Den sani di Mateyesi sikiifi 5:1-48
-
YESESI E LELI SAMA NA A MONGO (1-48)
-
Yesesi bigin leli den sama (1, 2)
-
Neigin sani di e meke sama de koloku (3-12)
-
Sawtu anga faya di e kiin peesi (13-16)
-
Yesesi kon fu meke den sani di sikiifi aini a Weiti kon tuu (17-20)
-
Yesesi e taki fu atiboon (21-26), wakalibi (27-30), booko toow (31, 32), sweli (33-37), pai ogii fu ogii (38-42), anga a lobi di u mu lobi u feyanti (43-48)
-
5 Di Yesesi si a kulu sama, a subi go na a mongo tapu. Baka di a sidon, den disipel fi en kon neen.
2 Neen a bigin leli den sama. A taigi den taki:
3 ‘Koloku fu den sama di sabi taki den abi Gadu fanowdu, bika a den o fende a Kownukondee fu hemel.
4 Koloku fu den sama di de anga buduufu na ati, bika Gadu o toosutu den*.
5 Koloku fu den sama di abi sakafasi, bika Gadu o gi den a goontapu.
6 Koloku fu den sama di e angii fu sani waka enke fa Gadu wani, bika aw gi den a sani di den e angii fu fende.
7 Koloku fu den sama di e soi tyali-ati gi taawan, bika taawan o soi tyali-ati gi den tu.
8 Koloku fu den sama di ati kiin, bika den o si Gadu.
9 Koloku fu den sama di e libi bun anga taawan ala yuu, bika sama o kai den pikin* fu Gadu.
10 Koloku fu den sama di taawan e libi ogii anga den fu di den e du san bun*, bika a den o fende a Kownukondee fu hemel.
11 Koloku fu u te sama e soso u, te den e libi ogii anga u, anga te den e lei gi u fu mi ede.
12 U mu piisii gaan piisii, bika wo fende wan gaan pai a hemel. A so sama be e libi ogii anga den polofeiti fu fosi.
13 U de enke a sawtu fu a goontapu. Ma efu sawtu lasi en tesi, da saw meke a fende en tesi baka? A fu fiingi towe da sama waka neen tapu, bika i naw poi du nawan enkii sani anga en moo.
14 U de enke a faya di e kiin a goontapu*. Ala sama man si wan foto di de a wan mongo ede.
15 Te sama leti wan abeni, den nai poti en a wan bakisi ondoo, ma den e poti en a wan tafaa tapu, fu a kiin a peesi gi ala sama aini a osu.
16 A so useefi mu du bun fu meke sama si a faya fu u, da den o gafa u Dda di de a hemel.
17 Wa mu denki taki mi kon fu kengi a Weiti, efuso den sani di den polofeiti sikiifi. Mia kon fu kengi den, ma mi kon fu meke den sani ya pasa.
18 Mi e taigi u taki, winsi hemel anga goontapu be o booko, tokuso a moo pikin pisi fu a Weiti o de ete, te enke ala den sani ya pasa.
19 Neen meke efu wan sama nai du wan fu den moo pikin sani di de aini a Weiti, neen ai leli taa sama fu du aseefi sani de, a naw go aini a Kownukondee fu hemel. Ma a sama di e du san a Weiti e taki, neen ai leli sama den sani ya, aw go aini a Kownukondee fu hemel.
20 Efu u nai libi a wan letifasi moo den leliman fu a Weiti anga den Faliseiman, u naw go aini a Kownukondee fu Gadu.
21 U yee taki den taigi den sama fu fosi taki: “Wa mu kii sama. Den o tyai iniiwan sama di kii wan taawan gwa kuutu.”
22 Ma mi e taigi u taki, den o tyai iniiwan sama di e holi en baala na ati gwa kuutu. Den o tyai iniiwan sama di e wisiwasi en baala gwa kuutu. Efu wan sama taigi wan taawan taki: “I wisiwasi lawman yu!” Da a naabi misi, a sama ya musu fu go aini Gehena*.
23 Neen meke efi ye tyai wan ofaandi go na a altari, neen i membee taki wan sama e holi fesi anga i,
24 dai mu fika a ofaandi fii ape, dai go miti en. Go meke en bun anga en fosi, tei daai kon baka dai tyai a ofaandi fii.
25 Efu wan sama wani tyai i gwa kuutu, ya mu daaidaai fu losi a polobelema fosi u doo a kuutu-osu. Efi ya du a sani ya, a sama di tyai i gwa kuutu o fika i gi a kuutubakaa. Da a kuutubakaa o meke den sikowtu sooto i.
26 Biibi mi, mi e taigi i taki i naw komoto ape te enke i pai a lasiti tiisensi.
27 U yee den taki: “Den man, wa mu waka gi wi uman, den uman wa mu waka gi u man.”
28 Ma mi e taigi u taki, iniiwan sama di e luku wan uman anga a fii fu didon anga en, siibi anga en kaba aini en ati.
29 Neen meke efii letise ain e meke i sondu, tokoo en puu dai fiingi en towe. Bika a moo bun fii lasi wanse ain, pe fu den fiingi i hii sikin go aini Gehena.
30 Efu ai leti-ana e meke i sondu, koti en puu dai fiingi en towe. Bika a moo bun fii lasi wanse ana, pe fu den fiingi i hii sikin go aini Gehena.
31 U be yee tu taki: “Efu wan man o booko toow anga en uman, da a mu gi en wan pisi pampila fu soi taki a booko toow anga en.”
32 Ma mi e taigi u taki: Wan man á mu booko toow anga en uman, boiti efu en uman waka gi en. Efu a du a sani ya, a sa meke en uman sondu*. Efu wan taa man go toow anga a uman de, da enseefi sondu.
33 U be yee tu taki den taigi den afo fu u taki: “Ya mu sweli* taki yo du wan sani da ya du en. Tei paamisi Yehofa wan sani, i mu du en.”
34 Ma mi e taigi u taki: Wa mu sweli seefiseefi. Wa mu sweli kai hemel, bika na anda a kownusutuu fu Gadu de.
35 Wa mu sweli kai goontapu, bika goontapu a Gadu futubangi. Wa mu sweli kai Yelusalem tu, bika Yelusalem na a foto pe a gaan Kownu* e tan.
36 Ya mu sweli taki, efu mia du san mi taki, mi sa dede. Bika i naabi a makiti seefi fu meke wan sii uwii a yu ede kon weti efuso baaka.
37 Te u taki iya, da a mu tan iya. Te u taki nono, da meke a tan nono. Bika ala taa sani di wo taki moo, e komoto fu a ogiiwan*.
38 U yee den taki: “Efu wan sama booko wan taawan ain, u mu booko en ain baka. Efu wan sama booko wan taawan tifi, u mu booko en tifi baka.”
39 Ma mi e taigi u taki: Wa mu feti anga wan sama di du ogii anga u. Efu wan sama kalapu i ai sikinfesi, daai a taase fesi gi en.
40 Efu wan sama wani tyai i gwa kuutu fu di a wani a impi fii, a ná a impi wawan i mu gi en, gi en i dyakiti tu.
41 Efu wan sama e dwengi i fu wooko gi en wan yuu langa, dai mu wooko tu yuu langa gi en.
42 Ya mu mombii wan sama, te a begi i wan sani. Efu wan sama wani leni wan sani ai, leni en.
43 U yee den taki: “U mu lobi u mati*, ma u mu buuse u feyanti.”
44 Ma mi e taigi u taki: U mu lobi den feyanti fu u, begi gi den sama di e libi ogii anga u.
45 Te we du den sani ya, da sama o si taki wa pikin fu u Dda di de a hemel. Bika ai meke a san pii gi bun sama anga ogii sama. Ai meke a alen kai gi sama di e libi enke fa a wani, anga sama di nai libi enke fa a wani.
46 Bika efu a den sama di lobi u wawan u lobi, da sowtu bun u si enke we du? A ná aseefi sani de den sama di e piki lantimoni e du noh?
47 Efu a den sama fu u wawan we gi odi, daw si enke we du sani di taa sama nai du? A ná aseefi sani de den sama di nai dini Gadu e du noh?
48 Neen meke u mu meke moiti fu de enke u Dda di de a hemel di naabi nawan fowtu.
A maiki
^ Efuso ‘Gadu o meke sama toosutu den’.
^ Aini Giikitongo den be taki: ‘manpikin fu Gadu.’
^ Aini Giikitongo den be taki: ‘fu di den e du sani a wan letifasi.’
^ Efuso ‘faya di e kiin peesi gi sama.’
^ Luku a wowtu ‘Gehena’ na a pisi ‘San den wowtu ya wani taki.’
^ Efuso ‘meke en uman libi wan hululibi’.
^ Luku a wowtu ‘sweli’ na a pisi ‘San den wowtu ya wani taki.’
^ A Kownu ya a Gadu.
^ Dati a Didibii.
^ Aini Giikitongo den be taki: ‘lobi taa sama.’
