Toli fu den Apostel 15:1-41
-
Den e sitee taki anga denseefi efu wan Kelesten mu besnei (1, 2)
-
Den tyai a toli gwa Yelusalem (3-5)
-
Den owluman anga den apostel kon makandaa (6-21)
-
Wan biifi fu den baala di e tii a wooko (22-29)
-
U mu tan faawe fu buulu (28, 29)
-
-
A biifi gi den kemeente taanga-sikin (30-35)
-
Pawlesi anga Barnabas naki paati (36-41)
15 Wantu man komoto a Yudeya, neen den bigin leli den baala anga sisa taki: ‘Efu wa besnei* enke fa a Weiti fu Mosesi e taki, u naw fende a libi*.’
2 Ma den anga Pawlesi anga Barnabas á be e denki go na a wanse. Baka di den sitee taki anga denseefi fu a toli ya, den owluman seeka sani fu Pawlesi anga Barnabas, anga ete wantu baala gwa den apostel anga den owluman a Yelusalem fu taki fu a toli ya.
3 A kemeente waka anga den doo wan pisi, neen den wawan waka go doo. Den pasa aini Finisiya anga Samaliya. Den be e taigi den baala anga sisa fu den foto ya finifini fa den taa kondee sama bigin dini Gadu. Ná pikin piisii den baala piisii di den yee a sani ya.
4 Di den doo Yelusalem, a kemeente, den apostel, anga den owluman bali wadaa gi den, neen den taigi den ala den sani di Gadu meke den du.
5 Ma wantu fu den Faliseiman di be toon Yesesi bakaman opo taampu neen den taki: ‘U mu meke den besnei*, daw taigi den taki den mu wooko anga a Weiti fu Mosesi.’
6 Neen meke den apostel anga den owluman miti ede kon a wan fu taki fu a toli ya.
7 Di den taki te di den si taki den nai go na a wanse, Peitilisi opo taampu neen a taki: ‘Den baala ya, u sabi taki fu ala u di de ya, a mi na a fosi sama di Gadu teke fu go paati a bun nyunsu gi den taa kondee sama fu den be sa yee da den biibi.
8 Gadu soi taki a wani den dini en di a gi den en santa yeye leti enke fa a gi wi en yeye tu. Neen sabi san de aini wi ati.
9 A soi taki na aseefi fasi ai si wi anga den taa kondee sama di a kiin den ati, fu di den soi taki den e biibi.
10 Da saide we tesi Gadu du? We fooseli den taawan anga a sani di u wani du ya. Bika wi anga den afo fu u seefi á be poi tyai a gaan ibi lai ya.
11 Leti enke fa Gadu fii wi, a so we biibi taki a bun-ati fu Masaa Yesesi fii den tu.’
12 Di Peitilisi taki a sani ya, ala den sama di be de ape de pii neen den bigin aliki Barnabas anga Pawlesi. Den be e taki fu den somen wonduu anga den gaan sani di Gadu meke den du gi den taa kondee sama.
13 Di den kaba taki, Yakowbesi taki: ‘Den baala ya, wi aliki mi.
14 Leti enke faw yee dyonson de, da Simeyon* taigi u kaba fa Gadu poti pakisei a den taa kondee sama. A soi u tu taki a omen fu den a teke fu tyai a nen fi en.
15 Den sani di a taki e kai anga den sani di den Polofeiti be sikiifi. Den be sikiifi taki:
16 “Te den sani ya pasa, mio daai kon baka fu seeka a osu* fu David di booko kai. Mio opo a osu ya taampu baka.
17 Mio du a sani ya, fu den wan di fika a baka sa fende a okasi fu suku Yehofa* fayafaya. Den o du a sani ya makandaa anga den taa kondee sama di e tyai mi nen. A so mi Yehofa, a sama di e du den sani ya taki.
18 A omen ten a fesi mi be taki mio du a sani ya.”
19 Neen meke mi fende taki wa mu fooseli den taa kondee sama di e kon dini Gadu.
20 Ma meke u sikiifi wan biifi sende taigi den taki den mu tan faawe fu falisi gadu, hululibi, anga meti di á salakiti. Den mu tan faawe fu buulu tu.
21 Senten hawten sama e taki fu Mosesi aini ala foto. Bika na ala Sabadei sama e leisi den buku fi en aini den snoga*.’
22 Neen den apostel anga den owluman miti ede kon a wan fu sende wantu man go na Antiokiya. A hii kemeente be holibaka gi a sani di den be wani du. Boiti Pawlesi anga Barnabas, den sende Silas anga Yudas di sama be sabi enke Barsabas go tu. Den a be tu fu den man di be e teke fesi.
23 Aini a biifi di den be gi den man ya, den be sikiifi taki:
‘Den taa kondee baala fu u na Antiokiya, Siriya anga Silisiya, a biifi ya komoto a den apostel anga den owluman. We sende odi gi u.
24 U yee taki wantu sama komoto aw ya kon a wi anda. U yee taki den taigi u sani fu fanya u, bika den wani u du sani taa fasi. Ma u wani piki u taki a naw sende den ye.
25 Neen meke u taki fiti, neen u sende tu man kon aw, makandaa anga u lobi baala Barnabas anga Pawlesi.
26 Den man ya de kabakaba fu dede fu a nen fu Masaa Yesesi Kelestesi ede.
27 U sende Yudas anga Silas kon aw fu denseefi mofu sa taigi u san sikiifi aini a biifi.
28 Bika a santa yeye yeepi u fu gi ede go na a wanse. A yeepi u tu fu wa poti moo ibi gi u, boiti den pelensipali sani ya:
29 U mu tan faawe fu iniiwan sani di abi fu du anga falisi gadu, buulu, hululibi, anga meti di á salakiti. Sani o go bun anga u efu u du ala den sani ya. U tan mooin.’
30 A so den man komoto ape, neen den go na Antiokiya. Di den doo, den kai ala den baala anga sisa kon a wan neen den gi den a biifi.
31 Di den leisi a biifi, den poolo te, bika a gi den taanga-sikin.
32 Yudas anga Silas a be polofeiti tu. Den dei di den be de ape, den taki anga den baala anga sisa fu gi den taanga-sikin. Ná pikin yeepi den yeepi den.
33 Baka di den tan ape wantu dei, den baala bali adyosi gi den, neen den daai gwa Yelusalem baka.
34 *——
35 Ma Pawlesi anga Barnabas fika na Antiokiya. Den anga omen taa baala be e leli sama. Den be e paati a bun nyunsu fu a wowtu fu Yehofa* gi den.
36 Baka wantu dei, Pawlesi taigi Barnabas taki: ‘Meke u go luku fai go anga den baala anga sisa fu u aini ala den foto pe u be paati a wowtu fu Yehofa*.’
37 Barnabas be de namonamo taki den be mu tyai Yohanisi di sama be sabi enke Malikisi.
38 Ma Pawlesi á be wani Malikisi go anga den, bika a be gwe fika den di den be de a Pamfiliya. Aa be tan fu den be kaba anga a wooko fu den.
39 A sani ya tyai wan gaan takitaki kon a den mindii. Neen meke ala den tu man naki teke den se. Barnabas meke Malikisi go anga en neen den teke boto gwa Siprus.
40 Pawlesi teke Silas neen den gwe. Fosi den gwe den baala begi Yehofa* fu a belesi Pawlesi.
41 Den pasa aini Siriya anga Silisiya, neen den gi den kemeente ape taanga-sikin.
A maiki
^ Dati a te den be e koti a fesise buba fu a senpeesi fu wan mannengee puu.
^ Efuso ‘u naw fii’.
^ Dati a te den be e koti a fesise buba fu a senpeesi fu wan mannengee puu.
^ Wan taa nen fu Peitilisi.
^ Efuso ‘a tenti’.
^ Luku a wowtu ‘Yehofa’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
^ Son Beibel abi a vers ya, ma aa de aini omen fu den pelensipali Giiki bukulolo.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
