Toli fu den Apostel 14:1-28
14 Di Pawlesi anga Barnabas doo Ikoniyum, ala den tu man go aini a snoga* fu den Dyu. A fasi fa den taki meke omen Dyu anga Giikisama toon Yesesi bakaman.
2 Ma den Dyu di á be e biibi du sani fu meke den taa kondee sama ati boon a Pawlesi anga Barnabas, fu den ná aliki den moo.
3 Pawlesi anga Barnabas tan ape wan pisiten e paati a wowtu fu Gadu. Den á be e feele fu peleiki, bika a Yehofa* seefi be gi den a makiti ya. A be fende en bun taki den be e taki fu a bun-ati fi en, neen meke a be gi den a makiti fu du wonduu anga gaan sani.
4 Ma den sama di be e tan aini a foto be taampu a tu se. Son wan fu den be de na a se fu den Dyu, ma taawan be de na a se fu den apostel.
5 Den taa kondee sama, den Dyu, anga den tiiman fu den Dyu be de namonamo fu du ogii anga Pawlesi anga Barnabas. Den be wani naki den kii anga siton.
6 Di Pawlesi anga Barnabas yee san den be wani du anga den, den lowe gwa den foto Lika-oniya, Listra, Derbe anga den taa foto di be de koosube.
7 Di den go anda, den paati a bun nyunsu go doo.
8 Wan lanman be de aini Listra. Senten di en mma meke en noiti wan dei a waka.
9 A man ya be sidon e aliki san Pawlesi be e taki. Pawlesi luku a man duun, a be si taki a man ya be e biibi taki a be sa betee.
10 Neen meke a bali gi en taki: ‘Opo taampu.’ A man fee opo, neen a bigin waka.
11 Di den somen sama di be de ape si san Pawlesi du, den bali aini Lika-oniyatongo taki: ‘Den gadu toon libisama! Den saka kon a wi ya oo.’
12 Neen den gi Barnabas a nen Seus. Ma den be kai Pawlesi, Hermes bika neen be e teke fesi na a taki.
13 A pilisite fu Seus tyai wan mankaw anga boomiki go na a doomofu fu a foto. En anga den sama fu a foto be wani tyai ofaandi gi Pawlesi anga Barnabas. A tempel fu a gadu di den e kai Seus be de na a doomofu fu a foto.
14 Ma di Barnabas anga Pawlesi* fusutan san den be wani du, den piiti den koosi a den sikin neen den lon gwa den sama ini. Den bali taki:
15 ‘Saide we du den sani ya? Wa libisama enke useefi. Den sani di e miti u, a den e miti u tu. We paati a bun nyunsu gi u, fu u sa daai baka gi den soso sani ya daw dini a libilibi Gadu di meke hemel anga goontapu, a ze, anga ala den sani di de aini.
16 Aini a ten di pasa a fika ala den foluku fu du san den ati fii.
17 Ma den bun sani di ai du meke u kon sabi sama neen. Ai meke alen kai komoto a tapu gi u. A poti wan ten pe den goon e meke tyaipi nyanyan. Ai gi u nyanyan moo enke san wi abi fanowdu. Anga ala ai meke wi ati piisii.’
18 Winsi fa den be taki ala den sani ya, toku anga bunbun moiti den tapu den sama fu den á dini den*.
19 Ma bakaten wantu Dyu be komoto na Antiokiya anga Ikoniyum kon ape, neen den du sani fu meke den sama ati boon a Pawlesi. Bakadati den naki Pawlesi anga siton, neen den hali en go towe a doose fu a foto, bika den be denki a dede.
20 Ma di den taa bakaman fu Yesesi kon taampu lontu en, a opo neen a go aini a foto. A taa dei fi en, en anga Barnabas gwa Derbe.
21 Di den paati a bun nyunsu ape, den yeepi omen sama fu toon Yesesi bakaman. Bakadati den daai gwa Listra, Ikoniyum, anga Antiokiya baka.
22 Den taanga a biibi fu den Kelesten di be de ape. Den gi den taanga-sikin fu meke moiti fu den biibi taanga ala yuu. Den taigi den taki: ‘A omen banowtu o miti u fosi u go aini a Kownukondee fu Gadu.’
23 Den be poti owluman aini ala den kemeente. Den begi, den faste*, bakadati den fika den owluman ya aini Yehofa* ana, bika neen na a Gadu di den be e biibi.
24 Bakadati den pasa na a pisi wataa fu Pisidiya, neen den doo Pamfiliya.
25 Baka di den paati a wowtu a Perga, den go na Ataliya.
26 Den teke boto ape go na Antiokiya. Aini a foto ya den baala be begi Gadu fu belesi Pawlesi anga Barnabas di den bigin anga a wooko fu den. Den du a wooko ya te enke den kaba en.
27 Di den doo Antiokiya, den meke a kemeente kon a wan neen den taigi den den somen sani di Gadu meke den du. Den taigi den tu fa Gadu gi den taa kondee sama a okasi fu biibi en.
28 Bakadati den tan wan pisiten ape anga den taa bakaman fu Yesesi.
A maiki
^ A peesi pe den Dyu be e go fu dini Gadu.
^ Luku a wowtu ‘Yehofa’ na a pisi ‘San den wowtu ya wani taki.’
^ Aini Giikitongo den be taki: ‘apostel Barnabas anga apostel Pawlesi.’
^ Efuso ‘tyai ofaandi gi den’.
^ Te wan sama e tan sondee fu nyan wan pisiten.
^ Luku a wowtu ‘Yehofa’ na a pisi ‘San den wowtu ya wani taki.’
