Den sani di Yohanisi sikiifi 16:1-33
16 Mi e taigi u den sani ya fu wa dyakata.
2 Sama o yaki u puu aini den snoga*. Dyonson a yuu a doo pe sama o kii wi, da den o denki taki a Gadu wooko den e du.
3 A fu di den á sabi mi anga a Dda meke den o du den sani ya.
4 Mi e taigi u den sani ya, da di a yuu o doo di wo si den e pasa, wo membee taki mi be taigi u den sani ya kaba.
Mia be taigi u den sani ya ete, bika a mi anga u be de ya.
5 Ma mio daai go baka na a sama di be sende mi kon ya. Toku nawan fu we akisi mi taki: “Pe ye go?”
6 Den sani di mi taigi u ya meke tyali kisi u.
7 Ma biibi mi, a fu a bun fu u meke mi e gwe. Bika efu mia gwe, a yeepiman naw poi kon aw. Ma efu mi gwe, da mio sende en kon aw.
8 Da te a kon, aw soi kiin sowtu ogii den sama fu a goontapu e du, aw soi taki mi e du sani a wan letifasi, aw soi tu sama a den sama di Gadu e kuutu.
9 Aw soi den kiin san a sondu, bika den nai biibi mi.
10 Aw soi den taki mi e du sani a wan letifasi, bika mi e go na a Dda, daw naw si mi moo.
11 Bakadati aw soi kiin sama a den sama di Gadu e kuutu, bika a kuutu a tiiman fu a goontapu ya kaba.
12 Mi abi omen sani fu taigi wi ete, ma fu nownow den o ipi tumisi gi u.
13 Ma di a kaakiti fu Gadu di e tyai a tuu kon a kiin o doo, aw yeepi u fu fusutan sani moo bun. A kaakiti ya nai du san enseefi wani, ma a den sani di Gadu wani u sabi, ai tyai kon a kiin. Aw soi u saw pasa aini a ten di e kon.
14 Aw gi mi gaandi, bika a den sani di mi soi en aw leli u.
15 Ala san a fu a Dda, a fu mi, neen meke mi taki a san mi taigi en, a dati aw leli u.
16 Dyonson u naw si mi moo, ma a naw teke langa fosi u si mi baka.’
17 Di a taki a sani ya neen wantu fu den bakaman fi en akisi denseefi taki: ‘Saide a taki: “Dyonson u naw si mi moo, ma a naw teke langa fosi u si mi baka?” Efuso: “Mio daai go na a Dda baka?”’
18 Neen meke den be e akisi denseefi taki: ‘San a wani taki anga “dyonson?” U nai fusutan san ai taki.’
19 Yesesi be sabi taki den be wani akisi en wan sani, neen meke a taigi den taki: ‘A fu di mi taki: “Dyonson u naw si mi moo, ma a naw teke langa fosi u si mi baka, meke we akisi useefi a sani ya?”
20 Biibi mi, wo bali kee, ma goontapu o piisii, wo kusumi, ma a kusumi fu wo daai toon piisii.
21 Te bee e nyan wan uman, ai fii pen bika en yuu doo fu meke, ma te a meke kaba a nai membee a pen de moo, bika ai piisii te a si a pikin di a meke.
22 Useefi e kusumi nownow, ma di mio si u baka wo piisii aini wi ati, nawan sama o poi poli a piisii fu u.
23 A ten de u naw go e akisi mi sani moo. Biibi mi, iniiwan sani di wo akisi Nda, aw gi wi en aini mi nen.
24 Te enke now u ná akisi wan sani aini mi nen ete. Wi akisi, da wo fende, fu u sa piisii tuutuu.
25 Mi taigi u den sani ya aini ageisitoli. Ma dyonson mi naw gi u ageisitoli moo, ma mio puu gbeleng taigi u sama na a Dda.
26 A ten de wo go e akisi a Dda sani aini mi nen. Ma dati á wani taki a mio go e akisi gi u.
27 A di u lobi mi, neen meke Nda lobi u. A lobi u tu fu di we biibi taki mi na a sama di a sende.
28 Na a Dda be sende mi kon a goontapu. Ma now a yuu doo fu mi fika a goontapu, da mi daai go na a Dda baka.’
29 Den bakaman fi en taki: ‘Weeno, a no fosi u fusutan i, bika ya gi ageisitoli a leisi ya.
30 A no fosi we biibi taki i sabi ala sani, aa de fu u poti nawan akisi gii. A sani ya meke we biibi taki a Gadu i komoto tuu.’
31 Yesesi akisi den taki: ‘We biibi mi now?
32 Dyonson a yuu o doo, fu taki en kiin a doo kaba di ala wo lon gwa wi osu fika mi. Toku a ná mi wawan o de, bika a Dda de anga mi.
33 Mi taigi u den sani ya fu u sa abi freide fu mi ede. Sani o miti wi aini a goontapu ya, ma u mu abi deki-ati bika mi wini goontapu kaba.’
A maiki
^ A peesi pe den Dyu be e go fu dini Gadu.
