Wan biifi gi den Romesama 13:1-14
13 Ala sama mu saka denseefi a lanti ondoo, bika nawan sama poi tii efu Gadu á gi en pasi. A Gadu seefi gi den pasi fu tii a omen fasi.
2 Neen meke iniiwan sama di e taangayesi lanti, e taangayesi Gadu, bika neen gi den a okasi fu tii. Sani o miti den sama di e taangayesi lanti.
3 Den sama di e tyai denseefi bun nai feele lanti, a den sama di e du ogii e feele lanti. Aa de fii feele lanti, bika efi ye tyai iseefi bun, den o gafa i.
4 A di Gadu wani sani waka bun gi u meke a poti den a wooko. Ma efi ye du ogii, dai mu feele den, bika den abi a leti anga a makiti fu sitaafu den sama di e du ogii. A den Gadu poti fu sitaafu den sama di nai tyai denseefi bun.
5 U mu saka useefi a den ondoo. A ná fu di den poi sitaafu u namo, ma u mu du a sani ya fu u sa abi wan kiin kosensi.
6 Neen meke we pai lantimoni tu. Ala yuu den e wooko gi a foluku. A so den e wooko gi Gadu.
7 Gi ala sama san den abi leti fu fende. Efii mu pai lantimoni, da pai lantimoni. Efu wan sama wani i lesipeki en, da lesipeki en. Efu wan sama wani i gi en gaandi, dai mu gi en gaandi.
8 Wa mu abi paiman a nawan sama, boiti a lobi di u mu lobi taawan. A sama di lobi taawan e du san a Weiti taki.
9 A Weiti e taki: ‘Ya mu waka gii man efuso yu uman, ya mu kii sama, ya mu fufuu, ya mu abi takuu giili gi taa sama sani.’ Den weiti ya anga ala den taa weiti de aini a weiti di e taki: ‘I mu lobi taa sama enke fai lobi iseefi.’
10 Efu u lobi taa sama, u naw du ogii anga den. Neen meke te u lobi taa sama, we du san a Weiti e taki.
11 U mu du a sani ya, bika u sabi taki a yuu doo fu u weki. Di u toon Yesesi bakaman, a yuu di u be mu fii be koosube, ma nownow a moo koosube.
12 A neti gwe bunbun kaba, dyonson dei o booko. Neen meke u mu fika den sani di u be e du aini a dunguu daw wei den fetisani fu a leti.
13 Ala yuu u mu e tyai useefi enke fa sama e tyai denseefi te a peesi kiin, bika den sabi taki taa sama e si den. Wa mu e gwa fesa pe sama e du ala sowtu sani, wa mu e diingi duungu, wa mu e hulu, wa mu e du sen sani*, wa mu e feti, wa mu e dyalusu anga taawan.
14 Ma u mu e meke moiti fu waka a Masaa Yesesi Kelestesi baka ala yuu. Wa mu e sidon pakisei fa wo du den sani di a sondu sikin fu u wani.
A maiki
^ Dati a te wan sama e tyai enseefi a wan fasi di e soi taki a nai lesipeki den weiti fu Gadu.
