Wan biifi gi den Romesama 4:1-25
4 Da saw sa taki fu wi afo Abalaham?
2 Efu a den sani di Abalaham du meke a toon wan leti-ati sama, da a be sa gafa, ma aa be o poi gafa a Gadu fesi.
3 Gadu buku e taki: ‘Abalaham be e biibi Yehofa*, neen meke a be e si en enke wan sama di e libi a wan letifasi.’
4 Efu den pai wan sama di du wan wooko, da a ná bun-ati den soi gi en, ma a fu di a wooko meke den pai en.
5 A ná den sani di wan sama e du e meke Gadu e si en enke wan sama di e libi a wan letifasi. Ma a di ai biibi meke Gadu e si en enke wan sama di e libi a wan letifasi, winsi fa a abi sondu.
6 David seefi be taki a ná den sani di wan sama e du e meke a de koloku, ma a te Gadu e si en enke wan sama di e libi a wan letifasi. A be taki:
7 ‘Koloku fu den sama di fende paadon fu den sondu, anga den sama di Gadu wasi den sondu fu den puu*.
8 Koloku fu a sama di Yehofa* nai pakisei den sondu fi en moo.’
9 A den sama di besnei* wawan o fende a koloku ya? Den sama di á besnei naw fende en tu noh? Bika we taki: ‘Abalaham be e biibi, neen meke Gadu be e si en enke wan sama di e libi a wan letifasi.’
10 On ten Gadu be si en enke wan sama di e libi a wan letifasi? A fosi a besnei* efuso baka di a besnei? We a ten de aa be besnei ete.
11 A bakaten fosi Gadu taigi Abalaham taki a be mu besnei*. A sani ya be o de enke wan maiki fu soi taki Gadu be e si en enke wan sama di e libi a wan letifasi kaba fosi a be besnei. A so Abalaham be o toon a dda fu ala den sama di e biibi winsi den á besnei. Gadu e si ala den sama ya enke sama di e libi a wan letifasi.
12 Abalaham be o toon a dda fu den sama di besnei* tu. A ná den sama ya wawan dda a be o toon, ma a be o toon a dda fu ala sama di e biibi leti enke en. U dda Abalaham be e biibi fosi a be besnei.
13 A ná fu di Abalaham anga den bakapikin fi en be e wooko anga san a Weiti e taki, meke Gadu be paamisi en taki a be o fende a goontapu enke gudu. Ma a fu di a be e biibi meke a fende den sani di Gadu paamisi en, bika Gadu be e si en enke wan sama di e libi a wan letifasi.
14 Neen meke efu a den sama di e du san a Weiti e taki o fende den sani di Gadu paamisi, da a fu soso we biibi. Da a sani di Gadu paamisi o de fu soso tu.
15 Efu wan sama nai du san a Weiti e taki, Gadu o sitaafu en. Ma sama á poi pasa wan weiti efu weiti á de.
16 Na a biibi fu Abalaham anga a bun-ati fu Gadu meke Gadu be meke wan kuudei anga en. Ala den bakapikin fu Abalaham be o fende a sani di Gadu paamisi en. A ná den sama di e du san a Weiti e taki namo o fende a sani di Gadu paamisi, ma den sama di e biibi leti enke u dda Abalaham o fende en tu.
17 (A sikiifi aini Gadu buku taki: ‘Mi meke i toon a dda fu omen foluku.’) Abalaham soi a Gadu fesi taki ai biibi. Na a Gadu ya e meke dedesama kon a libi baka. Te ai taki fu sani di á pasa ete da a leti enke den pasa kaba.
18 Winsi fa a be e gei enke howpu á be de moo taki Abalaham be o meke pikin, toku a be e biibi taki a be o toon a dda fu omen foluku enke fa Gadu be taki. A be taigi en taki: ‘Yo abi omen bakapikin.’
19 Winsi fa Abalaham biibi á be swaki, toku a be e si enke aa be o poi meke pikin moo, bika a be gaandi kaba, a wan sani fu 100 yali a be abi. A be sabi taki Sala seefi á be poi meke pikin moo.
20 Ma a fu di Gadu meke wan kuudei anga en meke a be e biibi a sani di Gadu taigi en. A biibi fi en meke a fende kaakiti, a so a gi Gadu gaandi.
21 A be e biibi anga en hii ati taki Gadu be poi du a sani di a be paamisi en,
22 neen meke ‘Gadu be e si en enke wan sama di e libi a wan letifasi’.
23 Den wowtu ‘Gadu be e si en enke wan sama di e libi a wan letifasi’ nai teli gi Abalaham wawan,
24 ma den e teli gi u tu. Gadu o si wi enke sama di e libi a wan letifasi fu di we biibi en. Neen na a sama di meke Masaa Yesesi kon a libi baka.
25 Gadu gi pasi fu den kii Yesesi fu den sondu fu wi ede. A kon a libi baka fu Gadu be sa si wi enke sama di e libi a wan letifasi.
A maiki
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘Gadu tapu den sondu fu den.’
^ Luku a wowtu ‘Yehofa’ na a pisi ‘San den wowtu ya wani taki.’
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.
^ Dati a te den be e koti a fesise buba fu a senpeesi fu wan mannengee puu.