Den sani di Yohanisi sikiifi 2:1-25
2 Baka tu dei, wan toowfesa be holi a Kaana aini Galileya. A mma fu Yesesi be de ape.
2 Den be kai Yesesi anga den bakaman fi en fu kon na a toowfesa ya tu.
3 Di a win be de fu kaba, Yesesi mma taigi en taki: ‘Den naabi win moo.’
4 Neen Yesesi taigi en taki: ‘Folow, saide mi anga i mu booko wi ede anga a pisi de? A yuu fu mia doo ete.’
5 En mma taigi den sama di be e paati sani taki: ‘U du ala san a taigi u ye.’
6 Den Dyu be abi wan weiti di be e taki den mu wasi den ana fosi den nyan. Neen meke den be abi sigisi sani enke balin ape di be meke anga siton. Ibiiwan fu den be sa holi wan sani fu 44 efuso 66 liti wataa.
7 Yesesi taigi den sama di be e paati sani taki: ‘U fuu den balin anga wataa.’ Neen de fuu den balin te a noko.
8 Bakadati a taigi den taki: ‘U kisi pikinso daw tyai en go gi a fesiman fu a fesa.’ Neen den du san a taki.
9 Di a fesiman tesi a wataa di toon win, aa be sabi pe a komoto, ma den sama di be kisi en gi en be sabi. Di a tesi a win, a kai a man di be e toow neen a taigi en taki:
10 ‘Ala sama e paati a bun win fosi, da te den sama duungu, den e paati den taa win. Ma i dati a no fosi ye paati a moo bun win.’
11 A disi na a fosi wonduu di Yesesi du. Aini a foto Kaana di de a Galileya a du a wonduu ya. A so a meke sama si a kaakiti di a abi. A sani di a du ya meke den bakaman fi en biibi en.
12 Bakadati Yesesi anga en mma, den baala fi en anga den bakaman fi en go a Kaperna-um. Ma den á tan ape langa.
13 Di a Paskafesa fu den Dyu be koosube, Yesesi go a Yelusalem.
14 Di a go aini a tempel, a si sama e seli kaw, sikapu anga doifi. Wantu sama be sidon ape e booko moni tu.
15 Di a si a sani ya, a meke wan wipi anga tetei, neen a yaki ala den sama puu ape anga den kaw anga den sikapu fu den. A daai den tafaa fu den sama di be e booko moni tapu, neen a towe den moni fu den a doti.
16 A taigi den sama di be e seli doifi taki: ‘U teke den sani ya puu ya! A osu fu Nda a ná wowoyo!’
17 Den bakaman fi en be membee san sikiifi aini Gadu buku. A sikiifi taki: ‘A lobi di mi abi gi a osu fii de enke wan faya di e boon aini mi ati.’
18 Neen den Dyu taigi en taki: ‘Du wan wonduu osi fu soi u taki yu abi a leti fu du den sani ya.’
19 Yesesi piki den taki: ‘U booko a tempel ya puu, da mio meke en baka aini dii dei.’
20 Neen den Dyu taigi en taki: ‘A 46 yali a teke fu meke a tempel ya, da fa yo meke en baka aini dii dei?’
21 Ma a tempel di Yesesi be e taki, a be en sikin.
22 Di a kon a libi baka, den bakaman fi en membee taki a be lobi taki a sani ya. Neen meke den be e biibi san sikiifi aini Gadu buku. Den be e biibi den sani di Yesesi taki tu.
23 Di a be de a Yelusalem a du omen wonduu na a Paskafesa. A omen sama bigin biibi en di den si den wonduu di a du.
24 Ma Yesesi á be e fitoow den, bika a be sabi san de aini den ati.
25 Aa be abi sama fanowdu fu taigi en fa libisama de, bika a be sabi san de aini den ati.
