Toli fu den Apostel 5:1-42
5 Ma wan man den e kai Ananiyas anga en uman Safira seefi be seli wan pisi doti fu den.
2 Ananiyas kibii afu fu a moni neen a tyai a taa pisi go gi den apostel. En uman seefi be sabi san a du.
3 Ma Peitilisi akisi en taki: ‘Ananiyas saide i meke Saatan fende i koli fu lei gi a santa yeye? Saide i kibii afu a moni dii seli a pisi doti fii du?
4 Ai be abi a doti, ná so noh? Baka dii seli en i be sa du sai wani anga a moni. Da saide i pakisei fu du sowan sani? A ná libisama i lei gi, ma a Gadu seefi i lei gi.’
5 Faisi Ananiyas yee den sani ya, a dompu kai neen a dede. Ala den sama di yee a toli feele.
6 Wantu yonkuman di be de ape, lolo en aini koosi neen den tyai en go beli.
7 Baka wan sani fu dii yuu langa, en uman kon doo ape. Aa be sabi taki a so pasa anga a man fi en.
8 Peitilisi akisi en taki: ‘Na ala a moni di u seli a pisi doti de ya?’ Safira piki en taki: ‘Eeye, na ala a moni di u fende de ya.’
9 Neen Peitilisi taigi en taki: ‘Saide yu anga i man meke mofu fu tesi a yeye fu Yehofa du? Den sama di beli a man fii de na a doomofu, a denseefi sama de o diki i tyai gwe.’
10 Faisi a kaba taki, a so a uman kai a doti neen a dede. Di den yonkuman kon a inise, den si taki a uman seefi dede, neen den diki en tyai go beli neen man se.
11 Den bakaman fu Yesesi di be de a Yelusalem feele di den yee a toli ya. Ala den taa sama di yee san pasa seefi be feele.
12 Boiti dati, den apostel be e du omen wonduu. Den be e kon makandaa na a peesi pe sama be sabi enke a Pasi fu Salomo.
13 Winsi fa nawan taa sama á be abi ati sai fu paa anga den, tokuso a foluku be e lesipeki den.
14 A omen tenti man anga uman be e toon bakaman fu Yesesi.
15 Den be e poti den sama di be siki a daagi* tapu, da den be e tyai den go poti a den gaan pasi, fu a kaaka fu Peitilisi be sa kai a son wan fu den tapu te ai pasa.
16 A omen sama fu den foto di be de koosube fu Yelusalem be e kon ape. Den be e tyai den siki sama fu den anga den sama di takuu yeye be e fooseli kon a den apostel, da ala den be e betee.
17 Ma a gaan pilisite anga a kulu fu den Saduseiman di be e holibaka gi en ati be boon te ná pikin sani. Den be e dyalusu anga den apostel,
18 neen meke den kisi den tyai go sooto.
19 Ma di neti tapu, wan engel fu Yehofa kon opo a doo fu a sitaafu-osu gi den. A tyai den gwa doose neen a taigi den taki:
20 ‘Go aini a tempel, wa mu tapu fu paati a bun nyunsu fu libi gi den sama.’
21 Di den yee a sani ya, den go aini a tempel di peesi kiin neen den bigin leli sama.
A ten de, a gaan pilisite anga den sama fi en kai a hii Sanhedrin*, anga ala den gaanwan fu Islayeli kon makandaa, neen den sende bosikopu go gi den suudati fu a sitaafu-osu fu tyai den apostel go gi den.
22 Ma di den suudati go aini a sitaafu-osu, den á si den apostel. Neen den daai go taigi den sama di be sende den taki:
23 ‘Di u go, a doo fu a sitaafu-osu be de sootosooto, den wakitiman be de a den peesi tu, ma di u go a inise, wa si nawan sama.’
24 Di a fesiman fu a tempel anga den fesiman fu den pilisite yee san den taki, den be e akisi denseefi san be o de a bakapisi fu a sani ya.
25 Na ape den de neen sama kon taigi den taki: ‘Den man di u be sooto de aini a tempel e leli sama.’
26 Neen a fesiman fu a tempel anga den suudati fi en go teke den apostel, ma den á du sani anga den bika den be e feele taki a foluku be o naki den kii anga siton.
27 Di den tyai den kon, den meke den taampu aini a Sanhedrin*. Bakadati a gaan pilisite taigi den taki:
28 ‘U be bali u taki wa mu leli sama sani aini a nen fu Yesesi moo, ma toku u paati den leli fu u aini hii Yelusalem. U de namonamo fu fika a dede fu a man ya aw neki tapu.
29 Peitilisi anga den taa apostel taigi en taki: ‘U mu aliki Gadu moo libisama, bika neen aw tiiman.
30 A Gadu fu den afo fu u weki Yesesi di u be sipikii kii a wan ponsu.
31 Gadu gi a sama ya makiti di a poti en neen letise-ana. Neen na a sama di Gadu poti fu gi sama libi. A poti en fu fii sama tu. Neen o meke den sama fu Islayeli fende paadon fu den sondu.
32 Useefi si den sani ya. A santa yeye di Gadu e gi den sama di e aliki en yeepi u fu taki fu den sani ya tu.’
33 Di den yee den sani ya, den ati boon te, neen den be wani kii den apostel.
34 Ma wan Faliseiman den be e kai Gamaliyel be de ape tu. A man ya a be wan leliman fu a Weiti, ala sama be e lesipeki en. A opo taampu aini a Sanhedrin* neen a taki fu den poti den apostel a doose fosi.
35 Bakadati a taki: ‘Den gaanwan fu Islayeli, u mu denki bun fosi u du wan sani anga den man ya oo.
36 Bika wan pisiten pasa de, Teidas be e kai enseefi wan pelensipali man. A wan sani fu 400 sama be e waka neen baka. Ma bakaten sama kii en, neen ala den sama di be e waka neen baka naki paati.
37 Boiti dati, na a pisiten di sama be e go poti den nen a lantibuku, Yudas fu Galileya be fende taki en a wan pelensipali man. A omen sama be e waka neen baka. Ma sama kii en tu, neen ala den sama di be e waka neen baka naki paati.
38 Neen meke mi e taigi u taki, wa mu du sani anga den man ya, u fika den meke den gwe, bika efu a libisama wooko den e du, a naw tan langa.
39 Ma efu a Gadu wooko den e du, u naw poi tapu den. Efuso aw de taki anga Gadu seefi we feti.’
40 Di a taki so, den aliki en. Neen meke den kai den apostel kon, den wipi den te a wipi, neen den taigi den taki den á mu leli sama sani aini Yesesi nen moo, bakadati den fika den fu den gwe.
41 Di den apostel komoto na a kuutu, den be e poolo taki Gadu be si den enke sama di fiti fu teke sen fu Yesesi nen ede.
42 Ala dei den be e go na a tempel fu leli sama. Den be e gwa den sama osu fu leli den tu. Den á be e meke sani tapu den fu paati a bun nyunsu fu Yesesi Kelestesi*.
A maiki
^ Wan sowtu sani enke bedi di den be e tyai sama.
^ A moo hei kuutu-osu fu den Dyu.
^ A moo hei kuutu-osu fu den Dyu.
^ A moo hei kuutu-osu fu den Dyu.
^ Aini Giikitongo den be taki Kelestesi Yesesi.
