Den sani di Yohanisi sikiifi 18:1-40
-
Yudas konkuu Yesesi (1-9)
-
Peitilisi hali wan fetihow (10, 11)
-
Den e tyai Yesesi go a Anas (12-14)
-
A fosi leisi di Peitilisi sitee taki aa sabi Yesesi (15-18)
-
Yesesi doo Anas (19-24)
-
Peitilisi sitee ete tu leisi taki aa sabi Yesesi (25-27)
-
Den tyai Yesesi gwa Pilatus (28-40)
-
‘A Kownukondee fu mi a ná fu a goontapu ya’ (36)
-
18 Baka di Yesesi taki den sani ya, en anga den bakaman fi en go na abaase na a paata pisi fu Kidron. Wan dyali be de ape, neen den go aini.
2 Yudas di be o konkuu en bakaten, be sabi a peesi de tu, bika Yesesi be gwenti go ape anga den bakaman fi en.
3 Neen Yudas tyai wan kulu suudati, wantu fesiman fu den pilisite, anga wantu fesiman fu den Faliseiman kon ape. Den be de anga alantei anga fetisani.
4 Yesesi be sabi san be o pasa anga en, neen meke a waka go a den, neen a akisi den taki: ‘Sama we suku?’
5 Den taigi en taki: ‘A Yesesi fu Nasaleti we suku.’ A piki den taki: ‘A mi na a sama di we suku.’ Yudas di be o konkuu Yesesi be taampu anga den.
6 Di Yesesi taigi den taki: ‘A mi na a sama di we suku,’ den naki bakawan neen den kai a doti.
7 Neen Yesesi akisi den baka taki: ‘Sama we suku?’ Den taki: ‘Yesesi fu Nasaleti.’
8 Yesesi piki den taki: ‘We neen mi taigi u taki a mi de ya. Efu a mi we suku, daw fika den man ya meke den gwe.’
9 A so a sani di Yesesi be taki kon tuu. A be taki: ‘Mia lasi nawan fu den sama dii gi mi.’
10 Simon Peitilisi be de anga wan fetihow fi en ape. A hali en neen a koti a letise yesi fu a saafu fu a gaan pilisite puu feleng. A nen fu a saafu ya a be Malkus.
11 Ma Yesesi taigi Peitilisi taki: ‘Poti i fetihow neen peesi baka. Mia mu diingi a sani di a Dda di de a hemel gi mi fu diingi noh?’
12 Bakadati den suudati fu Rome, a suudati-edeman, anga den wakitiman fu den Dyu kisi Yesesi, neen den tei en ana.
13 Den tyai en go a Anas fosi, bika en a be a pai fu Kayafas di be de gaan pilisite a yali de.
14 A Kayafas be taigi den Dyu taki a be o moo bun gi den efu wan man dede gi a hii foluku.
15 Simon Peitilisi anga wan taa bakaman fu Yesesi be e waka a Yesesi baka. A bakaman ya be sabi a gaan pilisite, neen meke a go anga Yesesi aini a dyali fu a gaan pilisite.
16 Ma Peitilisi be taampu fika a doose. A taa bakaman fu Yesesi di a gaan pilisite be sabi, go taki anga a meisyo di be e holi wakiti na a doomofu fu a gaan pilisite, neen a meke Peitilisi kon a inise.
17 A meisyo di be e holi wakiti na a doomofu akisi Peitilisi taki: ‘Ya ná wan fu den bakaman fu a man ya noh?’ A taigi en taki: ‘Nono.’
18 Den saafu anga den suudati be meke wan faya, bika a peesi be koo. Den be taampu lontu a faya, neen Peitilisi go waan faya anga den.
19 A fesiman fu den pilisite akisi Yesesi omen sani fu den bakaman fi en, anga den sani di ai leli sama.
20 Yesesi taigi en taki: ‘A pe ala den Dyu be de aini a tempel anga den snoga* mi be e taki anga den. Mia taki nawan sani kibiikibii.
21 Saide ye akisi mi omen sani du? Go akisi den sama di yee den sani di mi taigi den. Den sabi san mi taki.’
22 Baka di Yesesi taki den sani ya, wan fu den suudati di be taampu ape kalapu en aini en fesi neen a taki: ‘A so ye taki anga a fesiman fu den pilisite?’
23 Yesesi piki en taki: ‘Efu mi taki wan sani di á bun, da taigi mi sowtu ogii mi taki. Ma efu na a tuu mi taki, da saide ye naki mi du?’
24 Bakadati Anas sende en go anga teitei ana a Kayafas, a gaan pilisite.
25 A yuu ten de Simon Peitilisi be taampu e waan faya, neen den akisi en taki: ‘Ya wan fu den bakaman fi en?’ A sitee taki: ‘Nono.’
26 Ma wan famii fu a man di Peitilisi be koti en yesi puu be de ape. A man ya a be wan saafu fu a gaan pilisite. A man akisi en taki: ‘A ná yu mi be si aini a dyali anga Yesesi noh?’
27 Ma Peitilisi sitee ete wan leisi taki a neen. Aa kaba taki seefi neen wan kakafoo bali.
28 Fuuku mamanten den komoto a Kayafas neen den tyai Yesesi go na a osu fu a gaanman. Ma denseefi á go aini a osu fu a gaanman, bika den á be wani tyobo denseefi. Efu den be du a sani ya, den á be o poi nyan a Paska nyanyan.
29 Pilatus kon miti den a doose neen a akisi den taki: ‘Sowtu ogii a man ya du?’
30 Den piki en taki: ‘Efu a ná ogii a man ya be du, wa be o tyai en kon ai.’
31 Neen Pilatus taigi den taki: ‘U teke en da useefi kuutu en enke fa a weiti fu we soi.’ Ma den Dyu taigi en taki: ‘A weiti fu u nai gi u pasi fu kii sama.’
32 A sani ya pasa fu den sani di Yesesi be taki fu a fasi fa a be o dede be sa kon tuu.
33 Pilatus go aini a gaanman osu baka. A kai Yesesi neen a akisi en taki: ‘Ai na a Kownu fu den Dyu?’
34 Yesesi piki en taki: ‘A dii wani sabi meke ye akisi mi a sani ya? Efuso a dii yee sani fu mi meke ye akisi mi.’
35 Pilatus taigi en taki: ‘We mi a ná wan Dyu. A den kondeeman fii anga den edeman fu den pilisite tyai i kon a mi. Sai du?’
36 Yesesi piki en taki: ‘A Kownukondee fu mi a ná fu a goontapu ya. Efu a Kownukondee fu mi a be fu a goontapu ya, den bakaman fu mi be o feti gi mi fu den Dyu á fende mi kisi. Ma leti enke fa mi taki kaba, da a Kownukondee fu mi a ná fu a goontapu ya.’
37 Neen Pilatus akisi en taki: ‘Da ya wan kownu?’ Yesesi piki en taki: ‘A iseefi taki mi a wan kownu. A fu a sani ya mi meke kon a goontapu, fu mi sa leli sama a tuu. Ala sama di lobi a tuu e du san mi taki.’
38 Pilatus akisi en taki: ‘Sama poi sabi a tuu?’
Baka di a taki a sani ya, a go a doose a den Dyu neen a taigi den taki: ‘Mia fende nawan fowtu na a man ya ye.
39 Ma leti enke fa a gwenti fu u de, da ala yali mi e losi wan sitaafuman gi u na a Paskafesa. U wani mi losi a Kownu fu den Dyu gi u?’
40 Neen den sama bali taki: ‘Nono ya mu losi en, a Barabas i mu losi.’ Barabas a be wan ogiiman.
A maiki
^ A peesi pe den Dyu be e go fu dini Gadu.
