Den sani di Yohanisi sikiifi 10:1-42
10 ‘Biibi mi, a sama di e pasa a wan taa peesi fu go aini a sikapu pen, pe fu a waka na a doo, a wan fufuuman efuso wan abani.
2 Ma a sama di e pasa na a doo, na a sikapuman.
3 Te a doo, a sama di e holi wakiti na a doomofu e opo a doo gi en. Den sikapu fi en sabi en siten. Ai kai den a den nen, da den e waka neen baka gwa doose.
4 Te a tyai ala den sikapu fi en gwa doose, ai waka a den fesi, da den sikapu e waka neen baka bika den sabi en siten.
5 Noiti den o waka a wan sama di den á sabi baka. A lon den o lon gi en, bika den á sabi en siten.’
6 Yesesi gi den a ageisitoli ya, ma den á be sabi san den sani ya wani taki.
7 Neen meke Yesesi taigi den taki: ‘A mi na a doo pe den sikapu mu pasa.
8 Ala den sama di be kon a mi peesi, a fufuuman efuso abani. Ma den sikapu fu mi ná aliki den.
9 A mi na a doo. Iniiwan sama di waka pasa mi fu gwa inise o fende libi. Di aw gwa inise aw fende nyanyan.
10 Fufuuman nai kon du taa sani boiti fufuu, kii, efuso poli sani. Ma mi kon fu meke sama fende libi, den o fende teego libi.
11 A mi na a bun sikapuman. Wan bun sikapuman de kabakaba fu dede gi den sikapu fi en.
12 Efii yuu wan sama di á sabi luku sikapu fu solugu den sikapu fii, aw lon gwe fika den te a si wan busidagu e kon, bika á neen abi den. Da a busidagu o kisi wantu fu den sikapu, da den taawan o lon fanyafanya go na ala se
13 A pai ye pai en, neen meke a nai booko en ede anga den sikapu.
14 A mi na a bun sikapuman. Mi sabi den sikapu fu mi. Den sikapu fu mi sabi mi,
15 leti enke fa mi anga Nda sabi useefi. Mi de kabakaba fu dede gi den sikapu fu mi.
16 Mi abi taa sikapu tu, di mi mu tyai kon a inise ete, ma den a ná fu a sikapu pen ya. Den o aliki mi siten, da den anga den taa sikapu o toon wan kulu, den o abi aseefi sikapuman.
17 A Dda lobi mi, bika mi de kabakaba fu gi mi libi fu mi sa fende en baka.
18 A ná sama dwengi mi, ma a di miseefi wani meke mi gi mi libi. Mi abi a leti fu gi mi libi, mi abi a leti fu fende en baka tu. A Nda sende mi fu du a sani ya.’
19 Di Yesesi taki den sani ya, den fesiman fu den Dyu bigin sitee anga denseefi baka.
20 Omen fu den be e taki: ‘Wan takuu yeye de neen tapu, en ede nai wooko bun. Saide we aliki en du?’
21 Ma taawan be e taki: ‘A nai taki enke wan sama di abi takuu yeye neen tapu ye. U si enke takuu yeye poi meke beendisama si?’
22 A ten de wan fesa be e holi a Yelusalem fu membee a dei di den be gi a tempel abaa a Gadu. A be a koo-ten fu a yali.
23 Yesesi be e waka aini a tempel na a pisi di den e kai a Pasi fu Salomo*.
24 Den Dyu kon taampu lontu en neen den akisi en taki: ‘On langa yo meke u de ya e wakiti ete? Efu ai na a Kelestesi da taigi u noh.’
25 Yesesi piki den taki: ‘Mi be taigi u kaba, ma wa wani biibi. Den sani di mi e du aini Nda nen e soi sama a mi.
26 Ma wa ná mi sikapu, neen meke u nai biibi.
27 Den sikapu fu mi e aliki mi siten, mi sabi den, den e waka a mi baka.
28 Mio gi den teego libi, den naw dede noiti. Nawan sama o puu den a mi ana tu.
29 Den sikapu di Nda gi mi pelensipali moo ala taa sani. Nawan sama poi puu den a Nda ana.
30 Mi anga a Dda na a wan.’
31 Di a taki so neen den Dyu teke siton baka fu fiingi naki en.
32 Yesesi piki den taki: ‘Den gaan sani di mi du, a san Nda sende mi fu du. Fu sowtu wan fu den sani di mi du ya u wani naki mi kii anga siton?’
33 Den Dyu taigi en taki: ‘A ná den gaan sani dii du meke u wani kii yu, ma a di ye soso Gadu. Bika winsi fa yu a wan libisama, toku ye maiki iseefi anga Gadu.’
34 Yesesi taigi den taki: ‘Ma a ná dati sikiifi aini a Weiti fu u noh? Ape sikiifi: ‘Mi taki: “Wa gadu.”’
35 U sabi taki den sani di sikiifi aini a wowtu fi en á poi kengi. Efu Gadu e kai den sama di en wowtu e kuutu “gadu”,
36 da mi di Gadu santa, di a sende kon a goontapu ya, neen wo taigi mi taki “mi soso Gadu” fu di mi taki “mi neen Manpikin?”
37 Efu a ná san Nda wani mi e du, da u naafu biibi mi.
38 Ma efu a san Nda wani mi e du, da winsi wa wani biibi mi, biibi den sani di mi e du. Da wo sabi taki mi anga a Dda na a wan, wo fusutan a sani ya moo bun.’
39 Neen den puubei ete wan leisi fu kisi en, ma a gwe komoto ape.
40 A go na abaase fu Yordaan liba a pe Yohanisi be e dopu sama fosi, neen a tan ape.
41 A omen sama kon neen, neen den taki: ‘Yohanisi á du nawan wonduu, ma ala san a be taki fu a man ya a tuu.’
42 A omen fu den sama di be kon ape bigin biibi en.
A maiki
^ Luku den wowtu ‘Pasi fu Salomo’ na a pisi ‘San den wowtu ya wani taki.’
