Den sani di Mateyesi sikiifi 8:1-34
8 Di Yesesi e saka komoto na a mongo, wan gaan kulu sama be e waka neen baka.
2 Neen wan gwasiman kon neen, a saka anga kini a doti neen a taki: ‘Masaa, efii wani, da gaantangi deesi mi baa.’
3 Yesesi langa ana holi a man, neen a taki: ‘Mi wani i betee.’ Faisi a taki a sani ya, a so a man betee.
4 Bakadati Yesesi taigi en taki: ‘Ya mu taigi nawan sama fai du betee. Ma go meke a pilisite luku i. Tyai wan ofaandi fu den pilisite si taki i betee, leti enke fa a Weiti fu Mosesi e taki.’
5 Di Yesesi go aini a foto Kaperna-um, wan suudati-edeman kon neen, neen a taigi en taki:
6 ‘Masaa, mi futuboi lan, a de didondidon aini mi osu. Ná pikin pen ai fii.’
7 Yesesi piki en taki: ‘Mio deesi en te mi kon ape.’
8 Ma a suudati-edeman piki en taki: ‘Masaa, mia bun sai fii kon a mi osu baa. A taki namo fii taki fu mi futuboi betee, da aw betee.’
9 Mi abi edeman a mi tapu, ma mi abi suudati a mi ondoo tu. Te mi taigi wan fu den taki: “Go anda.” Da ai go. Efu mi taigi wan taawan taki: “Kon.” Da ai kon. Efu mi taigi mi saafu taki: “Du a sani de.” Da ai du en.
10 Di Yesesi yee san a man taki, a foondoo. Neen a taigi den sama di be e waka neen baka taki: ‘Biibi mi, mia si wan sama aini Islayeli di biibi taanga enke a man ya.’
11 Mi e taigi u taki omen sama o komoto na a se pe a san e opo, anga a se pe a san e dongo. Den o kon sidon a tafaa makandaa anga Abalaham, Isaki, anga Yakopu aini a Kownukondee fu hemel.
12 Ma Gadu o fiingi den sama di be mu fende a Kownukondee fu hemel, gwa doose aini dunguu. Den o kee, da den kaw tifi te den de ape.
13 Neen Yesesi taigi a suudati-edeman taki: ‘Fu dii soi taki ye biibi, da sani o pasa enke fai taki.’ Faisi a taki a sani ya, a so a futuboi betee.
14 Di Yesesi gwa Peitilisi osu, a si a main fu Peitilisi didondidon a bedi, bika a be abi feba.
15 Neen meke Yesesi holi en ana. Di a du a sani ya, a feba saka. Bakadati a uman opo neen a bigin seeka sani fu nyan gi den.
16 Di neti tapu, den tyai omen sama kon neen di takuu yeye be e fooseli. Wan kodo sani namo a be e taki, da den yeye be e komoto a den sama tapu. A deesi ala den sama di be siki.
17 A so sani be pasa enke fa Gadu be meke polofeiti Yesaya taki. A be taki: ‘A meke u kon betee, a puu ala den sani di e meke we pina.’
18 Di Yesesi si taki omen sama lontu en, a taigi den disipel fi en fu den go na abaase.
19 Wan leliman fu a Weiti kon neen, neen a taigi en taki: ‘Leliman, mio waka ai baka winsi pe ye go.’
20 Ma Yesesi taigi en taki: ‘Busidagu abi olo pe den e tan. Den foo di e fee a tapu seefi abi den nesi. Ma a Manpikin fu libisama naabi nawan peesi fu siibi.’
21 Wan fu den bakaman fu Yesesi taigi en taki: ‘Masaa meke mi go beli mi dda fosi baa.’
22 Ma Yesesi piki en taki: ‘Tan waka a mi baka. Meke den dedewan beli den dedewan.’
23 Bakadati Yesesi anga den disipel fi en go aini wan boto.
24 Di den de aini a boto wan gaan winta bigin seke a wataa. Den balon be hei te, pikinmoo a boto sungu. A ten de Yesesi be e siibi.
25 Den go weki Yesesi, neen den taigi en taki: ‘Masaa yeepi u, wo dede.’
26 Ma a taigi den taki: ‘Saide we feele so? U biibi á taanga sai.’ Neen a opo go bali a winta anga a wataa. Bakadati ala sani koo pii.
27 Den disipel fi en foondoo te neen den taki: ‘Sama na a man ya? A ze anga a winta seefi e du san a taki.’
28 Di den doo abaase, na a pisi pe den Gadarasama e tan, tu man di be abi takuu yeye a den tapu, komoto a den geebi* mindii kon miti en. Den be ogii te, sama á be poi waka na a pasi de.
29 Den be e bali taki: ‘Manpikin fu Gadu, sai kon du ya? A kon i kon fu sitaafu u fosi a yuu fu Gadu doo?’
30 Wantu agu be de koosube e nyan.
31 Den takuu yeye begi en taki: ‘Efi yo puu wa den man ya tapu, da sende u go aini den agu.’
32 A taigi den taki: ‘U go.’ Neen den takuu yeye komoto a den tu man tapu go aini den agu. Bakadati ala den agu lon komoto a wan mongo ede, kai go dede aini a ze.
33 Den sama di be e luku den agu lon gwe. Di den doo aini a foto, den paati a taki. Den gi ala a toli fu den tu man di be abi takuu yeye a den tapu.
34 Neen ala den sama fu a foto waka go miti Yesesi. Di den si en, den begi en fu a sa komoto na a pisi kondee fu den.
A maiki
^ Luku a wowtu ‘geebi’ na a pisi ‘San den wowtu ya wani taki.’