Wan biifi gi den Romesama 16:1-27
-
Pawlesi e taki fu wan sisa den e kai Feibe. A sisa ya e wooko taanga gi Masaa (1, 2)
-
Pawlesi e sende odi gi den Kelesten a Rome (3-16)
-
Pawlesi e wasikoi den baala anga sisa fu luku bun anga den sama di e tyai paati libi kon aini a kemeente (17-20)
-
Den sama di e wooko makandaa anga Pawlesi e sende odi gi a kemeente (21-24)
-
A santa kibii toli kon a kiin (25-27)
16 Gaantangi u bali wadaa gi u sisa Feibe. A sisa ya e wooko taanga aini a kemeente fu Kenkreya.
2 U bali wadaa gi en leti enke faw be o bali wadaa gi den santawan. U yeepi en anga ala san a abi fanowdu, bika enseefi yeepi omen sama, mi a wan fu den sama ya.
3 Gi Priska anga Akwila odi gi mi ye. Den e du a wooko fu Kelestesi Yesesi makandaa anga mi.
4 Den be de kabakaba fu dede gi mi. Mi anga ala den taa kondee sama di e dini Gadu* e gi den daa.
5 Gi a kemeente di e kon makandaa aini den osu odi gi mi. Gi Epineitus odi gi mi tu. En a wan fu den fosi sama fu Asiya di toon wan bakaman fu Kelestesi.
6 Gi Maliya odi. Enseefi be wooko taanga gi u.
7 Gi Andonikus anga Yuniyas odi gi mi. Mi anga den a famii. A mi anga den be de a sitaafu-osu makandaa. Den apostel sabi den man ya enke sama di e tyai denseefi bun. Den man ya toon bakaman fu Kelestesi omen ten fosi mi.
8 Gi mi mati Ampliatus odi gi mi. Enseefi a wan bakaman fu Masaa.
9 Gi Urbanus odi gi mi. A wi anga en e wooko taanga gi Masaa. Gi mi mati Stakis odi gi mi tu.
10 Gi Apelesi odi gi mi, a abi wan bun nen a Kelestesi. Gi den sama aini a osu fu Aristobulus odi gi mi tu.
11 Gi Herodiyon odi gi mi. Mi anga en a famii. Gi den sama aini a osu fu Narsisus di e waka a Masaa baka odi gi mi tu.
12 Gi Trifeina anga Trifosa odi gi mi. Den uman ya e wooko taanga gi Masaa. Gi u lobi sisa Perses odi tu, bika enseefi wooko taanga gi Masaa.
13 Gi Rufus di e wooko taanga gi Masaa odi gi mi. Gi en mma odi tu, a uman ya de enke wan mma gi mi.
14 Gi Asenkritus, Fleigon, Hermes, Patrobas, Hermas, anga den taa baala di de makandaa anga den odi gi mi.
15 Gi Filolokus anga Yuliya, Nerus anga en sisa, Olimpas, anga den santawan di de makandaa anga den odi gi mi.
16 Anga ala piisii u mu bali wadaa gi useefi*. Ala den kemeente fu Kelestesi e sende odi gi u.
17 Den baala fu mi, mi e begi u fu luku bun anga den sama di e tyai paati libi kon aini a kemeente, efuso di e meke taawan dyakata fu di den e leli den falisi sani. Wa mu paa anga den sama ya.
18 Den sama ya a ná saafu fu u Masaa Kelestesi, ma den a saafu fu den fii fu den. Den e koli sama anga den switi taki fu den.
19 Ala sama e si taki we aliki Gadu, a sani ya e meke mi piisii. Mi wani u de sama di koni fu u sa du san bun, mia wani u du ogii.
20 Dyonson a Gadu fu freide o meke u masi Saatan anga u futu. Meke u Masaa Yesesi soi bun-ati gi u.
21 Timotiyesi sende odi gi u, a mi anga en e wooko makandaa. Lusiyus, Yason, anga Sosipater sende odi gi u tu. Den man ya a mi famii.
22 Tersiyus di mi meke sikiifi a biifi ya gi mi, e sende odi gi u tu aini a nen fu Masaa.
23 Gayus di holi mi neen osu, anga a kemeente di e kon makandaa aini en osu sende odi gi u. Erastus a man di e luku den moni toli fu a foto, anga en baala Kwartus sende odi gi u tu.
24 *——
25 Den sani di we leli sama fu Yesesi Kelestesi anga a bun nyunsu di mi e paati, e soi taki Gadu poi taanga u. A bun nyunsu ya e taki fu a santa kibiitoli di Gadu yeepi sama fu fusutan. A toli ya be kibii omen tenti yali.
26 Ma den sani di den polofeiti be taki aini den santa buku meke u kon sabi a santa kibiitoli ya. A Gadu di e libi fu teego sende u fu paati a santa kibiitoli ya gi den taa foluku fu den sa biibi en da den du san a taki.
27 Na a Gadu ya di abi ala koni, mu fende gaandi fu teego anga yeepi fu Yesesi Kelestesi. Amen.
A maiki
^ Efuso ‘den kemeente pe den taa kondee sama de’.
^ Aini Giikitongo den be taki: ‘santa bosi.’
^ Son Beibel abi a vers ya, ma aa de aini omen fu den pelensipali Giiki bukulolo.
