Wan biifi gi den Romesama 14:1-23
14 Bali wadaa gi taawan winsi den biibi swaki. Wa mu kuutu den sama di nai denki enke u.
2 A sama di biibi taanga e nyan ala sani, ma a sama di biibi swaki e nyan soso guluntu.
3 A sama di e nyan ala sani á mu si enke a bun moo a sama di nai nyan ala sani. A sama di nai nyan ala sani á mu kuutu a sama di e nyan ala sani, bika Gadu teke a sama de tu.
4 Sama a yu fu kuutu a futuboi fu wan taawan? Na a Masaa fi en seefi e luku efu den sani di ai du bun gi en. Yehofa* o yeepi en fu du sani enke fa a wani.
5 Son sama e si enke son dei pelensipali moo son dei. Ma taawan e si enke ala dei na aseefi. Iniiwan sama mu e biibi taki den sani di ai biibi na a tuu.
6 A sama di e biibi taki son dei moo pelensipali, e du a sani ya fu Yehofa ede. A letiso a sama di e nyan ala sani e du a sani ya fu Yehofa ede. Ai gi en daa fu a nyanyan di a fende. A sama di nai nyan ala sani, e du a sani ya fu Yehofa ede tu. Enseefi e gi Gadu daa fu a nyanyan di a fende.
7 Nawan fu u e libi gi enseefi, nawan fu u e dede gi enseefi tu.
8 Bika efu u de a libi, we libi gi Yehofa*. Efu we dede, we dede gi Yehofa. Neen meke winsi u de a libi efuso u dede, wi a fu Yehofa.
9 Kelestesi kon dede gi u neen a kon a libi baka. A du a sani ya fu a be sa toon Masaa fu den sama di dede anga den sama di de a libi.
10 Saide ye kuutu i baala? Saide ye si enke i bun moo en? Bika na ala u Gadu o kuutu.
11 A sikiifi aini a wowtu fu Gadu taki: ‘Yehofa* taki: “Leti enke faw sa biibi taki mi de a libi, a so u sa biibi taki ala sama o boigi gi mi. Ala sama o abi fu taki a mi a Gadu.”’
12 Gadu o kuutu ala sama fu den sani di den du.
13 Neen meke wa mu kuutu taawan moo, ma u mu du ala saw poi fu wa du sani di o meke a biibi fu u baala swaki. Wa mu du sani fu meke u baala dyakata.
14 Fu di mi a wan bakaman fu Masaa Yesesi meke mi sabi taki nawan sani di we nyan tyobo. Ma efu wan sama e si enke wan sani á kiin, da aa mu nyan mi en.
15 Efi ye meke i baala dyakata fu di ye nyan wan nyanyan, da ya lobi i baala. Ya mu meke i baala dyakata* fu nyanyan ede, bika Kelestesi dede gi en tu.
16 Winsi ye si enke wan sani bun, ya mu du en efu a wan sani di o meke sama taki ogii fii.
17 A ná den sani di wan sama e nyan efuso diingi o meke a go aini a Kownukondee fu Gadu. Ma a mu e libi a wan letifasi, a mu e libi bun anga taawan, a mu e piisii tu fu di a santa yeye e yeepi en.
18 Efu wan sama e wooko enke saafu gi Kelestesi neen a abi den manii ya, da Gadu o piisii anga en. Libisama o piisii anga en tu.
19 Neen meke u mu e du ala saw poi fu libi bun anga taawan. U mu e meke moiti fu du sani di e gi den taanga-sikin tu.
20 Wa mu poli a wooko fu Gadu fu nyanyan ede. A tuu taki ala nyanyan bun fu nyan, ma efu wan nyanyan o meke taawan dyakata, wa mu nyan mi en.
21 A moo bun fu wa nyan meti, diingi win, efuso du iniiwan taa sani di sa meke u baala dyakata.
22 A yu anga Gadu mu sabi san ye biibi te a abi fu du anga den sani ya. Yo piisii tei kosensi nai fon i tei du wan sani.
23 Efu wan sama kosensi e taigi en taki aa mu nyan wan sani, ma a nyan mi en, da a wan sondu a du. Efu wan sama e du wan sani, ma a nai biibi taki a wan bun sani ai du, da a wan sondu ai du.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Efuso ‘ya mu tapu i baala fu fende a libi’.
