Toli fu den Apostel 27:1-44
27 Baka di den taki fiti taki den o meke u teke sipi gwa Italiyakondee, den gi wan suudati-edeman fu a kulu fu Augustus di den e kai Yuliyus a faantiwowtu fu luku Pawlesi anga wantu taa sitaafuman.
2 U go aini wan sipi fu Adramitiyum di be o pasa a wantu kondee fu Asiya, neen u gwe. Aristakus, wan Tesalonika man fu a foto Masadoniya, be de anga u tu.
3 A taa dei fi en u doo Sidon. Yuliyus be libi bun anga Pawlesi, bika a be gi en pasi fu gwa den mati fi en fu den solugu en.
4 Di u komoto ape, wan gaan winta be e wai, neen meke u pasa koosube fu a lanpeesi fu Siprus fu a gaan winta á fooseli u.
5 Bakadati u gwa mindii wataa baka, neen u pasa Silisiya anga Pamfiliya, go doo a lanpeesi fu Mira di de aini Lisiya, neen u poti a sipi ape.
6 Di u doo ape a suudati-edeman fende wan sipi fu Aleksandriya di be e gwa Italiyakondee, neen a meke wi abaa go aini.
7 Baka di u de a ze wantu dei, u doo Kenidus anga bunbun moiti. A winta be e wai taanga, neen meke u be abi fu pasa koosube fu Kreita di de aini Salmona fu u be sa kibii gi a winta.
8 Anga bunbun moiti u pasa a lanpeesi te enke u doo wan peesi den e kai Bun Lanpeesi di de koosube fu a foto Laseya.
9 U be daaidaai tumisi na a Bun Lanpeesi. Boiti dati, a yuu de á be bun seefiseefi fu waka anga boto. Anga ala a ten di sama be e faste* seefi be pasa kaba. Neen meke Pawlesi taigi den man taki:
10 ‘Den man ya, mi si taki efu u go doo anga a waka ya, a ná den lai efuso a sipi wawan wo lasi, ma sama sa dede tu.’
11 Ma a suudati-edeman á teke a taki fu Pawlesi. A wooko anga san a man di be abi a sipi, anga san a man di be e tii a sipi taigi en.
12 Fu di a lanpeesi de á bun fu pasa a koo-ten fu a yali, meke gaanse fu den sama aini a sipi be taki a moo bun fu den meke moiti fu doo Feiniks da den pasa a koo-ten fu a yali anda. Dati a be wan lanpeesi di be de a Kreita. I be sa waka a noordse* efuso a zuidse* fu doo na a lanpeesi ya.
13 Di a winta bigin wai komoto na a se pe a san e opo, den man di be e tii a sipi be si enke sani be o waka enke fa den be denki. Neen meke den hali den ankaa poti aini a sipi, neen den tii a sipi pasa na a lanpeesi fu Kreita.
14 Aa teke langa seefi neen wan gaan winta den e kai Erakwilo bigin wai.
15 A winta be e wai taanga te wa be poi tii a sipi moo, neen meke u fika a sipi fu a winta tyai en gwa pe a wani.
16 Bakaten a winta tyai u go doo a wan pikin tabiki den e kai Kawda. Winsi fa a tabiki ya be tapu afu a winta gi u, tokuso a bunbun moiti u be mu meke fu wa lasi a pikin boto di be de na a sipi.
17 Baka di den hali a pikin boto kon aini a sipi, den hali tetei pasa na a sipi ondoo fu holi den paanga fi en na a wan. Fu di den be e feele taki den be o fasi a den santi di be de aini a ze*, meke den losi den koosi fu a sipi fu meke a winta tyai en.
18 A winta be e wai a sipi go na ala se, neen meke a tamaa fi en den bigin puu wantu sani aini a sipi towe a wataa, fu a be sa moo feke.
19 Du fu dii dei den losi wantu wookosani sani fu a sipi towe a wataa.
20 A omen dei wa be si a san anga den sitali. Wan gaan alen be e kai, ná pikin wai a winta be e wai taanga. Wan pisiten de, u be si enke u be o dede.
21 Baka di den sama di be de aini a sipi tan wantu dei sondee fu nyan, Pawlesi opo taampu neen a taki: ‘Den man ya, u be mu aliki mi oo di mi taigi u taki wa mu komoto a Kreita, da wa be o lasi den somen sani ya.
22 Ma u naafu feele, bika nawan sama o dede, na a sipi wawan o booko.
23 A neti ya wan engel fu a Gadu fu mi di mi e dini kon taigi mi taki:
24 “Aa de fii feele Pawlesi, bika i mu doo Gaankownu. Gadu o kibii yu anga ala den sama di de makandaa anga i.”
25 Neen meke wa mu feele, bika mi e biibi taki Gadu o du pilisisi san a engel taigi mi.
26 Ma a sipi o go fasi koosube fu wan lanpeesi a wan tabiki.’
27 A 14 dei langa u be de na a ze kaba. A winta be e wai a sipi go kon na a ze fu Adriya. Wan pisiten fu mindiineti, den man di be e tii a sipi be denki taki den be koosube fu wan lanpeesi.
28 Di den maiki a dipi fu a wataa den si taki a be dipi wan sani fu 36 meiti. Di den go te wan pisi den maiki a dipi baka, neen den si taki a pisi de be dipi 27 meiti.
29 U be e feele taki a sipi be o go fasi a den siton, neen meke den man iti fo ankaa di be de a baka fu a sipi gwa wataa. A pisiten de, a soso winsi den botoman be e winsi fu peesi kiin.
30 Ma den man di be e wooko aini a sipi be e meke moiti fu lowe. Den be e du enke a den ankaa fu a sipi den be e saka, ma na a pikin boto di be de aini a sipi den be wani saka a wataa.
31 Neen meke Pawlesi taigi a suudati-edeman anga den suudati taki: ‘Efu den man ya komoto aini a sipi den o dede ye.’
32 Bakadati den suudati koti den tetei fu a pikin boto, neen a boto kai a wataa.
33 Di peesi de fu kiin, Pawlesi gi den sama di be de aini a sipi taanga-sikin fu nyan wan sani. A taigi den taki: ‘A 14 dei langa we wakiti fu fende yeepi, a hii pisiten ya wa nyan nawan sani.
34 Neen meke u mu nyan wan pikin sani fu u fende kaakiti, bika sani naw du nawan fu u.’
35 Di a taki a sani ya, a teke wan beele, a gi Gadu daa a den fesi, neen a bigin nyan.
36 Di a du a sani ya ala den fende taanga-sikin, neen denseefi bigin nyan.
37 Ala anga ala u be de anga 276 sama aini a sipi.
38 Di den nyan te den bee fuu, den bigin fiingi den saka alisi go aini a ze fu a sipi be sa kon moo feke.
39 Di peesi kiin, den si wan lanpeesi ma den á be kaba fusutan sowtu kondee be de ape. Winsi fa den á be sabi pe den be de, toku den be wani poti boto ape.
40 Neen meke den koti den ankaa fika aini a ze, neen den losi den tetei fu den pali di be de a baka fu a sipi. Bakadati den opo den koosi di be de a fesise fu a sipi fu a winta be sa tyai den gwa lanpeesi.
41 Ma fosi den doo se, a sipi go fasi a wan santi. A sipi á be poi gwa fesi moo, bika a fesise pisi be fasi gingin. Boiti dati, den gaan balon fu a ze bigin naki a lasi fu a sipi booko.
42 Di a sani ya pasa, den suudati be wani kii den sitaafuman, bika den be denki taki den be o kai a wataa da den lowe.
43 Ma a suudati-edeman á be wani sani du Pawlesi, neen meke a tapu den suudati fu den á kii den sitaafuman. A taigi den sama di be sabi suwen fu den fosi kai a wataa, da den suwen gwa se.
44 Den taawan be mu kisi paanga anga taa booko pisi fu a sipi holi fu den be sa doo se. A so ala den doo soo sondee fu wan sani du den.
A maiki
^ Den Dyu be e faste na a dei di den be e begi paadon fu den sondu fu den. Luku a wowtu ‘faste’ na a pisi ‘San den wowtu ya wani taki.’
^ Te wan sama taampu gi fesi go a pe a san e opo, da noordse de neen kukutuse-ana.
^ Te wan sama taampu gi fesi go a pe a san e opo, da zuidse de neen letise-ana.
^ Aini Giikitongo den be taki: ‘Sirtis.’
