Toli fu den Apostel 17:1-34
17 Den pasa aini Amfipolis anga Apoloniya, neen den gwa Tesalonika a pe a snoga* fu den Dyu be de.
2 Pawlesi go aini a snoga* enke fa a be gwenti. Dii Sabadei baka makandaa a taki anga den sama fu a wowtu fu Gadu.
3 A be e taki anga den fu den pisi di de aini Gadu buku, di e soi taki a Kelestesi be o abi fu pina da a dede, bakadati Gadu be o weki en baka. A taigi den taki: ‘A Yesesi di mi e taki fi en ya, neen na a Kelestesi.’
4 A sani ya meke son wan fu den sama ya toon Yesesi bakaman, neen den bigin paa anga Pawlesi anga Silas. A omen Giikisama di be e dini Gadu, anga wantu pelensipali uman be e paa anga den tu.
5 Ma den Dyu be bigin dyalusu. Neen meke den go suku wantu ogiiman di be lobi taampu a wowoyo. Di den fende wan gaan kulu, den bigin ligei aini a foto. Den booko go aini a osu fu Yason fu go teke Pawlesi anga Silas tyai go gi a gaan kulu sama.
6 Di den á si den, den hali Yason anga wantu fu den baala gwa den tiiman fu a foto neen den taigi den taki: ‘Den man di tyai buuya kon na ala se kon ya.
7 Yason meke den tan neen osu. Den man ya e pasa den weiti fu a Gaankownu, bika den e taki wan taa kownu de di den e kai Yesesi.’
8 Di den tiiman anga a foluku yee a sani ya, ná pikin boon den ati boon.
9 Baka di den meke Yason anga den taa baala pai wan butu, den fika den meke den gwe.
10 Faisi neti tapu, den baala sende Pawlesi anga Silas gwa Bereya. Di den doo ape, den go aini a snoga* fu den Dyu.
11 Den sama fu Bereya á be de enke den sama fu Tesalonika, den be de kabakaba fu aliki a wowtu fu Gadu. Di den yee en, den teke en anga ala piisii. Ala dei den be e ondoosuku Gadu Wowtu finifini fu sabi efu den sani di den be yee a tuu.
12 Neen meke a omen fu den toon Yesesi bakaman. A omen fu den Giiki uman anga man di sama be e lesipeki toon Yesesi bakaman tu.
13 Ma di den Dyu fu Tesalonika yee taki Pawlesi be e paati a wowtu fu Gadu aini Bereya, den kon ape fu daai a foluku ede fu den ligei anga Pawlesi.
14 Neen meke den baala sende Pawlesi go wantenwanten na a lanpeesi a pe den be e teke boto. Wantu baala be go anga en tu. Ma Silas anga Timotiyesi be fika a Bereya.
15 Den man di be go anga Pawlesi tyai en go te na Ateine. Pawlesi taigi den taki den mu taigi Silas anga Timotiyesi taki den mu go miti en wanten. Bakadati den man gwe.
16 Di Pawlesi e wakiti Silas anga Timotiyesi aini Ateine, a be si taki a foto be fuu anga falisi gadu. A sani ya be fooseli en.
17 Neen meke a go aini a snoga* neen a bigin taki anga den Dyu anga den taa sama di be e dini Gadu. Ala dei a be e taki anga den sama di a be e miti a wowoyo.
18 Ma wantu Epikurus* anga Stoisisama* di be de filosofiyaman bigin sitee taki anga en. Son wan fu den be e taki: ‘San a den sani di a man ya wani leli u?’ Taawan be e taki: ‘A gei ai taki fu gadu di wa sabi.’ Den be e taki den sani ya fu di a be e taki fu a bun nyunsu fu Yesesi, anga a kon di sama o kon a libi baka.
19 Neen meke den tyai en go na a moo hei kuutu-osu fu Ateine*, neen den akisi en taki: ‘I sa taigi u san a den nyun sani di ye leli sama?
20 Bika ye taki sani di wa sabi. U wani sabi san den sani ya wani taki.’
21 Fu taki en kiin, ala den Ateinesama anga den taa kondee sama di be e tan ape, be lobi gi toli te den á be abi sani fu du. Den be lobi taki fu nyun sani efuso aliki te taa sama e taki fu sani di den á be yee ete.
22 Pawlesi opo taampu aini a kuutu-osu fu Ateine neen a taki:
‘Den sama fu Ateine, te mi luku wi anga den taa foluku da mi si taki we moo lesipeki den gadu.
23 Bika di mi be e waka aini a foto, mi keli den sani di we dini, neen mi si wan altari di sikiifi taki: “Gi wan Gadu di wa sabi.” We a fu a gadu di we dini sondee u sabi en, mi e taki anga u ya.
24 Neen na a Gadu di meke goontapu anga ala sani a goontapu. A nai tan aini osu di libisama meke, bika neen na a Masaa fu hemel anga goontapu.
25 A naabi sama fanowdu fu solugu en, bika a nai mankei nawan sani. Neen gi libisama ala sani, neen gi den libi, neen e meke den e boo.
26 A wan sama a teke neen a meke ala den nasi di de a goontapu. Neen e taki on ten son sani mu pasa. Neen na a sama di taki pe libisama mu tan.
27 A wani libisama meke moiti fu kon sabi en. Efu den meke moiti den o sabi en namo, bika aa taanga fu sabi en.
28 Na a Gadu ya meke u de a libi, neen meke u de a goontapu, neen meke u poi waka. Na a sani ya son wan fu den sikiifiman fu useefi taki. Den taki: “Bika ala wi neen pikin.”
29 Wi a Gadu pikin, neen meke wa mu denki taki Gadu de enke sani di meke anga gowtu, solufu, efuso siton. Wa mu denki taki a de enke sani di libisama seefi meke.
30 A tuu taki aini a ten di pasa Gadu be e fika sama fu du san den wani, bika den á be sabi san den e du. Ma nownow ai taigi ala sama a goontapu taki den mu daai den libi.
31 Bika a poti wan dei kaba di aw meke wan sama kuutu ala sama a goontapu a wan letifasi. Ala sama sa biibi taki a dei ya o doo, bika a meke a sama ya kon a libi baka.’
32 Di den yee taki dedesama o kon a libi baka, wantu fu den bigin soso en. Ma son wan fu den taki: ‘U wani yee moo fu a toli ya wan taa leisi.’
33 Bakadati Pawlesi komoto ape.
34 Ma wantu sama be bigin paa anga en, neen den toon Yesesi bakaman. Tu fu den sama ya a be Dionisiyus, wan man di be e koti kuutu aini a Areyopagus, anga wan uman den e kai Damaris.
A maiki
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ Den bakaman fu wan man den be e kai Epikurus.
^ Den bakaman fu wan man den be e kai Zeno.
^ Efuso ‘Areyopagus’.
