Den sani di Mateyesi sikiifi 9:1-38
9 Bakadati Yesesi go aini a boto, neen a abaa gwa Kaperna-um a pe a be e tan.
2 Di a doo, sama tyai wan lanman di be didon a wan bedi* tapu kon neen. Di a si a biibi fu den sama, a taigi a man di lan taki: ‘Ná booko yu ede pikin, mi gii paadon fu den sondu fii.’
3 Ma wantu leliman fu a Weiti be e denki aini denseefi taki: ‘A man ya nai lesipeki Gadu.’
4 Ma Yesesi be sabi san den e denki. Neen meke a akisi den taki: ‘Saide a soso ogii we pakisei aini wi ati?
5 On di moo makiliki? Fu taigi wan sama taki: “Mi gii paadon fu den sondu fii”, efuso fu taigi en taki: “Opo taampu dai waka.”
6 Ma mi wani u sabi taki a Manpikin fu libisama abi a makiti a goontapu ya fu gi sama paadon fu den sondu.’ Neen a taigi a lanman taki: ‘Opo taampu, teke i bedi dai gwa osu.’
7 Neen a man opo go neen osu.
8 Ná pikin foondoo den sama foondoo di den si san pasa. Den bigin gafa Gadu, fu di a gi libisama a makiti fu du a sani ya.
9 Baka di Yesesi komoto de, a si wan man den e kai Mateyesi sidon na a kantoo pe sama e go pai lantimoni. Neen a taigi en taki: ‘Kon waka a mi baka*.’ Faisi a kai en, a opo, neen a bigin waka a Yesesi baka.
10 Bakadati omen sama di be e piki lantimoni anga sama di be e libi wan sondu libi be kon a Mateyesi osu. Den be sidon a tafaa e nyan anga Yesesi anga den bakaman fi en.
11 Di den Faliseiman* si a sani ya, den akisi den bakaman fu Yesesi taki: ‘Saide a leliman fu u e nyan anga sama di e piki lantimoni anga sama di e libi wan sondu libi?’
12 Yesesi yee den, neen meke a piki den taki: ‘Gusontu sama naabi dataa fanowdu, a siki sama abi dataa fanowdu.
13 U go pakisei a sani di Gadu taki. A be taki: “Mia wani ofaandi, a tyali-ati mi wani u soi.” Mia kon a goontapu gi bun sama, a sondu sama mi kon gi.’
14 Bakadati den bakaman fu Yohanisi* kon a Yesesi neen den akisi en taki: ‘Saide wi anga den Faliseiman e faste, ma den bakaman fii nai faste?’
15 Neen Yesesi taigi den taki: ‘Den mati fu wan man di e toow nai tyali te a de makandaa anga den, ná so noh? Ma a yuu o doo di a man di e toow naw de makandaa anga den moo, na a ten de fosi den o faste.
16 Nawan sama e nain nyun pisi koosi anga gaandiwan mokisa. Bika a nyun pisi koosi moo taanga, aw hali a gaandiwan piiti, da a piiti o bigi moo di be de kaba.
17 A letiso sama nai poti nyun win aini gaandi winsaka*. Efu den du a sani de, a winsaka o piiti, da a win o doo kai. Ma te sama poti nyun win aini nyun winsaka, da nawan fu den tu o poli.’
18 Aa kaba taki den sani ya seefi, neen wan fu den fesiman fu a foluku kon neen. A sutu kini a doti gi en gaandi, neen a taigi en taki: ‘A umanpikin fu mi musu dede kaba, ma gaantangi kon dai poti yu ana neen tapu baa, da aw kon a libi baka.’
19 Yesesi anga den bakaman fi en opo, neen den waka na a man baka.
20 Wan uman di be e lasi buulu 12 yali langa waka kon a Yesesi baka, neen a holi a koosi mofu fi en.
21 Bika a uman be e denki aini enseefi taki: ‘Winsi na a koosi fi en namo mi holi, mio betee.’
22 Di Yesesi daai, di a si a uman, a taigi en taki: ‘Ná booko yu ede mi umanpikin. A biibi fii meke i kon betee.’ Wantenwanten a uman betee.
23 Di Yesesi go aini a osu fu a man, a si wantu sama e pee poku, taawan e bali e kee.
24 Neen Yesesi taigi den taki: ‘U gwa doose, bika a meisyo á dede, a siibi ai siibi.’ Di a taki a sani ya, den kii en anga lafu.
25 Di ala den sama gwa doose, a go aini a kambaa pe a meisyo be didon neen a holi en neen ana. Di a du a sani ya, a meisyo opo.
26 A taki ya be paati na a hii pisi kondee de.
27 Di Yesesi komoto de, tu beendiman be e waka neen baka. Den be e bali taki: ‘Manpikin fu David, soi tyali-ati gi u baa.’
28 Baka di Yesesi go aini a osu, den beendiman kon neen, neen a akisi den taki: ‘We biibi taki mi poi meke u si?’ Den piki en taki: ‘Eeye, Masaa.’
29 A holi den ain, neen a taki: ‘Fu di we biibi meke sani o pasa leti enke faw taki.’
30 Faisi a taki a sani ya, den man bigin si wanten. Ma Yesesi wasikoi den taki: ‘Wa mu taigi nawan sama san pasa ye.’
31 Ma faisi den komoto de, a so den paati a taki na a hii pisi kondee de.
32 Di den tu man e gwe, sama tyai wan babawman di be abi wan takuu yeye neen tapu kon a Yesesi.
33 Baka di Yesesi puu a takuu yeye na a babawman tapu, a man bigin taki. Den sama foondoo te di den si a sani ya, neen den taki: ‘Fositoon u si sowan sani aini Islayeli.’
34 Ma den Faliseiman taki: ‘A Didibii* gi en a makiti fu puu takuu yeye a sama tapu.’
35 Bakadati Yesesi bigin waka na ala den gaan foto anga den pikin foto. A be e leli sama aini den snoga. A be e paati a bun nyunsu fu a Kownukondee tu. Winsi sowtu siki efuso mankei wan sama be abi, a be e deesi en.
36 Te a be si den somen sama, tyali fu den be e kisi en. Bika a be e si taki sama be e pina den. Den be de enke sikapu di naabi sikapuman.
37 Neen a taigi den bakaman fi en taki: ‘A nyanyan di lepi a goon ipi, ma wookoman á sai.
38 Neen meke u mu begi a Masaa fu a wooko fu a sende moo sama fu kon koti a nyanyan.’
A maiki
^ Efuso ‘daagi’.
^ Aini Giikitongo den be taki: ‘toon mi bakaman.’
^ Luku a wowtu ‘Faliseiman’ na a pisi ‘San den wowtu ya wani taki.’
^ Yohanisi a Dopuman.
^ Den saka ya be e meke anga metibuba.
^ Aini Giikitongo den be taki: ‘a fesiman fu den takuu yeye.’
