Den sani di Mateyesi sikiifi 3:1-17
3 Bakaten, Yohanisi a Dopuman go peleiki aini a sabana fu Yudeya.
2 A be taki: ‘U daai u libi*, bika a Kownukondee fu Gadu di de a hemel koosube.’
3 A fu a Yohanisi ya polofeiti Yesaya be sikiifi taki: ‘Wan sama e bali aini a sabana taki: “U seeka a pasi gi Yehofa! U kiin a pasi fi en.”’
4 Yohanisi be e wei* koosi di meke anga kameili uwii, a be e wei wan lelibuba neen mindii. A makonkon* anga oniki a be e nyan.
5 Den sama fu Yelusalem anga Yudeya anga ala den taa foto di be de koosube fu Yordaan liba be e kon a Yohanisi.
6 Den be e taki na ala sama fesi sowtu sondu den du, da a be e dopu den aini Yordaan liba.
7 Di a si taki omen Faliseiman anga Saduseiman* kon a pe a be e dopu den sama, a taigi den taki: ‘U sinekipikin, saw kon du ya? U denki taki wo poi go kibii te Gadu o kii den ogii sama?
8 Neen meke, u mu du sani di e soi taki u daai u libi.
9 Wa mu denki taki fu di wa Abalaham bakapikin, da Gadu naw sitaafu u. Bika Gadu sa meke den siton ya toon Abalaham bakapikin.
10 A akisi fei kaba fu faa a bon towe. Neen meke iniiwan bon di nai meke bun nyanyan, a fu faa towe da den iti en go aini a faya.
11 Mi e dopu* u anga wataa, bika u daai u libi. Ma wan sama di abi makiti moo mi o kon a mi baka. Mia fiti fu puu en susu neen futu seefi. A sama ya o dopu u anga santa yeye anga faya*.
12 A abi wan sani aini en ana fu puu alisi buba. Aw kiin a peesi pe ai masi alisi. Aw poti a alisi aini a magisin fi en, ma aw boon den alisi buba anga faya di nawan sama o poi kii.’
13 Bakadati Yesesi komoto a Galileya, neen a go a Yordaan liba fu Yohanisi dopu en.
14 Ma Yohanisi á be wani dopu en. Neen meke a taigi en taki: ‘A yu mu dopu mi, neen i wani mi dopu i?’
15 Yesesi piki en taki: ‘Meke u du en so a leisi ya, bika a so we soi taki we du ala sani enke fa Gadu wani.’ Di a taki so, neen Yohanisi dopu en.
16 Di Yesesi dopu, di a opo kon a tapu, hemel opo wanten, neen Yohanisi si a yeye fu Gadu e saka kon a Yesesi tapu enke wan doifi.
17 Neen Gadu taki komoto a tapu* taki: ‘A mi Manpikin de ya, mi lobi en, ai meke mi piisii.’
A maiki
^ Efuso ‘kengi a fasi fa we denki’. Luku den wowtu ‘daai libi’ na a pisi ‘San den wowtu ya wani taki.’
^ Efuso ‘weli koosi’.
^ Luku a wowtu ‘makonkon’ na a pisi ‘San den wowtu ya wani taki.’
^ Tu kulu pelensipali keliki fesiman na a ten fu Yesesi.
^ Luku a wowtu ‘dopu’ na a pisi ‘San den wowtu ya wani taki.’
^ Dati wani taki aw salufu son sama anga santa yeye, da aw poli son sama anga faya.
^ Efuso ‘hemel’.
