Toli fu den Apostel 12:1-25
12 A ten de, Kownu Herodes bigin du omen ogii anga son wan fu den sama aini a kemeente.
2 A meke sama kii Yakowbesi, a baala fu Yohanisi anga fetihow.
3 Di a si taki a sani ya be switi gi den Dyu, a meke sama sooto Peitilisi tu. A sani ya pasa na a pisiten di den be e holi a fesa fu beele sondee sowda.
4 A meke sama kisi Peitilisi tyai go sooto, neen a poti fo kulu fu fo suudati fu holi wakiti gi en. A be o holi Peitilisi ape te enke a Paskafesa be pasa, da a be o tyai en go na a foluku fesi fu kuutu en.
5 A ten di Peitilisi de a sitaafu-osu, den baala anga sisa aini a kemeente be e begi Gadu fayafaya gi en.
6 A neti fosi Herodes be o tyai Peitilisi gwa kuutu, Peitilisi be didon e siibi a tu suudati mindii. Den be bui den tu se ana fi en. Suudati be taampu e holi wakiti a doose fu a kambaa pe den be sooto Peitilisi tu.
7 Ma wanboowanboo so wan engel fu Yehofa kon ape, neen wan faya kiin a peesi pe Peitilisi be de. A engel sekeseke Peitilisi, neen a taigi en taki: ‘Opo gawgaw!’ Di a taki so neen den bui kai komoto a Peitilisi ana.
8 A engel taigi en taki: ‘Wei i koosi, dai toosi i susu ai futu.’ Baka di Peitilisi du den sani ya, a engel taigi en taki: ‘Wei i dyakiti, dai tan waka a mi baka.’
9 Peitilisi waka komoto aini a kambaa pe den be sooto en, neen ai waka na a engel baka, ma aa be sabi taki den sani di a engel be e du be e pasa tuutuu, a be denki a deen a be e deen.
10 Den waka pasa a fosi kulu suudati, anga du fu tu kulu te enke den doo a gaan ayee doo fu a sitaafu-osu. Di den doo ape, a doo opo sondee fu den holi en. Di den gwa doose, den waka go aini wan pasi, neen Peitilisi á si a engel moo.
11 A no fosi Peitilisi fusutan san be e pasa, neen a taki: ‘Yehofa sende en engel fu kon puu mi a Herodes ana, fu den ogii di den Dyu be denki o miti mi, á miti mi.’
12 Di a fusutan san pasa, a go na a osu fu Maliya, a mma fu Yohanisi di sama sabi enke Malikisi. A omen bakaman fu Yesesi be de ape e begi.
13 Di Peitilisi koko a doo, wan meisyo den e kai Roda kon luku sama be de na a doomofu.
14 Di a yee a siten fu Peitilisi, a poolo te neen a feegete fu opo a doo gi en. A lon go a inise go taigi den sama taki Peitilisi de a doose.
15 Den taigi en taki: ‘Yu ede nai wooko bun meisyo.’ Ma a be e taigi den namo taki Peitilisi de na a bakadoo, neen meke den taki: ‘Da a wan engel.’
16 A yuu ten de Peitilisi de a doose e koko a doo ete. Di den opo a doo, ná pikin dyombo den dyombo di den si en.
17 Ma a soi den anga ana taki den mu de pii. Baka di a taigi den finifini fa Yehofa puu en aini a sitaafu-osu, a taigi den taki: ‘U mu taigi Yakowbesi anga den taa baala san pasa.’ Bakadati a komoto ape, neen a gwa wan taa peesi.
18 Di peesi kiin, den suudati buuya, bika den á be sabi pe Peitilisi de.
19 Herodes meke sama suku Peitilisi na ala se. Di den á fende en, a poti omen akisi gi den suudati di be e holi wakiti gi Peitilisi, neen a meke den sitaafu den. Bakadati Herodes komoto a Yudeya gwa Sesareya, neen a tan ape wan pisiten.
20 Herodes ati be boon a den sama fu Tirus anga Sidon. Neen meke den begi Blastus, a fesiman fu a osu fu a kownu fu a seeka sani gi den fu den anga a kownu sa miti, bika a den kondee di Herodes be e tii be e sende nyanyan gwa Tirus anga Sidon. Di den miti a kownu, den begi en fu en ati á boon a den moo.
21 Wan dei Herodes wei en kownu koosi, neen a go sidon na a sutuu pe a gwenti sidon fu koti kuutu, neen a bigin taki anga a foluku.
22 Den sama di be de ape bigin bali taki: ‘A wan gadu e taki ya, a ná libisama!’
23 Neen wanboowanboo wan engel fu Yehofa meke woon nyan Herodes kii, bika a teke a gafa di Gadu be mu fende.
24 A wowtu fu Yehofa be e paati na ala se. A omen sama be e toon Yesesi bakaman.
25 Baka di Barnabas anga Sawlesi tyai ala san den be fende go gi den baala anga sisa a Yelusalem, den daai go na Antiokiya baka. Den meke Yohanisi di sama be sabi enke Malikisi go anga den tu.
