Den sani di Yohanisi sikiifi 14:1-31
14 Wa booko wi ede. U mu biibi Gadu, u mu biibi mi tu.
2 Peesi lai fu tan aini a osu fu Nda. Efu peesi á be de, mi be o taigi u, bika mi e go anda fu seeka wan peesi gi u.
3 Di mio seeka a peesi gi u, mio daai kon baka fu tyai u gwa pe mi e tan, bika pe mio de, na ape useefi mu de tu.
4 U sabi a pasi fu doo a pe mi e go.’
5 Tomas taigi en taki: ‘Masaa, wa sabi pe ye go, da fa wo sabi a pasi fu doo anda?’
6 Yesesi piki en taki: ‘A mi na a pasi, a tuu, anga a libi. Sondee mi, nawan sama poi doo na a Dda.
7 Efu u be sabi mi, u be o sabi Nda tu. We fanafu now daw sabi en, bika u si en kaba.’
8 Filipus taigi en taki: ‘Masaa, efii soi wi a Dda da a bun kaba.’
9 Yesesi piki en taki: ‘Filipus, fu on langa di mi de anga u ya, neen ya sabi mi ete? A sama di si mi, si a Dda kaba, da fa a waka ye akisi mi taki: “Soi wi a Dda?”
10 I nai biibi taki mi anga a Dda na a wan noh? A ná san miseefi fii mi e taigi u, ma na a Dda di de wan anga mi, e meke mi du en wooko.
11 U sa biibi mi te mi e taigi u taki mi anga a Dda na a wan. Winsi wa wani biibi fu di mi taigi u, toku u sa biibi fu di useefi si den sani di ai meke mi du.
12 Mi e taigi u taki iniiwan sama di e biibi mi, o du den sani di mi e du, aw du gaan sani moo den wan ya seefi, bika mi e go na a Dda.
13 Mio gi u iniiwan sani di wi akisi aini mi nen. Mio du a sani ya fu a Manpikin sa meke a Dda fende gaandi.
14 Mio du iniiwan sani di wi akisi a Dda aini mi nen.
15 Efu u lobi mi, wo du den sani di mi taigi u.
16 Da mio akisi a Dda, da aw gi u wan taa yeepiman di o de anga u fu teego.
17 Dati na a santa yeye di e tyai a tuu kon a kiin. A goontapu á poi fende a yeye ya, bika aa poi si en, aa sabi en tu. U sabi a yeye bika a de anga u, a de aini u tu.
18 Mi naw fika u wawan*. Mio daai kon aw baka.
19 Dyonson a goontapu naw si mi moo, ma u dati o si mi, bika mio de a libi, useefi o de a libi.
20 Na a dei de wo sabi taki mi anga a Dda na a wan. Wo fusutan tu taki mi toon wan anga u, useefi toon wan anga mi.
21 A sama di sabi den weiti fu mi, da ai wooko anga den, a wan sama di lobi mi. Nda o lobi iniiwan sama di lobi mi, miseefi o lobi a sama de tu, mio meke a sama de kon sabi mi.’
22 Yudas taigi en taki (disi a ná Yudas Iskariot): ‘Masaa, saide yo meke u kon sabi i, ma i naw meke goontapu kon sabi i?’
23 Yesesi piki en taki: ‘Efu wan sama lobi mi, aw du san mi taki, da Nda o lobi en. Mi anga Nda o kon na a sama de, da wo tan anga en.
24 A sama di á lobi mi, nai du san mi taki. Den wowtu di we yee ya, a ná mi abi den, ma a fu a Dda di sende mi kon a goontapu.
25 A di mi de anga u ya ete meke mi e taigi u den sani ya.
26 Ma a santa yeye, efuso a yeepiman di Nda o sende kon aini mi nen, o leli u ala sani. Aw yeepi u tu fu membee ala den sani di mi be taigi u.
27 Ma fosi mi gwe mio gi wi a freide fu mi. Mi naw gi wi a freide di a goontapu e gi sama, neen meke aa de fu u booko wi ede efuso feele.
28 U yee di mi taigi u taki: “Mio gwe, da mio daai kon aw baka.” Efu u lobi mi, wo poolo taki mi e go na a Dda, bika a Dda bigi moo mi.
29 Mi e taigi u den sani ya fosi den pasa, da te den e pasa, wo biibi den sani di mi be taki.
30 Mi naw taki langa anga u moo, bika a tiiman fu a goontapu e kon, ma aa poi du san a wani anga mi.
31 Mi e du ala san a Dda taigi mi fu du, fu meke goontapu sabi taki mi lobi a Dda. Wi opo, meke u gwe komoto ya.
A maiki
^ Efuso ‘mi naw fika wi enke pikin di naabi mma anga dda’.
