Toli fu den Apostel 8:1-40
8 A be bun gi Sawlesi taki den kii Stefanus.
Fanafu a dei de sama bigin du ogii anga a kemeente di be de a Yelusalem. Ala den Kelesten be foloisi go na a pisi wataa fu Yudeya anga Samaliya, boiti den apostel.
2 Ma wantu fu den man di be e dini Gadu teke Stefanus tyai go beli. Ná pikin kee den kee gi en.
3 Sawlesi bigin du omen ogii anga a kemeente. A be e go aini den osu fu den baala anga sisa da a be e tyai den go sooto. Aa be abi toobi efu a mannengee efuso umanpikin.
4 Ma den Kelesten di be lowe, bigin paati a bun nyunsu a pe den be foloisi go.
5 Filipus gwa Samaliya, neen a bigin taki fu Kelestesi anga den sama fu ape.
6 Ala den sama be e poti pakisei a den sani di Filipus be e taki, den be e aliki en, den be e si den wonduu di a be e du tu.
7 A omen fu den takuu yeye be e fooseli. Den takuu yeye be e bali e ligei te den be e komoto a den sama tapu. Boiti dati, a omen sama di be malengii anga sama di be lan, be betee.
8 Ná pikin poolo a sani ya be meke den sama fu a foto de poolo.
9 Wan man be de aini a foto ape den be e kai Simon. A man ya be e du omen tofuuwooko di be e meke den Samaliyasama foondoo, a be e taigi sama taki en a wan pelensipali man.
10 Sama á fika di á be e aliki en, den heiheiman seefi be e aliki en. Den be e taki: ‘Gadu gi a man ya a kaakiti fi en.’
11 A wan hii pisiten kaba a be e du tofuuwooko di be e meke den sama foondoo, neen meke den be e aliki en.
12 Ma di Filipus kon ape, a leli den sani fu a bun nyunsu fu a Kownukondee fu Gadu. A taigi den sama a Yesesi Kelestesi tu. Neen den sama di biibi den sani di Filipus leli den dopu.
13 Simon seefi toon wan bakaman fu Yesesi neen a dopu. Baka di a dopu, a bigin waka a Filipus baka. Den wonduu anga den gaan sani di Filipus be e du be e meke a foondoo.
14 Di den apostel a Yelusalem yee taki den sama fu Samaliya bigin biibi a wowtu fu Gadu, den sende Peitilisi anga Yohanisi gwa den.
15 A so Peitilisi anga Yohanisi go begi gi den Samaliyasama fu den fende a santa yeye.
16 Bika winsi fa den be dopu aini a nen fu Masaa Yesesi, toku nawan fu den be fende a yeye fu Gadu ete.
17 Di den apostel poti ana a den sama tapu, den fende a santa yeye.
18 Di Simon si taki den sama be e fende a santa yeye te den apostel be poti den ana a den tapu, a be wani gi den moni.
19 A taigi den taki: ‘U gi mi a makiti ya tu fu mi sa gi sama a santa yeye te mi poti mi ana a den tapu baa.’
20 Ma Peitilisi taigi en taki: ‘Dede gwe anga ala i moni. I denki taki i poi bai a sani di Gadu e gi sama fu soso?
21 I naabi nawan pisi aini a wooko ya, bika Gadu si taki yu ati á kiin.
22 Soi taki a ogii dii du ya e hati i, dai begi Yehofa fu a gii paadon fu a takuu denki di de aini yu ati.
23 Bika mi e si taki dyalusu subi i, a soso ogii ye sidon e denki fu du.’
24 Neen Simon taigi den taki: ‘U begi Yehofa gi mi baa fu nawan fu den sani di u taki de á miti mi.’
25 Baka di den paati a wowtu fu Yehofa finifini na a hii pisi de, den teke pasi gwa Yelusalem baka. Di den de a pasi, den be e paati a bun nyunsu a den pikin foto fu Samaliya.
26 Ma a engel fu Yehofa kon taigi Filipus taki: ‘Opo, dai go na a zuidse na a pasi fu Yelusalem di e go kai a Gaasa.’ (A pasi ya be de aini a sabana.)
27 Filipus opo gwa pe a engel be taigi en. Di a doo, a si wan heiheiman fu Etiyopiya. A man ya be e wooko gi Kandase, a umankownu fu den Etiyopiyasama. Neen be e luku ala den gudu fu a umankownu ya. A man ya be gwa Yelusalem fu dini Gadu.
28 Di a be de a pasi e gwa osu baka, a be de aini en asiwagi e leisi a buku fu polofeiti Yesaya.
29 A yeye fu Gadu taigi Filipus taki: ‘Go koosube fu a wagi.’
30 Neen Filipus bigin lon na a wagi sikin. Di a yee taki na a buku fu polofeiti Yesaya a man be e leisi, a akisi en taki: ‘Ye fusutan san ye leisi?’
31 A piki Filipus taki: ‘Fa mio fusutan san mi e leisi efu nawan sama á yeepi mi?’ A so a kai Filipus fu subi kon aini a asiwagi fi en.
32 A pisi di a be e leisi be e taki: ‘A be de enke wan sikapu di den e tyai go kii. A be de pii enke wan pikin sikapu di den e tyai go kaabu uwii puu neen sikin.
33 Di den be e soso en, den á kuutu en anga leti. Sama o taigi taawan sowtu famii a komoto? Bika den kii en puu a goontapu ya.’
34 A heiheiman taigi Filipus taki: ‘Gaantangi taigi mi sama na a sama di a polofeiti ya e taki baa? Neenseefi ai taki, efuso a wan taa sama?’
35 A so Filipus bigin taki anga a man fu a pisi di a be e leisi. A taki anga en fu a bun nyunsu fu Yesesi.
36 Di den lei te wan pisi, den doo wan peti wataa, neen a heiheiman akisi Filipus taki: ‘Luku wataa ya, sai tapu mi fu dopu?’
37 *——
38 A meke den sitopu a asiwagi, en anga Filipus saka komoto aini a wagi go aini a wataa, neen Filipus dopu en.
39 Di den komoto aini a wataa, a yeye fu Yehofa meke Filipus komoto ape gwa wan taa peesi. A heiheiman á si en moo, toku di ai gwe a be e piisii.
40 Bakadati Filipus gwa Asdod. A paati a bun nyunsu na ala den foto ape te enke a doo Sesareya.
A maiki
^ Son Beibel abi a vers ya, ma aa de aini omen fu den pelensipali Giiki bukulolo.