Den sani di Yohanisi sikiifi 11:1-57
11 Wan man den e kai Lasalesi be siki. En a be fu Betaniya, a foto pe Maliya anga en sisa Maata be e tan.
2 Na a Maliya ya be kandi a sumee switi oli a Masaa Yesesi, neen a dee mi en futu anga en ede uwii. Neen baala Lasalesi be siki.
3 Den sisa fu Lasalesi sende bosikopu gi Yesesi taki: ‘Masaa, i bun mati Lasalesi siki.’
4 Di Yesesi yee a bosikopu, a taki: ‘A siki ya a ná wan siki di o kii en, ma a siki fi en ya o meke sama gafa Gadu. A Manpikin fu Gadu seefi o fende gaandi.’
5 Yesesi be lobi Maata, Maliya anga Lasalesi.
6 Ma di a yee taki Lasalesi siki, a tan ete tu dei a pe a be de.
7 Bakadati a taigi den bakaman fi en taki: ‘Kow gwa Yudeya baka.’
8 Ma den bakaman fi en taigi en taki: ‘Leliman, a taade ya den sama fu Yudeya be wani naki i kii anga siton, neen ye go anda baka?’
9 Yesesi piki den taki: ‘A ná 12 yuu langa a peesi e kiin wan dei noh? A sama di e waka a deiten, nai tyotyo en futu a nawan sani, bika ai si a faya di e kiin a goontapu.
10 Ma a sama di e waka a neti e tyotyo en futu, bika a de aini dunguu.’
11 Baka di a taki den sani ya, a taki: ‘U mati Lasalesi e siibi, ma mio go anda go weki en.’
12 Neen den bakaman fi en taigi en taki: ‘Masaa, efu ai siibi, da aw kisi enseefi baka.’
13 Na a dede fu Lasalesi Yesesi be e taki, ma den bakaman fi en be denki taki a siibi Lasalesi be e siibi fu weki baka.
14 Neen meke Yesesi puu taigi den taki: ‘Lasalesi dede.
15 Ma a bun taki mia be de ape, bika a sani di mio du o taanga u biibi. Kow go neen anda.’
16 Neen Tomas di sama be sabi enke a Twelengi taigi den taawan taki: ‘Kow go tu, daw sa dede anga Yesesi.’
17 Di Yesesi doo ape, a yee taki a fo dei kaba den beli Lasalesi.
18 Betaniya be de wan sani fu dii kilomeiti fu Yelusalem.
19 A omen Dyu be kon kee pina anga Maata anga Maliya di den baala dede.
20 Di Maata yee taki Yesesi e kon, a go miti en a pasi, ma Maliya be fika a osu.
21 Maata taigi Yesesi taki: ‘Masaa, efii be de ya mi baala á be o dede.
22 Ma mi sabi taki Gadu o gii ala sai akisi en.’
23 Yesesi taigi en taki: ‘I baala o kon a libi baka.’
24 Maata taigi en taki: ‘Mi sabi taki aw kon a libi baka te sama o weki baka na a lasiti dei.’
25 Yesesi taigi en taki: ‘A mi na a opobaka anga a libi. A sama di e biibi mi, o kon a libi baka winsi a dede.
26 A sama di e biibi mi te a de a libi naw dede noiti. Ye biibi a sani ya?’
27 Maata piki en taki: ‘Eeye Masaa, mi e biibi taki ai na a Kelestesi, a Manpikin fu Gadu, a sama di be o kon a goontapu.’
28 Baka di a taki a sani ya, a go kai en sisa Maliya. A taigi en aini en yesi taki: ‘A Leliman de ya, ai kai i.’
29 Di Maliya yee so, a opo gawgaw neen a go miti Yesesi.
30 Yesesi á be kon aini a foto ete, a be de a pe Maata be go miti en.
31 A yuu ten de, den Dyu di be kon kee pina anga den be de aini a osu anga Maliya. Di den si a opo gwe gawgaw, den waka neen baka, bika den be denki taki na a geebi a be e go fu kee.
32 Di Maliya si Yesesi, a lon go neen, a kai a doti neen futu neen a taki: ‘Masaa, efii be de ya mi baala á be o dede.’
33 Di Yesesi si fa Maliya anga den Dyu di be kon anga en e kee, a du en ogii te, ná pikin tyali kisi en.
34 Neen a akisi den taki: ‘Pe u poti en?’ Den taigi en taki: ‘Masaa, kon luku.’
35 Neen Yesesi bali kee.
36 Di den Dyu si a sani ya den taki: ‘Kee, ná pikin lobi a be lobi en.’
37 Ma taawan be e taki: ‘A man ya be meke wan beendiman si, da aa be poi du wan sani fu a man ya á dede noh?’
38 Yesesi geme, bakadati a waka go na a geebi. Den be poti Lasalesi aini wan siton olo, neen den lolo wan gaan siton tapu a geebi mofu.
39 Yesesi taki: ‘U puu a siton.’ Ma Maata, a sisa fu a man di dede taigi en taki: ‘Masaa, a musu e sumee, bika a fo dei a dede kaba.’
40 Ma Yesesi taigi en taki: ‘Mia be taigi i taki efi ye biibi yo si fa Gadu bigi noh?’
41 Neen den puu a siton. Yesesi luku gwa tapu neen a taki: ‘Nda, mi e gii daa ye taki yu aliki mi.
42 Mi sabi taki ye aliki mi ala yuu, ma mi wani den sama di de ya sabi taki ai sende mi, neen meke mi e taki anga i.’
43 Baka di a taki den sani ya, a bali taki: ‘Lasalesi kon a doo.’
44 Neen a man di be dede kon a doo. En futu anga en ana be lolo aini koosi, en fesi seefi be lolo anga koosi. Yesesi taigi den sama taki: ‘Losi den koosi puu neen sikin daw fika en meke a gwe.’
45 A sani di a du ya meke omen fu den Dyu di be kon a Maliya toon en bakaman.
46 Ma son wan fu den gwa den Faliseiman go taigi den san Yesesi du.
47 Neen den fesiman fu den pilisite anga den Faliseiman kai a hii Sanhedrin* kon makandaa neen den taki: ‘San wo du, bika a omen wonduu a man ya e du.
48 Efu u fika en fu go doo anga den sani di ai du, na ala den sama o toon en bakaman, da den Romesama o puu a tempel anga a foluku fu wi a wi ana.’
49 Wan fu den man ya a be Kayafas di be de gaan pilisite a yali de. A taigi den taki: ‘Wa sabi nawan sani.
50 U nai si taki a moo bun efu wan kodo sama dede gi a hii foluku pe fu a hii foluku dede noh?’
51 A fu di Kayafas a be gaan pilisite a yali de, meke Gadu be meke a taki a polofeititoli taki Yesesi mu dede gi a foluku, ma a neenseefi be wani taki a sani ya.
52 A ná dede namo Yesesi be o dede gi a foluku, ma a be mu tyai ala den pikin fu Gadu di de na ala se kon a wan tu.
53 Fanafu a dei de neen den bigin suku wan fasi fu kii Yesesi.
54 Neen meke Yesesi á be e gwa peesi moo pe tyaipi sama* be sa si en. A komoto ape neen a go koosube fu a sabana a wan foto den e kai Efrayim, neen en anga den bakaman fi en tan ape.
55 A Paskafesa fu den Dyu be koosube, neen meke a omen sama be e komoto na ala se fu a kondee fu gwa Yelusalem, fu kiin denseefi enke fa a Weiti be e soi.
56 Den be taampu aini a tempel e luku efu den be o si Yesesi. Den be e akisi denseefi taki: ‘Saw denki? U si enke aw kon na a fesa?’
57 Den fesiman fu den pilisite anga den Faliseiman be taigi den sama taki, efu wan sama si Yesesi a mu go taigi den wanten. Den be taigi den a sani ya bika den be wani kisi Yesesi go sooto.
