Wan biifi gi den Romesama 8:1-39
8 Neen meke Gadu naw kuutu den sama di de wan anga Yesesi Kelestesi.
2 A weiti fu a yeye meke u fende libi fu u sa de wan anga Kelestesi Yesesi. Na a weiti ya fii wi fu sondu anga dede.
3 A Weiti fu Mosesi á be poi fii wi, bika libisama swaki, wi abi sondu. Ma Gadu fii wi di a sende en wan kodo Manpikin kon enke libisama fu puu sondu gi u. A so Gadu kuutu a sondu di de aini libisama sikin.
4 A du a sani ya fu u sa du sani a wan letifasi enke fa a Weiti e taki. Neen meke u nai du san a sondu sikin wani, ma we du san a yeye fu Gadu wani.
5 Bika den sama di e libi enke fa a sondu sikin wani e poti pakisei a sani di á bun, ma den sama di e libi enke fa a yeye wani e poti pakisei a den sani fu a yeye.
6 Te wan sama e poti pakisei a den sani di a sondu sikin wani, da aw tyai dede gi en. Ma te wan sama e poti pakisei a den sani fu a yeye, da aw fende libi. Sani o go bun anga en tu.
7 Te we meke a sondu sikin tii a fasi fa we denki we toon Gadu feyanti, bika a sondu sikin nai du san den weiti fu Gadu taki. Aa poi du a sani ya.
8 Den sama di e du san a sondu sikin wani á poi meke Gadu piisii.
9 Ma baala, efu a yeye fu Gadu de aini u, u naw tyai useefi enke fa a sondu sikin wani, ma wo tyai useefi enke fa a yeye wani. Na a taase efu wan sama naabi a yeye fu Kelestesi, da a sama ya a ná fu Kelestesi.
10 Ma efu wi anga Kelestesi a wan, da a yeye o meke u de a libi fu di Gadu e si wi enke leti-ati sama winsi a sikin fu wo dede.
11 Na a yeye fu Gadu meke Yesesi kon a libi baka. Efu a yeye ya de aini u, da a sama di weki Yesesi puu a dede, o meke a sikin fu u di e dede kon a libi baka anga a yeye fi en di de aini wi.
12 Neen meke baala, wa mu meke a sondu sikin fu u dwengi u fu du san a wani.
13 Bika efu we du san a sikin wani wo dede. Ma efu u meke a yeye yeepi u fu kii den sani di a sikin wani u du, wo fende libi.
14 Bika ala den sama di e meke a yeye fu Gadu tii den a Gadu manpikin.
15 Wa fende wan yeye di e meke u toon saafu efuso di e meke u feele. Ma ai meke u toon Gadu manpikin. Ai meke u bali: ‘Abba, dati wani taki Nda!’
16 Na a yeye fu Gadu seefi soi u taki wi a Gadu pikin.
17 Efu wi a Gadu pikin, dati wani taki a wo fende den gudu fu Gadu makandaa anga Yesesi. Ma u mu nyan pina makandaa anga Kelestesi tu fu u sa fende gaandi makandaa anga en.
18 Mi sabi taki a pina di we pina nownow, a soso sani te u maiki en anga a gaandi di wo fende.
19 Ala den sani di Gadu meke á poi wakiti fu a ten doo te den manpikin fu Gadu o fende gaandi.
20 Bika den sani di Gadu meke toon soso sani, ná fu di denseefi be wani, ma a fu di Gadu gi pasi meke den kon de so. Tokuso a gi den howpu,
21 bika a sabi taki den sani di a meke o fii fu a sikin di e dede. Den o fii enke pikin fu Gadu.
22 U sabi taki te anga now ala den sani di Gadu meke e geme, den e tyotyo.
23 Nownow wi abi a santa yeye, disi na a fosi pisi fu den sani di wo fende aini a ten di e kon. Useefi e geme aini wi ati. We angii fu a ten di Gadu o meke u toon en manpikin, fu di a meke Kelestesi kon pai gi u fu fii wi.
24 A di Gadu fii wi, meke u fende a howpu ya. Te wan sama fende wan sani, a nai howpu fu fende a sani de moo.
25 Ma te we howpu fu fende wan sani di wa fende ete, we wakiti en anga pasensi.
26 Boiti dati, a yeye e yeepi u te u swaki. Son yuu u nai sabi saw mu taki te we begi. Te we geme aini wi ati, da a yeye seefi e taki gi u.
27 Gadu e ondoosuku wi ati, a sabi san a yeye e akisi gi den santawan, bika a yeye e akisi sani di e kai anga a wani fu Gadu.
28 U sabi taki Gadu e meke ala sani wooko makandaa fu sani sa waka bun gi den sama di lobi en. A den sama ya a kai fu du san a abi a pakisei.
29 A be sabi a fesi kaba sama a be o teke. Den sama ya be o de enke en Manpikin. En Manpikin na a fosiwan fu ala den baala fi en.
30 Den sama di a teke, a den sama di a kai. Den sama di a kai, a den sama di ai si enke leti-ati sama. Den sama di ai si enke leti-ati sama, a den sama de a gi gaandi.
31 Da saw sa taki? Efu Gadu de anga u, da sama sa feti anga u te da a wini?
32 Gadu á mombii wi a wan kodo Manpikin fi en, ma a meke a kon dede gi ala u. Da wa si enke a poi gi wi ala den taa sani di wi abi fanowdu anga en hii ati noh?
33 Sama o poi kuutu den sama di Gadu kai? Nawan sama, bika a Gadu seefi e teli den enke leti-ati sama.
34 Sama o kuutu den? Nawan sama. Bika a Yesesi Kelestesi na a sama di dede neen a weki baka. A sidon a Gadu letise-ana. Neen e taki anga Gadu gi u.
35 San poi tapu Kelestesi fu lobi u? Banowtu, tyotyo, tesi, angii, pina*, ogii efuso feti poi tapu Kelestesi fu lobi u?
36 Gadu buku taki: ‘A fi yu ede meke den e suku fu kii wi ala yuu, den e si wi enke sikapu di sama e tyai go kii.’
37 Ma winsi fa ala den sani ya e pasa, toku u sabi taki wo wini fu di a sama di lobi wi e yeepi u.
38 Bika mi sabi taki sani á de di poi tapu Gadu fu lobi u. Dede á poi, libi seefi naw poi, nawan engel, nawan tiimakiti, nawan sani fu a ten ya efuso fu a ten di e kon, nawan kaakiti,
39 nawan sani di hei, nawan sani di dipi, efuso iniiwan taa sani di Gadu meke poi tapu Gadu fu lobi u. Na aseefi fasi ya Yesesi Kelestesi, a Masaa fu u lobi u tu.
A maiki
^ Aini Giikitongo den be taki: ‘soso sikin.’
