Toli fu den Apostel 18:1-28
18 Bakadati Pawlesi komoto na Ateine neen a gwa Korente.
2 Di a gwa ape, a miti wan Dyu di den e kai Akwila. A man ya be meke a wan peesi den e kai Pontus. Aa langa di en anga en uman Preskela foloisi komoto a Italiyakondee, bika Klawdiyus be yaki ala den Dyu puu a Rome. Pawlesi gwa den osu.
3 Denseefi be e meke tenti leti enke Pawlesi, neen meke Pawlesi go tan anga den, da den be e wooko makandaa.
4 Ala Sabadei Pawlesi be lobi taki anga sama aini a snoga*. A be e yeepi den Dyu anga den Giikisama fu biibi den sani di a be e leli.
5 Di Silas anga Timotiyesi komoto a Masadoniya, Pawlesi bigin paati a wowtu fu Gadu fayafaya gi den Dyu. A be e soi den kiin taki Yesesi na a Kelestesi.
6 Ma den á be wani teke den sani di Pawlesi be e leli den. Den be e soso en. Neen meke Pawlesi seke en dyakiti neen a taigi den taki: ‘Efu u dede mi naabi buulu paiman a mi tapu oo. A useefi suku en.’
7 Bakadati a komoto aini a snoga* neen a go aini a osu fu Titiyus Yustus. A man ya be e lesipeki Gadu. A osu fi en be de leti na a snoga se.
8 Krispus, a man di be e teke fesi aini a snoga* anga ala den sama aini en osu toon Yesesi bakaman. A omen fu den sama fu Korente di yee a bun nyunsu bigin biibi Masaa Yesesi tu, neen den dopu.
9 Wan neti Masaa taigi Pawlesi aini wan fisyun taki: ‘Ná feele! Leli sama go doo, ya mu gi abaa,
10 bika mi de anga i. Nawan sama o poi du ogii anga i. Sama lai aini a foto ya ete di o toon mi bakaman.’
11 Neen meke a tan ape wan yali anga sigisi mun e leli sama a wowtu fu Gadu.
12 A pisiten di Galiyo be de gaanman fu Akaya, den Dyu miti ede kon a wan fu du ogii anga Pawlesi. Den tyai en gwa kuutu na a gaanman,
13 neen den taki: ‘A man ya e koli sama fu dini Gadu a wan fasi di e pasa lanti weiti.’
14 Ma faisi Pawlesi sete fu taki, Galiyo taigi den Dyu taki: ‘Efu a wan ogii a man ya be du tuu, da mi be o aliki wi anga ala pasensi.
15 Ma efu a toobi ya abi fu du anga den weiti fu u, nen, efuso wowtu, da useefi luku fa wo seeka en. Mi nai kuutu den sowtu toli ya.’
16 Bakadati a yaki den puu ape.
17 Den kisi Sostenes, a fesiman fu a snoga* neen den bigin fon mi en leti na a gaanman fesi, toku Galiyo á be wani mumui.
18 Baka di Pawlesi tan ete wantu dei aini Korente, a bali adyosi gi den baala, neen en anga Preskela anga Akwila teke boto fu gwa Siriya. Di a doo Kenkreya a koti en uwii, bika a be meke wan sweli a Gadu.
19 Di den doo Efeise, den taawan fika aini a foto. Ma Pawlesi go aini a snoga* neen a bigin taki anga den Dyu.
20 Winsi fa den be begi en fu tan moo langa anga den, tokuso aa be wani.
21 A bali adyosi gi den, neen a taigi den taki: ‘Efu Yehofa* wani da mio daai kon aw baka.’ Bakadati a teke boto komoto a Efeise,
22 neen a gwa Sesareya. Di a doo, a gwa Yelusalem neen a go luku ala den baala anga sisa. Bakadati a go na Antiokiya.
23 Baka di a tan ape wan pisiten, a komoto de, neen a gwa den peesipeesi fu Galasiya anga Frigiya fu gi den baala anga sisa taanga-sikin.
24 Wan Dyu fu Aleksandriya di den e kai Apolos be kon a Efeise. A man ya be sabi taki, a be sabi a wowtu fu Gadu bun tu.
25 A man ya be leli sani fu Yehofa*. A yeye fu Gadu be yeepi a man ya fu de fayafaya, neen meke a be e leli sama ala san a be sabi fu Yesesi. Den sani di a be e leli sama fu Yesesi a be tuu sani. Ma aa be sabi taa sani boiti a leli di Yohanisi be e leli sama taki den mu dopu.
26 Wan leisi a be de aini a snoga* e peleiki fayafaya. Aa be e feele fu taki. Di Preskela anga Akwila yee fa ai leli sama, den kai en gwa den osu neen den yeepi en fu fusutan den leli fu Gadu moo bun.
27 A be wani go na Akaya, neen meke den baala sikiifi wan biifi gi den Kelesten ape taki den mu bali wadaa gi en. A omen sama be de ape di toon Yesesi bakaman fu di Gadu soi den bun-ati. Di a go ape, ná pikin yeepi a yeepi den.
28 Aa be e feele fu taki na ala sama fesi taki den sani di den Dyu be e leli sama á be bun. A be e soi den aini Gadu Buku taki Yesesi na a Kelestesi.
A maiki
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ A peesi pe den Dyu be e go fu dini Gadu.
^ Luku a wowtu ‘Yehofa’ na a pisi ‘San den wowtu ya wani taki.’
^ Luku a wowtu ‘Yehofa’ na a pisi ‘San den wowtu ya wani taki.’
^ A peesi pe den Dyu be e go fu dini Gadu.
