Den sani di Yohanisi sikiifi 17:1-26
17 Di Yesesi taki den sani ya, a opo en ede luku gwa tapu* neen a taki: ‘Nda, a yuu doo. Gi a boi fii gaandi, fi enseefi sa gii gaandi.
2 I gi en a makiti fu e taki gi ala libisama, fu a sa meke ala den sama dii gi en fende teego libi.
3 Efu sama wani fende teego libi, den mu leli sabi yu, a wan kodo tuu Gadu, anga a sama dii sende kon, Yesesi Kelestesi.
4 Mi gii gaandi a goontapu, bika mi kaba a wooko dii be gi mi.
5 Nda, fosi goontapu meke mi be de ai se. Gi mi aseefi gaandi ya baka baa.
6 Mi meke den sama dii gi mi a goontapu ya sabi i nen. A yu be abi den, neen i gi mi den. Den e du sai taki.
7 Now den kon sabi taki ala den sani di mi e du anga ala den sani di mi e taki, a yu den komoto.
8 Bika mi taigi den ala den sani dii taigi mi. Den biibi den sani ya, den kon sabi tu taki ai mi komoto. Den e biibi taki ai sende mi.
9 Mi e begi gi den. A ná den sama fu a goontapu mi e begi gi, ma mi e begi gi den sama dii gi mi, bika a yu abi den.
10 Ala san mi abi a fii, ala san yu abi a fu mi, neen meke den gi mi gaandi.
11 Mi naw de a goontapu ya moo, bika mi e kon a yu anda, ma den dati de a goontapu ya. Santa* Dda, gaantangi kibii den baa fu a nen fii ede, a nen dii gi mi fu tyai, fu den sa de wan anga mi leti enke fa mi anga yu a wan.
12 Di mi be de anga den, a mi be e luku den fu a nen fii ede dii gi mi fu tyai. Mi kibii den tu, neen meke a wan fu den namo o lasi, na a wan ya o dede. A sani ya o pasa fu meke den sani di sikiifi aini i wowtu kon tuu.
13 Mi e kon a yu anda, ma mi e taki den sani ya a goontapu fu den sa piisii tuutuu enke fa mi e piisii.
14 Mi gi den a wowtu fii, ma goontapu e buuse den, bika den nai holibaka gi a goontapu ya, leti enke fa mi nai holibaka gi a goontapu ya.
15 A ná begi mi e begi i fu puu den a goontapu, ma mi e akisi i fu kibii den fu a ogiiwan á du ogii anga den.
16 Den nai holibaka gi a goontapu ya, leti enke fa mi nai holibaka gi a goontapu.
17 Meke den kon santa anga a wowtu fii, bika a wowtu fii na a tuu.
18 Leti enke fai sende mi go aini a goontapu, a so miseefi sende den go aini a goontapu.
19 Mi tyai miseefi a wan santafasi ala yuu fu den ede, fu a wowtu fii sa meke den kon santa tu.
20 A ná den apostel wawan mi e begi gi, ma mi e begi gi ala sama di e biibi mi fu di den aliki den.
21 Da ala den o de wan Nda, leti enke fa mi anga i de wan. Den o de wan anga u tu, da goontapu o biibi taki ai sende mi.
22 Mi gi den a gaandi dii gi mi, fu den sa de wan, leti enke fa mi anga i de wan.
23 Mi de wan anga den, i de wan anga mi, da denseefi o de wan tuutuu, da goontapu o sabi taki ai sende mi. Aw sabi tu taki i lobi den, leti enke fai lobi mi.
24 Nda, mi wani den sama dii gi mi de anga mi a pe mio de, fu den sa si a gaandi dii gi mi, bika i be lobi mi kaba fosi goontapu sete.
25 Nda, ye du sani a wan letifasi ala yuu. A goontapu ya á sabi i, ma mi sabi i. Den sama dii gi mi sabi taki ai sende mi.
26 Mi meke den kon sabi i nen, mio tan taigi den fu a nen fii, fu den sa lobi taa sama enke fai lobi mi, da mio de wan anga den.
A maiki
^ Efuso ‘hemel’.
^ Luku den wowtu ‘santa efuso santafasi’ na a pisi ‘San den wowtu ya wani taki.’
