Den sani di Yohanisi sikiifi 20:1-31
20 A fuuku mmanten fu a fosi dei fu a wiki, Maliya Makdalena go na a geebi pe den be poti Yesesi. Di a doo, a si taki a siton di den be tapu a geebi á be de na a geebi mofu moo.
2 Neen meke a lon gwa Simon Peitilisi anga a bakaman di Yesesi be moo lobi, neen a taigi den taki: ‘Den puu Masaa aini a geebi, wa sabi pe den poti en.’
3 Neen Peitilisi anga a taa bakaman teke pasi fu go na a geebi.
4 Den tu man bigin lon, ma a taa bakaman be gaw moo Peitilisi, neen meke en fosi doo a geebi.
5 Di a bendi luku go aini a geebi, a si den linnen koosi ape, ma aa gwa inise.
6 Bakadati Simon Peitilisi seefi lon doo, neen a go aini a geebi. A si den linnen koosi ape tu.
7 Ma a koosi di den be lolo Yesesi ede anga en, á be de a pe den taa koosi be de. A be de lolo-lolo a wan taa peesi.
8 A taa bakaman di fosi be doo na a geebi seefi gwa inise. Den sani di a si meke a biibi san Maliya be taigi den.
9 Den á be kaba fusutan a pisi fu Gadu buku ete di be taki Yesesi be mu kon a libi baka.
10 Neen den bakaman fi en daai gwa den osu baka.
11 Ma Maliya be taampu fika na a geebi mofu e kee. Di a kee te, a bendi luku go aini a geebi,
12 neen a si tu engel sidon anga weti koosi a pe Yesesi be didon. Wan fu den be sidon a pe a be gi ede go, a taawan be de a pe a be gi futu go.
13 Den akisi en taki: ‘Folow, saide ye kee?’ A piki den taki: ‘Wan sama puu a Masaa fu u ya, mia sabi pe den tyai en go.’
14 Di a taki a sani ya, a daai luku baka neen a si wan sama taampu ape, ma aa be fusutan taki a Yesesi be de ape.
15 Yesesi akisi en taki: ‘Saide ye kee? Sama ye suku?’ Maliya be denki taki na a sama di be e kiin a peesi, neen meke a taigi en taki: ‘Efu ai tyai en puu ya, gaantangi taigi mi pei poti en baa, da mio go teke en.’
16 Yesesi taki: ‘Maliya!’ Di Maliya daai, a taki aini Hebrewtongo taki: ‘Rabboni!’ (a sani ya wani taki ‘Leliman!’)
17 Yesesi taigi en taki: ‘Ná holi mi moo, a yuu á doo fu mi go na a Dda ete. Gwa den baala fu mi dai taigi den taki: “Mi e gwa Nda, en aw Dda tu, mi e gwa mi Gadu, en aw Gadu tu.”’
18 Maliya Makdalena go gi den taa bakaman a nyunsu. A taigi den taki: ‘Mi si Masaa!’ Neen a taigi den san Yesesi taigi en.
19 A dei de a be a fosi dei fu a wiki. A bakadina fi en, den bakaman fu Yesesi be kon a wan aini wan osu. A doo be sooto bika den be e feele den Dyu. Yesesi kon a den ape neen a taampu a den mindii. A taigi den taki: ‘Meke sani waka bun anga u.’
20 Di a taki a sani ya, a soi den en ana anga en bansa. Den bakaman fi en poolo di den si en.
21 Yesesi taigi den ete wan leisi taki: ‘Meke sani waka bun anga u. Leti enke fa a Dda sende mi kon a goontapu, a so miseefi e sende u tu.’
22 Di a taki a sani ya, a boo gwa den neen a taigi den taki: ‘U teke Santa yeye.
23 Efu u gi wan sama paadon fu den sani di a du, Gadu o gi en paadon. Ma efu wa gi wan sama paadon fu den sani di a du, Gadu naw gi en paadon tu.’
24 Tomas, wan fu den twalufu apostel di den be e kai a Twelengi á be de ape di Yesesi kon a den.
25 Den taa bakaman taigi en taki: ‘U si Masaa.’ Ma a taigi den taki: ‘Mi naw biibi solanga mia si den maiki di den be sipikii en da mi sutu mi finga go aini den maiki de. Mi mu poti mi ana a pe den be sutu en neen bansa tu.’
26 Baka aitin dei den bakaman fu Yesesi be kon a wan baka aini wan osu. Winsi fa den doo fu a osu be sooto, toku Yesesi be kon taampu a den mindii, neen a taki: ‘Meke sani waka bun anga u.’
27 A taigi Tomas taki: ‘Luku mi ana ya, langa i finga kon fii den maiki. Poti yu ana a pe den be sutu mi a mi bansa. I mu e biibi, ná taki moo taki mia kon a libi.’
28 Neen Tomas bali taki: ‘Mi Masaa, mi Gadu!’
29 Yesesi taigi en taki: ‘A dii si mi fosi ye biibi? Koloku fu den sama di e biibi sondee fu den si.’
30 Yesesi du omen taa wonduu a den bakaman fi en fesi, di á sikiifi aini a bukulolo ya.
31 Ma den sani ya sikiifi fu u sa biibi taki Yesesi na a Kelestesi, a Manpikin fu Gadu. Te we biibi en, wo fende teego libi.