Wan biifi gi den Romesama 15:1-33
15 Wi di biibi taanga mu holi den swakifasi fu den wan di biibi á taanga a pakisei. Wa mu e denki useefi namo.
2 Ala u mu e du bun gi taawan. A so wo gi den taanga-sikin.
3 Leti enke fa a sikiifi aini Gadu buku, Kelestesi seefi á be e denki enseefi namo. Gadu buku taki: ‘Aseefi fasi fa sama kosi i, a so den kosi mi tu.’
4 Bika ala den sani di sikiifi a fositen be sikiifi fu leli u wan sani. Den sani di sikiifi aini Gadu buku e yeepi u fu holidoo, den e toosutu u, neen meke wi abi howpu.
5 A Gadu e yeepi u fu holidoo, neen e toosutu u. Neen meke mi e begi en fu a yeepi u fu denki enke Yesesi Kelestesi.
6 A so ala wo poi gafa Gadu makandaa, bika neen na a Dda fu u Masaa Yesesi Kelestesi.
7 U mu e bali wadaa gi taawan, leti enke fa Kelestesi bali wadaa gi u. A sani ya o meke sama gi Gadu gaandi.
8 Mi wani u sabi taki Kelestesi toon wan futuboi fu den sama di besnei* fu soi taki Gadu e du san a taki ala yuu. A sani di a du ya soi tu taki den sama ya be sa biibi den sani di Gadu be paamisi den afo fu den.
9 A sani ya be o meke den taa kondee sama gafa Gadu fu a tyali-ati fi en. Gadu buku taki: ‘Neen meke mio gafa yu a den taa kondee sama mindii, mio singi gafa i nen.’
10 A sikiifi aini Gadu buku tu taki: ‘Den taa kondee sama, u poolo makandaa anga a foluku fu Gadu.’
11 Wan taa pisi aini Gadu buku e taki: ‘Meke ala den taa kondee sama gafa Yehofa*, ala sama mu gafa en.’
12 Yesaya seefi be taki: ‘Wan sama fu a famii fu Isai o kon*. Neen o tii den taa kondee sama, da den o wakiti en fu a du bun gi den.’
13 Meke a Gadu di e gi sama howpu yeepi u fu piisii. A mu yeepi u fu abi freide fu di we fitoow en. Meke a kaakiti fu a santa yeye yeepi u fu a biibi fu u kon moo taanga.
14 Den baala fu mi, mi sabi taki u poi du bun, u sabi omen sani, u poi poti taawan a pasi tu.
15 Tokuso mi be abi fu taki kiin fu son sani anga u aini a biifi di mi sende gi u. A fu di Gadu soi mi bun-ati meke mi be wani membee u den sani ya.
16 Mi a wan futuboi fu Kelestesi gi den taa kondee sama. Mi e wooko taanga fu paati a bun nyunsu fu Gadu. A wooko ya a wan santa wooko. Mi e du a wooko ya fu Gadu sa teke den taa kondee sama enke wan ofaandi di bun gi en fu di a santa yeye meke den santa.
17 Neen meke mi e piisii fu du a wooko fu Gadu enke bakaman fu Kelestesi Yesesi.
18 Mi naw taki fu nawan fu den sani di miseefi du. Ma mio taki fu den sani di Kelestesi meke mi du, anga den sani di a meke mi taki fu yeepi den taa kondee sama fu aliki en.
19 Den aliki fu di den si den wonduu anga den gaan sani di a yeye fu Gadu meke mi du. Na a sani ya meke mi be poi paati a bun nyunsu fu Kelestesi finifini, komoto a Yelusalem te doo Iliriya.
20 Mi be e meke moiti fu mia paati a bun nyunsu a peesi pe sama be sabi Kelestesi kaba, bika mia be wani go doo anga a wooko di wan taa sama be bigin*.
21 Bika Gadu buku taki: ‘Den sama di á yee sani fi en, o si en. Den sama di á be yee fi en, o fusutan.’
22 Na a sani ya be tapu mi omen leisi fu kon a wi anda.
23 Ma nownow mi kaba peleiki na ala den peesi pe mi be mu peleiki. Neen meke mi sa kon aw, bika a omen yali kaba mi e angii fu kon aw.
24 Mi wani kon luku u di mio de a pasi e gwa Sipanyookondee. Mio piisii fu de makandaa anga u. Mi be sa wani u poti mi afu pasi te mi e gwe.
25 Nownow mio gwa Yelusalem fu go yeepi den baala* fu mi anda.
26 Bika anga ala piisii den baala anga sisa fu Masadoniya anga Akaya sende san den be abi fu yeepi den pootiman di e dini Gadu a Yelusalem.
27 A tuu taki den be e piisii fu yeepi den, ma fu taki en kiin den be abi fu du a sani ya. Bika a foluku fu Gadu a Yelusalem be paati ala san Gadu be gi den anga den taa kondee sama. Neen meke den taa kondee sama be abi fu paati san den abi anga den.
28 Nownow mio tyai den sani di den baala anga sisa gi mi go gi den baala fu Yelusalem. Bakadati mio kon luku u te mi de a pasi e gwa Sipanyookondee.
29 Mi sabi taki te mio kon aw, mio tyai omen belesi fu Kelestesi kon gi u.
30 Den baala fu mi, fu di we biibi Masaa Yesesi Kelestesi, anga fu di a santa yeye e yeepi u fu lobi useefi, meke mi e begi u fu begi Gadu fayafaya gi mi.
31 U begi gi mi fu den sama fu Yudeya di nai biibi Yesesi á tapu mi fu du san mi mu du. U begi gi mi tu taki den baala fu Yelusalem sa poolo anga den sani di mio tyai go gi den.
32 Efu Gadu wani, da mio poolo fu kon a wi anda fu u sa gi makandaa taanga-sikin.
33 Meke a Gadu di e gi sama freide de anga u. Amen.
A maiki
^ Dati a te den be e koti a fesise buba fu a senpeesi fu wan mannengee puu.
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘a lutu fu Isai.’
^ Efuso ‘mia be wani meke osu na a fondamenti fu wan taa sama tapu’.
^ Aini Giikitongo den be taki: ‘santawan.’
