Wan biifi gi den Romesama 7:1-25
7 Mi baala, wa sabi taki solanga wan sama de a libi a Weiti e basi en noh? (anga den sama di sabi a Weiti mi e taki.)
2 A Weiti e taki wan uman mu tan anga en man solanga en man de a libi. Ma efu a man dede, da a uman naafu holi den weiti fi en man moo.
3 Efu a uman toow anga wan taa man sondee fi en man dede da a waka a waka gi en man. Ma efu en man dede neen a uman toow anga wan taa man, da a ná waka a waka gi en man, bika a naafu holi den weiti fi en man moo.
4 We baala, a so a de anga u tu. Fu di Kelestesi dede gi u, meke u naabi fu wooko anga a Weiti moo. Nownow wi a fu Kelestesi, a sama di weki baka. Neen meke u mu e du sani di Gadu lobi.
5 Bika di u be e du sani enke fa a sondu sikin wani, a Weiti be soi u kiin san a den sondu fii di de aini u sikin. Den sani ya be o tyai dede gi u bakaten.
6 Ma nownow u fii bika wa de na a Weiti ondoo moo. Nownow u nai du sani moo enke fa a be sikiifi aini a Weiti, ma we dini Gadu enke saafu a wan nyun fasi enke fa a yeye soi u.
7 Dati wani taki a Weiti á bun? Nono. Bika efu a ná be fu a Weiti, mia be o sabi san a sondu. Efu aa be sikiifi aini a Weiti taki: ‘Ya mu abi takuu giili gi taa sama sani,’ mia be o sabi taki a sani ya a wan ogii.
8 Ma a weiti ya soi mi kiin taki ala sowtu takuu giili de aini mi ati. A soi mi taki a sani ya a wan sondu. Ma di weiti á be de, mia be sabi san a sondu.
9 Di mia be sabi a Weiti, mi be de a libi, ma di mi kon sabi a Weiti, sondu kon a libi neen mi dede.
10 Mi kon si taki a weiti di be mu yeepi mi fu tan a libi, neen tyai dede gi mi.
11 Bika a Weiti meke mi kon sabi san a sondu. Sondu koli mi neen a kii mi.
12 A Weiti santa, den sani di de aini a Weiti seefi santa. Den e kuutu sani a wan letifasi, den bun tu.
13 Da a sani ya wani taki wan bun sani tyai dede gi mi? Nono! A sondu tyai dede kon gi mi. A Weiti bun, ma a soi kiin taki a sondu tyai dede gi mi. A soi kiin tu taki sondu a ná wan bun sani.
14 U sabi taki Gadu koboloiki a yeye fi en fu gi wi a Weiti, ma mi a libisama, wan saafu fu sondu.
15 Mi nai fusutan san mi e du, bika mi nai du a sani di mi wani, ma na a sani di mi e buuse neen mi e du.
16 Mi e biibi taki a Weiti bun, ma tokuso a den sani di mia wani du, a den mi e du.
17 Ma a ná miseefi e du den sani ya, ma na a sondu di de aini mi e du den sani ya.
18 Mi sabi taki nawan bun sani de aini a sondu sikin fu mi. Winsi fa mi wani du san bun, tokuso mia poi du san mi wani.
19 A ná den bun sani di mi wani mi e du, ma a den ogii di mia wani du, a den mi e du.
20 Neen meke efu mi e du den sani di mia wani du, da a ná miseefi e du den, ma na a sondu di de aini mi e du den sani ya.
21 Mi kon si taki wan weiti de aini mi, te mi wani du bun, da a fii fu du ogii e de aini mi.
22 Mi lobi den weiti fu Gadu tuutuu aini mi ati.
23 Ma mi e si taki wan taa weiti de aini mi sikin di e feti anga a weiti fu mi fusutan. A weiti ya na a sondu di de aini mi sikin. A weiti ya e basi mi.
24 A ogii-ede mi abi so! Sama o fii mi fu a sikin ya di e tyai mi go kii?
25 Mi e gi Gadu daa, bika a meke Yesesi Kelestesi, a Masaa fu u fii mi. Anga mi fusutan mi a saafu fu den weiti fu Gadu, ma anga mi sikin mi a wan saafu fu sondu*.
A maiki
^ Aini Giikitongo den be taki: ‘wan saafu fu a weiti fu sondu.’
