Den sani di Yohanisi sikiifi 13:1-38
13 Yesesi be sabi fosi a Paskafesa taki a yuu fi en be doo fu a komoto a goontapu fu go na a Dda. A be lobi den bakaman fi en di de a goontapu ya. A be lobi den te na a kaba.
2 Di neti tapu Yesesi anga den bakaman fi en be e nyan. A pisiten de Didibii be poti a fii aini Yudas ati kaba fu konkuu Yesesi. Yudas Iskariot a be a manpikin fu Simon.
3 Yesesi be sabi taki a Dda poti ala sani aini en ana. A be sabi taki a Gadu a be komoto, a be sabi tu taki a Gadu a be o go baka.
4 A opo komoto na a tafaa pe den be e nyan, neen a puu en dyakiti. A teke wan duku, neen a tei en neen mindii.
5 Bakadati a poti wataa aini wan beki, a bigin wasi den futu fu den bakaman fi en, neen a dee den futu anga a duku di a be tei neen mindii.
6 Di a doo Simon Peitilisi, Peitilisi akisi en taki: ‘Masaa, a mi futu yo wasi?’
7 Yesesi taigi en taki: ‘I naw fusutan a sani di mi e du ya nownow, ma bakaten yo fusutan en.’
8 Peitilisi taigi en taki: ‘Noiti mio meke i wasi mi futu.’ Neen Yesesi taigi en taki: ‘Ya poi de mi bakaman efu mia wasi i futu.’
9 Neen Simon Peitilisi taigi en taki: ‘Masaa, ná wasi mi futu wawan, wasi mi ana anga mi ede tu.’
10 Yesesi taigi en taki: ‘Efu wan sama wasi kaba, aa de fu a wasi en hii sikin moo, bika a kiin kaba. Neen futu wawan a mu wasi. Ala u kiin, boiti wan fu u.’
11 Yesesi be sabi a man di be o konkuu en, neen meke a be taki: ‘A ná ala u kiin.’
12 Di a kaba wasi den futu, a wei en dyakiti, neen a go sidon a tafaa anga den baka. A akisi den taki: ‘U sabi saide mi wasi u futu?
13 We kai mi “Leliman” anga “Masaa”. Wa lei, bika a so a de tuu.
14 Neen meke efu mi enke u Masaa anga u Leliman wasi u futu, daw mu e wasi useefi futu tu.
15 Bika mi soi u kaba faw mu e du sani. Aseefi sani di mi du gi u, neen u mu e du gi useefi.
16 Biibi mi, wan saafu á bigi moo en masaa, wan bosikopuman á bigi moo a sama di sende en.
17 A bun taki u sabi den sani ya, ma a te we du den fosi wo de koloku.
18 A ná ala u mi e taki, bika mi sabi den sama di mi kai. Ma den sani di sikiifi aini Gadu buku mu kon tuu. A sikiifi taki: “A sama di be e nyan anga mi, neen toon mi feyanti.”
19 Mi e taigi u den sani ya fosi a pasa, da te a pasa u sa biibi taki a mi na a sama di a pisi fu Gadu buku ya e taki.
20 Biibi mi, efu wan sama e bali wadaa gi a sama di mi sende, da ai bali wadaa gi mi tu. A sama di e bali wadaa gi mi, e bali wadaa tu gi a Sama di sende mi.’
21 Di Yesesi kaba taki den sani ya, a be de anga buduufu na ati neen a taki: ‘Biibi mi, wan fu wo konkuu mi.’
22 Den bakaman fi en bigin luku denseefi, bika den á be sabi sama a be e taki.
23 A bakaman fu Yesesi di a be moo lobi, be sidon koosube fi en.
24 Neen meke Simon Peitilisi luku en, neen a akisi en taki: ‘Sama ai taki?’
25 Neen a bakaman ya engee gwa Yesesi, neen a akisi en taki: ‘Masaa, sama ye taki?’
26 Yesesi piki en taki: ‘Na a sama di mio gi a pisi beele di mio dipi aini a komiki. Baka di a dipi a beele aini a komiki, a langa en gi Yudas a manpikin fu Simon Iskariot.
27 Di Yudas teke a beele, neen Saatan go neen ati. Neen meke Yesesi taigi en taki: ‘Go du a sani dii wani du esi-esi.’
28 Ma nawan fu den taawan di be sidon a tafaa be sabi saide Yesesi taigi en a sani de.
29 A Yudas be e holi a moni-kedee. Neen meke son wan fu den be denki taki a sende Yesesi be e sende en fu go bai sani gi a fesa, efuso fu tyai moni go gi den pootiman.
30 Neen meke di Yudas teke a pisi beele, a gwa doose wanten. A yuu ten de a peesi be dunguu kaba.
31 Baka di Yudas gwa doose, Yesesi taki: ‘A Manpikin fu libisama fende gaandi. A meke Gadu fende gaandi tu.’
32 Gadu seefi o gi en gaandi, a wantenwanten aw gi en gaandi.
33 Mi mati, mio de ya wan pisiten anga wi ete, ma dyonson wo suku pe mi de. Ma na aseefi sani di mi be taigi den taa Dyu mi e taigi u tu: “U naw poi kon a pe mi e go.”
34 Mi e gi u wan nyun weiti. U mu lobi useefi. Leti enke fa mi lobi u, a so u mu lobi useefi tu.
35 Te u lobi useefi, da ala sama o sabi taki wi a mi bakaman.’
36 Simon Peitilisi akisi en taki: ‘Masaa, pe ye go?’ Yesesi piki en taki: ‘I naw poi kon a pe mi e go nownow, ma yo kon bakaten.’
37 Neen Peitilisi akisi en taki: ‘Masaa, saide mia poi kon anga i nownow? Mi de kabakaba fu dede fi yu ede oo.’
38 Yesesi piki en taki: ‘I de kabakaba fu dede fu mi ede? Biibi mi, fosi wan kakafoo bali, yo taki dii boo taki ya sabi mi.’
