Den sani di Mateyesi sikiifi 7:1-29
7 Ná kuutu taawan moo, da Gadu naw kuutu u.
2 Bika na aseefi fasi fa we kuutu taawan Gadu o kuutu u. A fasi fa we libi anga taawan, a so den o libi anga u tu.
3 Fa ye du si a pikin fini tiki aini i baala ain, dai nai si a gaan pisi udu aini yu ain?
4 Efuso fai sa taigi i baala taki: “Meke mi puu a tiki aini yu ain gii”, anga ala fa wan gaan pisi udu de aini yu ain?
5 U bidiigiman, puu a gaan pisi udu aini wi ain fosi, da wo si moo bun faw sa puu a fini pisi tiki aini u baala ain.
6 Ya mu gi dagu santa sani. Ya mu iti dii siton* gi den agu tu. Efuso den o taampu den anga futu, da den daai kon gii mankei.
7 E akisi naamo, da wo fende. E suku naamo, da wo fende. E koko a doo naamo, da a doo o opo gi u.
8 Bika a sama di e akisi, o fende. A sama di e suku, o fende. A doo o opo gi a sama di e koko naamo.
9 On du fu u ya o gi en pikin siton, efu a akisi en beele?
10 Efu a wan fisi a akisi i, da yo gi en sineki?
11 Anga ala fa wi abi takuu manii, toku u sabi gi u pikin bun sani. Daw mu sabi taki u Dda di de a hemel o gi sama bun sani te den akisi en.
12 Faw wani sama libi anga u, a letiso u mu libi anga den tu. Na a sani ya a Weiti fu Mosesi, anga den sani di den Polofeiti be sikiifi wani taki.
13 Pasa na a sumaa doo, bika a pasi di e tyai sama go dede baala. A doo fi en bigi, a omen sama e pasa neen.
14 Ma a doo di e tyai sama gwa teego libi sumaa, a taanga fu waka na a pasi ya. A wantu sama namo e fende en.
15 Luku bun anga den falisi polofeiti di e kon a wi enke sikapu, ma aini den ati den a ogii busidagu di wani du ogii anga u.
16 A den sii di den e meke, o soi sama a den. Bika sama á poi piki doloifi efuso figa a wan makabon.
17 Wan gusontu bon e meke bun nyanyan, ma wan bon di masi nai meke bun nyanyan.
18 Wan gusontu bon á poi meke nyanyan di á bun, leti enke fa wan bon di masi á poi meke bun nyanyan.
19 Te wan bon nai meke bun nyanyan, den e koti en towe iti go aini faya.
20 A den sani di den e du, o meke sama sabi sama a den tuutuu.
21 A ná ala sama di e kai mi “Masaa,” o go aini a Kownukondee fu hemel. Ma na a sama di e libi enke fa mi Dda di de a hemel wani, o go aini a Kownukondee ya.
22 A dei o doo di omen sama o taigi mi taki: “Masaa, a ná aini i nen u be e taki polofeititoli noh? A ná aini i nen u be e puu takuu yeye a sama tapu noh? A ná aini i nen u be e du omen wonduu* noh?”
23 Ma mio taigi den taki: “Mia sabi u, u gwe komoto ya, bika a soso ogii we du.”
24 Neen meke iniiwan sama di aliki mi, neen a du san mi taki, o de enke wan koniman di meke en osu a siton tapu.
25 Gaan alen kai, gaan wataa kon, gaan winta seefi wai naki a osu, tokuso aa kai. Bika a osu ya meke a siton tapu.
26 Ma efu wan sama yee san mi taki, neen aa du den sani ya, da a de enke wan donman di meke en osu a santi tapu.
27 Gaan alen kai, gaan wataa kon, gaan winta seefi wai naki a osu, neen ala a osu booko kai.’
28 Di Yesesi kaba taki, ala den sama foondoo fu a fasi fa a be e gi leli,
29 bika aa be e leli den enke den leliman fu a Weiti, ma a be e leli den enke wan sama di Gadu gi makiti.
A maiki
^ Aini Giikitongo den be taki: ‘parel.’
^ Luku a wowtu ‘wonduu’ na a pisi ‘San den wowtu ya wani taki.’