Toli fu den Apostel 13:1-52
13 Wantu polofeiti anga leliman be de aini a kemeente fu Antiokiya. Den man ya a be, Barnabas, Sawlesi, Simeyon di sama be sabi enke Niger, Lusiyus fu Sireine, anga Manayen di be gwa sikoo anga Kownu Herodes.
2 A pe den be e faste* e begi Yehofa* de, neen a santa yeye taigi den taki: ‘Sende* Barnabas anga Sawlesi fu go du a wooko di mi teke den fu du.’
3 Baka di den faste*, den begi neen den poti ana a den tapu. Bakadati den sende den gwe.
4 A so den man ya di a santa yeye be poti a wooko teke pasi gwa Selusiya, bakadati den gwa Siprus.
5 Di den doo Salamis, den bigin paati a wowtu fu Gadu aini den snoga* fu den Dyu. Yohanisi di sama be sabi enke Malikisi be de makandaa anga den tu fu yeepi den.
6 Den peleiki na a hii tabiki de te neen den go doo wan peesi den e kai Pafos. Den miti wan Dyu man ape di den be e kai Bar-Yesesi. A man ya be e du tofuuwooko, en a be wan falisi polofeiti.
7 A be e wooko gi wan tiiman fu Rome den be e kai Sergiyus Paulus. A man ya a be wan koniman. A man ya be wani yee a wowtu fu Gadu, neen meke a kai Barnabas anga Sawlesi kon neen.
8 Ma Elimas* be bigin du omen sani fu tapu a tiiman ya fu aliki a wowtu fu Gadu. (A nen Elimas wani taki tofuuman.)
9 A yeye fu Gadu kon a Sawlesi tapu. Sama be sabi a man ya enke Pawlesi tu. Sawlesi luku a tofuuman duun neen a taki:
10 ‘Manpikin fu Didibii, a soso bidiigi anga ogii de aini yu ede. Ya lobi te sani e waka a wan letifasi. Saide ye daai den tuu leli fu Yehofa*?
11 We tide Yehofa* o sitaafu i, yo beendi, a wan hii pisiten i naw si a san.’ Faisi a kaba taki, a so a man ain bigin dunguu fu te enke a nai si sani moo. A kon fu ai waka e fiifii e suku sama fu tyai en puu de.
12 Di a tiiman si san pasa, a toon wan bakaman fu Yesesi wanten, bika den leli fu Yehofa* di a be yee be meke a foondoo.
13 Pawlesi anga den sama di be de anga en teke boto komoto a Pafos gwa Perga aini Pamfiliya. Ma Yohanisi di sama be sabi enke Malikisi fika den ape, neen a daai gwa Yelusalem baka.
14 Di den komoto a Perga, den go na Antiokiya aini Pisidiya. Di a Sabadei doo, den go aini a snoga*, neen den go sidon.
15 Baka di den leisi a Weiti anga den buku fu den polofeiti gi ala sama, den fesiman fu a snoga* taigi Pawlesi anga Barnabas taki: ‘Baala, efu wi abi wan sani fu taki fu gi den sama taanga-sikin, u sa taki.’
16 Pawlesi opo taampu, neen a soi den sama anga ana taki a wani taki wan sani. Bakadati a taki:
‘Islayelisama, anga ala taa sama di e lesipeki Gadu, wi aliki.
17 A Gadu fu Islayeli teke den afo fu u, neen a meke den toon wan pelensipali foluku, a pisiten di den be e tan a Egepte enke taa kondee sama. A tyai den puu a Egepte anga a kaakiti fi en.
18 A wan sani fu 40 yali langa den be de aini a sabana. En ati á be e boon gaw te den be e du sani di aa lobi.
19 Baka di a kii seibin fu den foluku di be e tan aini Kaana-an, a gi den afo fu wi a kondee ya enke wan gudu.
20 Ala den sani ya pasa aini wan pisiten fu 450 yali.
Bakadati a bigin poti sama* fu tii a foluku te enke a ten fu polofeiti Samuweli.
21 Ma bakaten den be fende taki den wani wan kownu, neen Gadu poti Saul, a manpikin fu Kis fu a lo fu Benyamin enke kownu. A tii 40 yali langa.
22 Baka di Gadu puu Saul enke kownu, a poti David neen peesi. A be taki fu David taki: “A manpikin fu Isai di den e kai David e meke mi e piisii, aw du ala den sani di mi wani a du.”
23 Leti enke fa Gadu be taki, da a meke wan bakapikin fu a man ya kon fii Islayeli, dati a Yesesi.
24 Fosi a sama ya kon, Yohanisi be taigi ala den Islayelisama taki den be mu dopu fu soi taki den sondu fu den be e hati den.
25 A pisiten di Yohanisi be e du a wooko fi en, a be lobi taki: “A ná mi na a sama di mu kon. Wan taa sama e kon a mi baka. En susu seefi mia fiti fu losi puu neen futu.”
26 Den baala fu mi, bakapikin fu Abalaham, anga den taa kondee sama di e lesipeki Gadu, a bosikopu fu a fasi fa Gadu o fii sama doo a wi.
27 Den sama fu Yelusalem anga den tiiman fu den á be wani biibi taki a Yesesi na a Mesiyas. Ma den sani di den du anga en meke den sani di den Polofeiti be sikiifi kon tuu. A denseefi buku fu den Polofeiti ya we leisi ala Sabadei.
28 Winsi fa aa be du nawan ogii fu den be mu kii en, toku den taigi Pilatus taki a mu dede.
29 Baka di den du ala den sani di den polofeiti be sikiifi taki be o pasa anga en, den puu en na a ponsu neen den poti en aini wan geebi.
30 Ma Gadu weki en kon a libi baka.
31 Bakadati a omen dei a soi enseefi a den bakaman fi en di be komoto anga en a Galileya gwa Yelusalem. Nownow a den sama ya e taigi taawan sani fi en.
32 Neen meke we taigi wi a bun nyunsu fu a sani di Gadu be paamisi den afo fu u.
33 Gadu du a sani ya gi wi enke den bakapikin fu den, di a weki Yesesi, leti enke fa a sikiifi aini du fu tu psalm. Ape sikiifi taki: “Yu a mi manpikin, tide mi toon i dda.”
34 Gadu weki en kon a libi baka, neen a gi en wan sikin di naw poli noiti moo. A be taki: “Mio lobi wi enke fa mi be paamisi David taki mio lobi en, a lobi ya nai kaba noiti.”
35 A sikiifi aini wan taa psalm tu taki: “I naw fika a sikin fu wan sama di e tan holi a yu fu poli.”
36 David du sani enke fa Gadu wani en hii libi langa. Ma di a dede, den beli en a pe den afo fi en be beli, en sikin poli tu.
37 Ma a sama di Gadu meke kon a libi baka dedesikin á be poli.
38 Den baala fu mi, u mu sabi taki na a man ya meke u poi fende paadon fu den sondu fu u.
39 A fi en ede meke ala sama di e biibi Gadu kon de enke sama di naabi fowtu. A Weiti fu Mosesi á be poi du a sani ya gi u.
40 Neen meke u mu luku bun fu den sani di den Polofeiti be sikiifi á miti u.
41 Den be sikiifi taki: “Ala wi di e soso den sani di mi e du, o si den sani ya da wo foondoo. Wo dede, bika winsi wan sama be o taigi u finifini san mi du aini a ten fu u, toku wa be o biibi.”’
42 Di Pawlesi anga Barnabas be e gwa doose, den sama begi den fu den sa kon taigi den moo fu a toli ya na a taa Sabadei.
43 Di den e komoto aini a snoga*, a omen fu den Dyu anga taa kondee sama di be de aini a Dyu biibi be e waka a Pawlesi anga Barnabas baka. Den gi den sama taanga-sikin fu tan du sani fu Gadu sa lobi den ala yuu.
44 A taa Sabadei, pikinmoo ala den sama fu a foto kon a wan fu aliki a wowtu fu Yehofa*.
45 Di den fesiman fu den Dyu si a gaan kulu sama, den bigin dyalusu. Neen meke den bigin sitee anga Pawlesi taki ai lei. A so den be e soi taki den nai lesipeki Gadu.
46 Ma Pawlesi anga Barnabas á be e feele, neen meke den taigi den taki: ‘A wi fosi be yee a wowtu fu Gadu. Ma di na wa teke, u soi taki wa fiti fu fende a teego libi. Neen meke wo go peleiki gi den taa nasi sama.
47 Bika Yehofa* taigi u taki: “Mi poti yu enke wan faya di e kiin peesi gi den taa kondee sama, fii sa paati a bosikopu fu a fii di sama o fii na ala se fu goontapu.”’
48 Di den taa kondee sama yee a sani ya, den poolo te, neen den gafa a wowtu fu Yehofa*. Ala den sama di ati bun fu fende a teego libi, be toon bakaman fu Yesesi.
49 Boiti dati, a wowtu fu Yehofa* be e paati na a hii kondee.
50 Neen den Dyu gi wantu pelensipali uman di be e lesipeki Gadu, anga wantu heiheiman fu a foto taanga-sikin fu den du sani anga Pawlesi anga Barnabas. Bakadati den yaki den puu aini a foto.
51 Neen Pawlesi anga Barnabas naki a doti fu a foto de puu a den futu neen den gwa Ikoniyum.
52 Den bakaman fu Yesesi be e piisii ala yuu, a santa yeye be de a den tapu tu.
A maiki
^ Te wan sama e tan sondee fu nyan wan pisiten.
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘poti den a wanse.’
^ Te wan sama e tan sondee fu nyan wan pisiten.
^ A peesi pe den Dyu be e go fu dini Gadu.
^ Dati a wan taa nen fu Bar-Yesesi.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ Efuso ‘kuutubakaa.’
^ A peesi pe den Dyu be e go fu dini Gadu.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
