Toli fu den Apostel 24:1-27
24 Tin dei bakadati, a gaan pilisite Ananiyas seefi kon a Sesareya. A be tyai wantu fu den gaanwan fu a foluku anga wan basiya den e kai Tertulus go anga en tu. Den gwa Gaanman Feiliks fu taigi en sowtu ogii Pawlesi du.
2 Di den taigi Tertulus taki a sa taki, a opo taampu neen a bigin taki omen ogii fu Pawlesi. A taigi a gaanman taki:
‘Mi lesipeki Gaanman Feiliks, a fi yu ede meke sani e go bun anga u. Ye denki bun fosi i du wan sani, neen meke sani e waka bun anga a foluku.
3 Ná pikin bigi den sani di ye du e bigi gi u.
4 Ma mia wani teke tyaipi ten fii, neen meke mio taki wanten. Mi sabi taki ya wan man di abi bun manii, neen meke gaantangi aliki mi baa, mi naw taki langa seefi.
5 U kon si taki a man ya e tyai buuya anga polobelema kon a den Dyu. Ai gi den taanga-sikin na ala se fu goontapu fu den á du san den tiiman e taki. En a wan fu den fesiman fu a keliki fu den sama fu Nasaleti.
6 Da efu dati á sai, a puubei fu tyobo a santa tempel. Neen meke u kisi en fu tyai go sooto.
7 *——
8 Di iseefi o taki anga en, yo si taki wa lei gi en.’
9 Di a taki so, ala den Dyu dyombo piki taki aa lei seefi.
10 Di a Gaanman soi Pawlesi taki a sa taki, Pawlesi taki:
‘Mi sabi taki a omen yali ye koti kuutu gi u kaba, neen meke mi nai feele fu taki gi miseefi.
11 Iseefi sa ondoosuku a sani di mio taigi i ya. A wan sani fu 12 dei pasa di mi gwa Yelusalem fu dini Gadu.
12 Noiti wan dei den si mi taampu e kwali anga sama aini a tempel. Den á si mi tyai sama kon a wan aini a tempel, a snoga*, efuso wan taa peesi aini a foto tu.
13 Den á poi taigi i sama si mi e du den ogii di den taki mi du ya.
14 Ma mi sa piki i taki den á lei efu den taki mi e libi enke den sama fu a kulu di den e kai a nyun keliki. Mi e dini a Gadu fu den afo fu mi, bika mi e biibi ala san sikiifi aini a Weiti anga den buku fu den Polofeiti.
15 Leti enke den man ya, a so miseefi e biibi taki Gadu o weki den dedesama baka, den sama di be libi a wan letifasi anga den sama di á be libi a wan letifasi.
16 Neen meke ala yuu mi e meke moiti fu du sani anga wan kiin ati a Gadu anga libisama fesi.
17 A so meke baka omen yali mi go a Yelusalem fu tyai ofaandi gi Gadu. Mi be tyai moni tu fu yeepi den sama fu mi.
18 A den sani ya mi be e du di den si mi aini a tempel. Mi be e kiin miseefi enke fa a Weiti e soi. Mia be e muliki nawan sama, mia kai tyaipi sama kon a wan tu. Ma wantu Dyu fu a pisi kondee fu Asiya,
19 á be lobi so. Efu den fende taki mi du wan ogii, da den be mu de ya tide fu taki sowtu ogii mi du.
20 Efuso meke den man di taampu ya taigi i sowtu ogii mi du di den be kai mi a kuutu na a Sanhedrin*.
21 A wan kodo sani di den sa taki mi du di mi be taampu a den fesi, a di mi bali taki: “Den kai mi a kuutu fu di mi e biibi taki dedesama o weki baka.”’
22 Ma Feiliks be sabi sani fu a Pasi fu Masaa, neen meke a tapu a kuutu. A taigi den taki: ‘Te a suudati-edeman Lisiyas kon ya, da mio taki sama abi leti.’
23 Bakadati a taigi wan fu den suudati taki den mu sooto Pawlesi, ma den sa fika en fu a du son sani. A be taigi en tu taki efu den sama fu Pawlesi wani yeepi en a sani, den á mu tapu den.
24 Wantu dei bakadati, Feiliks anga en uman Drusila kon a pe Pawlesi be de. A uman ya a be wan Dyu. Feiliks sende kai Pawlesi, neen a meke a taigi en finifini san den bakaman fu Yesesi e biibi.
25 Ma di Pawlesi bigin taki fu a tyai di sama mu tyai denseefi a wan letifasi, a dwengi di u mu dwengi useefi, anga a kuutu di Gadu o kuutu sama, Feiliks feele te neen a taki: ‘I sa gwe fosi, di mio fende wan okasi da mio kai i baka.’
26 A be denki taki Pawlesi be o gi en moni, neen meke a omen leisi a sende kai en fi en anga en taki.
27 Ma baka tu yali, Porsiyus Festus toon gaanman a Feiliks peesi. Feiliks be fika Pawlesi a sitaafu-osu bika a be wani fende bun nen a den Dyu.
A maiki
^ Son Beibel abi a vers ya, ma aa de aini omen fu den pelensipali Giiki bukulolo.
^ A peesi pe den Dyu be e go fu dini Gadu.
^ A moo hei kuutu-osu fu den Dyu.
