gi a Sabadei. A tamaa fi en den fesiman fu den pilisite anga den Faliseiman gwa Pilatus, neen den taigi en taki:
63 ‘U membee wan sani di a bidiigiman be taki fosi a dede. A be taki: “Baka dii dei, mio kon a libi baka.”
64 Neen meke u kon begi i fu poti sama holi wakiti na a geebi dii dei langa, fu den bakaman fi en á go fufuu en da den lei taki: “A opo baka!” Bika efu wa du so, da a lei ya o ogii moo a fosi lei fi en.
65 Pilatus taigi den taki: ‘U teke den suudati ya, meke den holi wakiti na a geebi gi u.’
66 Den poti wan gaan siton na a geebi mofu, neen den poti wakitiman fu holi wakiti gi en.
A maiki
^ A pisi doti fu a man di e meke doti patu.
^ Luku a wowtu ‘lowte’ na a pisi ‘San den wowtu ya wani taki.’
