Wan biifi gi den Romesama 12:1-21
12 Den baala fu mi, Gadu soi tyali-ati gi u, neen meke mi e begi u fu gi Gadu u sikin enke wan ofaandi di santa. A ofaandi ya mu e meke Gadu piisii. A so wo man dini en anga u hii fusutan.
2 Ná libi enke den sama fu a goontapu ya moo, ma u mu kengi a fasi fa we denki fu u sa toon nyun sama. A so wo sabi san na a wani fu Gadu di bun, di naabi nawan fowtu, anga di e meke a piisii.
3 Ai bigi gi mi taki Gadu soi mi bun-ati. Neen meke mi e taigi u taki wa mu e si enke u bun moo taawan. Te we holi a pakisei taki a Gadu gi wi a biibi fu u, da a sani ya o yeepi u fu de anga kiin fusutan.
4 A omen pisi a sikin fu wi abi, ma den nai du aseefi wooko.
5 A so wi anga Kelestesi de enke wan sikin. Winsi faw de omen sama, tokuso ala wi abi useefi fanowdu.
6 Fu di Gadu abi bun-ati meke a gi ibiiwan fu wi a koni fu du son sani. Neen meke efu a polofeititoli u poi taki, da meke u taki polofeititoli anga a biibi di wi abi.
7 Efu a poi u poi yeepi taawan, meke u yeepi den. Efu a poi u poi leli taawan, meke u leli den.
8 Efu a taanga-sikin i poi gi taawan, gi den taanga-sikin. Efi ye gi taawan sani, gi den anga i hii-ati. A sama di e teke fesi mu e wooko taanga. A sama di e soi tyali-ati gi taawan, meke a du en anga ala piisii.
9 U mu lobi taawan anga u hii ati. U mu e buuse ogii. U mu e meke moiti fu du bun ala yuu.
10 U mu lobi useefi enke fa baala lobi denseefi. A yu mu de a fosiwan di e lesipeki taawan.
11 U mu e wooko taanga, wa mu lesi. Meke a santa yeye yeepi u fu de fayafaya. U mu wooko gi Yehofa* anga u hii ati.
12 A howpu di wi abi mu e meke u piisii. Holidoo te u de aini banowtu. U mu e begi naamo.
13 Paati san yu abi anga den baala* fii te den fuka. I mu abi a gwenti fu e bali wadaa gi taawan.
14 Te sama e du ogii anga i, ya mu fuuku den, ma i mu begi Gadu fu a belesi den.
15 Poolo anga den sama di e poolo. Kee anga den sama di e kee.
16 U mu e booko wi ede anga taawan enke fa we booko wi ede anga useefi. Wa mu e fii useefi, ma u mu abi sakafasi. Wa mu e si enke u koni moo ala sama.
17 Wa mu e pai ogii fu ogii, ma u mu e du sani di ala sama e si enke bun sani.
18 Du ala saw poi fu libi bun anga ala sama.
19 Efu wan sama du wan sani anga u, wa mu du en anga en baka, ma u mu fika en gi Gadu. Bika Gadu buku taki: ‘“A mio pai den, a mio puu atiboon a den tapu.” A so Yehofa* taki.’
20 Ma ‘efu angii e kii i feyanti, gi en wan sani fu nyan. Efu wataa e kii en, gi en wan sani fu diingi. Te ye du a sani ya da yo safu en ati*’.
21 Ná meke ogii wini i, ma i mu e du bun naamo, da yo wini a ogii.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘den santawan.’
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘da aw de enke i poti wan ipi koofaya neen ede.’
